Read Hadiyya 1 Agannuwwi Kitaaba 28 Bible Online

1 Agannuwwi Kitaaba 28 - Hadiyya bible

1 Agannuwwi Kitaaba 28

¹Adil Daawiit Isra'ee'l minaadaphphi awwonsaan hundim Yerusaaleemanne wixxitona ijaajukko; ee bikkina hundem sulli awwonsaan, adilla'n minenne baxxam gassaan, shaalaqquwwii xibbalaqquwwii, adi'llekaa ixxi goo'n oosikaa amaxxaa fooraam diinatee egattam keen, adi'l gassaan, summanto'oo keenii la'anto'oo geedduwwii hundim Yerusaaleemanne wixxito'o.

²Hundim wixxita'a lasage adil Daawiit uullaa «I minaadaba, hino'o macceessehe; ni Moollanni lokkii Hidi'l Saga'l Saaxinii usheexxoo Keesammi Mine baxeena hasaa hee'ummo; ee Mi'n baxina ihoo mu'uta hundam gudisaammo.

³Ihukkaarem Waa'i ‹At o'l manchoo lobakat xiigam duntaattoohanee ihu bikkina I summi weeshamoo mine at baxxooyyo› yaakko.

⁴Isra'ee'l Moollanni Waa'i Isra'eelanne heer heerina adil ihona iyyanni miniinsi eese doo'llaakko; Yihud Isra'eelina awwonsaanchi ihona doo'llaakko. Yihuxxi sulliinsim iyyanni mine doo'llaakko; iyyanni miniinsim eese doo'llaa hundem Isra'eelannem adil isseena iittaakko.

⁵Iinam lobakat ooso ixxi uwwaakko; ihukkaarem iinniinsi lasage Isra'eelanne adil ihoo'isina i beeto Salamoona doo'llaakko.

⁶«Waa'i odim iina ‹I Keesammi Minee wixxixxi beyyuwwaa iina baxookkok ki beet Salamoonatte; an ixxo iina beet ihona doo'llaammo; anim ixxena anni ihoommo.

⁷Ixxi kaba issoo'isam hundi ammanem iikka ijaajoo seeraa qoxxaa egeroohan ihulas ixxeka adillano an heer heerina qoxxisoommo› yaakko.

⁸«Kabadem i minaadaba, Waa'i illagennee Waa'i Minaadab ihu ka hundem Isra'ee'l dummichchi illagennee ni Moollanni Waa'i ijaaj hundam qoxxitakka'a egettakkona yabo uwwaammo; eekkam issitakkolas ka er uulla heer heerina ki'nnuwwi gulummi issitakkamo; waaroo qaranchinam ki'nnuwwi oos oosina lago aa'issakkamo» yukko.

⁹Salamooninam «I beeto, kiyyanno'i Waa'a laqqonaa wo'm sawwittinnee tiirinnee awwaaddonaa yabo uwwoommo; ixxi niikka sawwitee mixanoo hundam la'oohane; at ixxi kollonne hincitlas ixxim ki kollonne hincookko. Ihukkaarem at ixxo uttilas ixxim keese heer heerina uraa urookko.

¹⁰Keesammi Mine ixxena baxxona Waa'i keese doo'llukkisa xadditte; kabadem qoxxitaa murte'aalli tiirinne baxe» yukko.

¹¹Daawiit Keesammi Mi'n baxika qoodo'o oohim mu'uxxi minneewwika, uullika, fooqika, woro'l baxxanchuwwikaa baaxiil haafamoo keesammiinsi keesammi beyyikaa ixxi beet Salamoonina uwwukko.

¹²Odim Wixxixxi beyyuwwikaa ee kululleetanne hee'oo mi'n baxxanchuwwikaa Keesammi Mi'n mu'uttuwwaa kitima hincaa'immina awwaaxxakkam mu'uttuwwaa dissakkam minneewwina Keesammi Ayyaan tiissiisu qoodo'i hundam edaa uwwukko.

¹³Ee'isam Daawiit qeessuwwii Leewi'i oosii annanni annanni bax sharadikaa Waa'ina otossakkam ammane awwaaxxakkam mu'uttuwwa egerimmikaa qoodo'o Salamoonina edaa uwwukko.

¹⁴Annanni, annanni awwaadina ihoo mu'uttuwwa baximmina kin biraa worqaa keenaa uwwukko.

¹⁵Caakka dissakkam mu'utinaa kuraazzuwwinaa ihoo worqaa kin birinne baxakkam caakka dissakkam mu'uttuwwaa kuraazzuwwaa baximmina ihoo kin bira keenaa uwwukko.

¹⁶Waa'ina kitim ihaa hincoo dabbo'o dissakkam xaraphpheezzuwwa annannichchom baximmina hasisoo worqaa mulli xaraphpheezzuwwa baximmina hasisoo kin biraa keenaa uwwukko.

¹⁷Ee'isam qaphphuwwa, disxuwwaa maanqorqoro'uwwaa baximmina hasisoo muccur worqaa loqooqo'i saahinnuwwa baximmina hasisoo kin biraa keenaa uwwukko.

¹⁸Aduruusa wiriissakkam kiti'm beyyina ihoo muccur worqa keenaa uwwukko; ee'isam ixxuwwi lada Waa'i Hidi'l Saga'l Saaxiniinsi hanaan biddiqaa'lla'a iffiissam kiruubeel afuuroo faraxxi gaarre'i worqinne baxamaakkoo kobi'lla uwwukko.

¹⁹Adil Daawiitim «Ku hundim Waa'i ixxi gagim ixxi anginne kitaabaa an qoossona iina uwwu hundem bax qoodo'o» yukko.

²⁰Adil Daawiitim ixxi beet Salamoonina «Murte'aallaa qoxaraa ihe; baxom qaqissaa asheere; gulliteebe'em mahim egedoone; i Moollanni Waa'i kiinninnette; ixxi awwaadina ihoo mine baxxaa guulliteebe'e ixxi kiinninsi annanni ihooyyo; keesem horo'em urooyyoo uunjooyyoo.

²¹Keesammi Mi'n awwaadduwwina qeessuwwii Leewi'i oosii yo'o; annanni annanni lachchi yoo baxaanim wo'm sawwitinne kiina hara'mmiteena gudo'ookko; minaadabii minaadaphphi awwonsaanii hundim kiina ijaajantamo» yukko.