Read Hadiyya 1 Agannuwwi Kitaaba 29 Bible Online

1 Agannuwwi Kitaaba 29 - Hadiyya bible

1 Agannuwwi Kitaaba 29

¹Adil Daawiit hundem dummichchinam «Waa'i doo'llukkok i beet Salamoonatte; ihukkaarem ixxi ooshshichchoo baxom losubee'anee. Baxamoo minim Moollanni Waa'inatte bagaan manninatti ihu bee'i bikkina baxamoo bax lobakata kee'mmaalla.

²An i malaayyi qaxa i Waa'ina Keesammi Mi'n baxina hasisoo mu'uttuwwa hundam gudisaammo. Oohim worqi baxina worqa, bi'l baxina bira, Naasaannina naasa, xaa'llaannina xaara, haqqaannina haqqa, aduu'n ille laboo kina, annanni annanni hagar yoo gurumbina ihoo kina, bito xee'aalli kinaa lobakat ibina baradaa wixxaa'aammo.

³Ee keen hundiinsim mulleka an Waa'i Keesammi Minina yoo iittiinsi ki'isaa i gaqqi amaxxi ihu lobakat biraa worqaa uwwaammo.

⁴Ee'isinne Xibbi kum kiilo'o ihoo Oofii'l worqaa lam xibbee sor kum kii'llo'oo ihoo muccur kin biraa Keesammi Mi'n gimba wereeggisimminaa

⁵angi baxo laqqam manni baxxam mu'ut hundinam awwaadonaa uwwaammo. Kaballa ki'nnuwwiinsi ixxena yoohaanniinsi ixxi gaqqi doo'llinne Waa'ina uwwookkok ayyette?» yukko.

⁶Ee lasage moolli awwonsaan, Isra'ee'l sulluwwa awwonsaan, shaalaqquwwi, xibbalaqquwwii adi'l gassaanii ixxuwwi gaqqi doo'llinne uwwito'o.

⁷170,000 kiillo'iinsi lophphoo worqa, 340,000 kiillo'iinsi lophphoo kin bira, 620,000 kiillo'o ihoo qax naas xaaraa 3,400,000 kiillo'iinsi lophphoo xaaraa ixxuwwi gaqqi doo'llinne uwwito'o.

⁸Lobakata bito xee'aalli kin yoo keen hundim Leewi'i sulliinsetti ihoo Gershoon moolli Yihii'eel gassoo mu'uxxi minenne eebba'a uwwito'o.

⁹Minaadabim ixxuwwi qaqqi doo'llinnee mu'llaakkoo tiirinne Waa'ina uwwito'i bikkina lobakata liiranto'o. Adil Daawiitim lobakata liiramukko.

¹⁰Daawiitim ee hundem dummichchi illagennem Waa'a galaxxukko. Ixxim «Gaassi niyyanni Yaaqoobina Moollanni Waa'a! At heer heerina galaxxame.

¹¹At hundiinsi lobanee malaayyaamoo; lombinne, nuurinnee hibbinnee wo'mmitaattoohane. Iimanennee uullannee yoo luwwi hundim kiihane. At hundem luwwiinsim hanaan ikkaahii hundem luwwannem daanni ikkaahii yoonti adila.

¹²Goddii lombii kiinniinsette. At hundam gassitootto. Wodii malaayyii kiihane. Iittittoka hundiinsi lobanee malaayyaamoo issiteena xantootto.

¹³Ni Waa'a! Kabadem neese keese galaxxinoommo; lombaam ki summam iimiimaa'nnoommo.

¹⁴«Ka uwwinoommi luwwa ni doo'llinne uwwineena xannoommisina an ayyette? I minaadabdu ayyette? Luwwi hundim at niina uwwittane. Oono'o, kiihan hee'ukkaanniinsi kiinam daballaa uwwinaammo.

¹⁵Waa'a gaassi niyyanno'isam neesem ki illagenne koyyaa waaraano; ka uullanne hee'nnoommi ni umu'l doollim neeyyat bee'i hafisa.

¹⁶Ni Moollanni Waa'a! Ki keesammi summi bikkina mine banxeena wixxaa'nnummi ammaxxi hundim siidamukkok kiinniinsette; hundim kiihane.

¹⁷At manni hundikam wodano saarayyitoo'isaa xabbeenoomam iittitoo'isaa la'oommo. Anim i woda'n xabbeenoominnee doo'llinnee ka hundam kiina hincaa'aammo. Kabadem ku keyye wixxu ki minaadab liiranchinne kiina uwwukkisa moo'aammo.

¹⁸Gaassi niyyanno'i Abrihaamina, Yisaaqinaa Yaaqoobinaa Moollanni Waa'a! Ku lophphaakkoo iitti ki minaadab Isra'ee'l wodanonne heer heerina qoxxaa hee'oo'isa isse. Hundi ammanem kiina amma'nnanto'oo keen ikkamisa isse.

¹⁹Ki ijaajo, gatti ogoraa seeraa egerona ka hundem gudishsham issummi ki mine baxona i beet Salamoonina murte'aalli wodano uwwe» yukko.

²⁰Ee lasage Daawiit minaadabina «Ki'nnuwwi Moollanni Waa'a galaxxehe» yukko. Ixxuwwim ixxuwwi gaassi anno'ina Moollanni ihu Waa'a galaxxito'o. Uullanne ubba'ahim Waa'ina otossito'o. Adilinam lomba uwwito'o.

²¹Ee la'm balla daram lobakat diinate dutta'a Waa'ina kitima hincaa'llo'o. Odim mat kum moolluwwa, mat kum gereebbi lob ambulluwwaa mat kum gereebbi hoffi ambulcha'aa shokkiisakka'a Waa'ina hincaa'akkam kitim issita'a Waa'ina hincaa'llo'o; woyi'n diqaas kitimam hincaa'llo'o.

²²Ee bikkina ee balla Waa'i illagenne ittu'uuyyii aggu'uuyyii lobakata liiranto'o. Salamoonim adil ihukkisa la'm korina la'isso'o. Waa'i summinnem labba'a adil issito'o. Saadooqam labba'a qeessichchi issito'o.

²³Salamoonim ixxi anni Daawiitaannonne Waa'i shooho'aakkoo adillanonne afuurukko. Ixxim hundem luwwim taaphanaakkoo adil ihukko. Isra'ee'l minaadab hundim ixxena ijaajamukko.

²⁴Gassaan, gaadaanii gatto'i Daawiit oos hundimii adil Salamoonina ama'nnanto'oo keen ikkeena sagara aggo'o.

²⁵Uulli minaadaphphi illagenne hundannem Waa'i adil Salamoona iimiimaa'ukko. Illageen Isra'ee'l minaadaba gassito'i adilluwwiinsi hundiinsim lophphaakkoo lombaam ihoo'isa issukko.

²⁶Issayyi beet Daawiit Isra'ee'l minaadaba hundam gassukko.

²⁷Ixxi gassi doolli hundoomim sor hiinchi ihaa Keebiroonanne lamar hiincho Yerusaaleemanne sadee sas hiinchoo gassukko.

²⁸Lobakat goddaa lombaa siidaa lobakat doollem hee'aa lasage lehukko. Ixxo bikkaahim ixxi beet Salamoon adil ihukko.

²⁹Adil Daawiit adilla'n doolli aganni luxxi ammaniinsi ki'isaa lasaanchi afeebe'e Saamu'eel, Naataanii Gaadii sasem hiraagaanim kitaabbo'i aganni kitaabbuwwanne kitaabamaakko.

³⁰Ee kitaabbuwwannem Daawiit hinkid gassuda'ee hinkaa'n malaayyi ixxena hee'uda'ee ixxonne, Isra'ee'l minaadabannee mulli uulli adilluwwannee afu luwwi hundim ee kitaabbuwwanne kitaabamaa siidamookko.