Read Hadiyya 1 Agannuwwi Kitaaba 5 Bible Online

1 Agannuwwi Kitaaba 5 - Hadiyya bible

1 Agannuwwi Kitaaba 5

¹Yaaqoobina won beet hee'u Roobeel shumo'i kanniinsi woroon yoo'i keeno; Roobeel ixxi anni bakki meentichchonne iinse'u bikkina wonooma'n hanqa hoogaa hee'u bikkina oo hanqi Yooseefina uwwamukko.

²Ihona bagaan hundiinsim lophphoo malaayyaamoo sulli hundinam awwonsaanchoo ihoo manchi siidamookkok Yihuxxi sulliinsetti hee'ukko.

³Yaaqoob oosina won hee'u Roobeel soor goo'n ooso qarukko; ixxuwwim Hanookatte, Faalu'utte, Heesiroonattee Kaarimattee hee'llo'o.

⁴Qaranchiinsi qaranchi afeebe'e hee'llo'i Yoo'eel shumo'i Shamaa'iyatte, Googatte, Shiimi'attte, Miika'atte, Raa'aayatte, Ba'aalattee Erattee hee'llo'o; Aasoo'l adil Tigilaat-Phaleeseer moolli awwonsaanchi hee'u Ba'eraana amadaa qeefadaa massukko.

⁷Abaroosika summa finto'o moo'isoo doonanne siidamukkisinne Roobeel sullik moolli awwonsaan hee'llo'i keen Yoo'eelattee Zakkaaryaasattee

⁸Yoo'eel moolliinsi Shemaa'i beetina beet ihu Aazaaz beet Bela'attee hee'ukko; ku moollim hee'am hee'ukkok Aaro'eeranee eehanniinsim hanaa'n qarinne Naabo'oo Ba'aalma'oonaa afeebe'e yoo uullannetti hee'ukko.

⁹Ixxuwwim Gali'aaxxi uullanne lobakat allaachchi diinat hee'u bikkina eelliinchi firinne Efiraaxiis daajji afeebe'e yoo haraar udma'i uulla amaddo'o.

¹⁰Adil Saa'ool adilla'n doollenne Roobeel sulli Aggaar moollinne qasanta'a hundam kaa'lla'a guullito'o; Gala'aaxxi uulliinsim eelliinchi firinne hee'oo ixxuwwi hee'llam beyyuwwa hundam amaddo'o.

¹¹Gaad sulli Roobeel sulli hee'oo beyyiinsi hanaa'n qarinne hee'oo uullanne hee'am hee'ukko; oo uullim Baasaa'n uulli lambe'ennetti ihaa eelliinchi firinne Saalakanne afeebe'e afoohane.

¹²Yoo'eel hundiinsim lophphoo moollina anni hee'ukko; Shaafa'i odim la'm gardabbanne yo'i moollina anni hee'ukko. Yaa'inaayii Shaafaaxii odim Baasaananne hee'llam mulli moollina anno'i hee'llo'o.

¹³Gatto'i ka sulli anno'i Mikaa'eela, Mashulaama, Shebaa'a, Yoraa'iyya, Ya'ikaana, Zii'aa Ebeeraa yakkam lamar moollo edoohan hee'ukko.

¹⁴Ixxuwwim Huur beet ihu Aabihaayil shumo'i ikku'uuyyi ixxuwwina gaassi anno'i Abiihaayilatte, Huratte, Yaarohatte, Gala'aadatte, Mikaa'eelatte, Yeshiishaayatte, Yaahidottee Buuzattee hee'llo'o.

¹⁵Guni'i beetina beet ihu Abdi'eel beet Ahii'i ee moolli hundinam awwonsaanchi hee'ukko.

¹⁶Ixxuwwim Baasaa'n uullanne, Gala'aaxxi uullanne, ee uullanne hee'oo hoffi beero'uwwannee ee'isam Saaroo'n uullanne hixaam beyyi hundannee hee'llam hee'llo'o.

¹⁷Abaroos summa amadaakkoo ku doono'i gudukkok Yihuxxi uulli adil Yoo'aataam adilla'n doollennettee Isra'ee'l adil Yoorbi'aam adila'n doollennettee hee'ukko.

¹⁸Roobeelikii Gaadikii eelliinchi firinne hee'oo Minaas sullik kollii agirinnee bisa'innee ee'isam xiyyinnee oramakkamisa erisa losso'oo 44,760 gaadaanii ixxuwwina hee'llo'o.

¹⁹Ixxuwwim Aggaar sulli ikko'i Yaxuranninnee Naafiishaanninnee Nodaab minaadabinnee oranteena fitto'o.

²⁰Ixxuwwi amma'nnatom Waa'anne issita'a ixxi hara'mmona uunxito'o; Waa'im ixxuwwi uunxato macceesaa Aggaar mannaa ixxuwwinne hee'llo'i mulli keenoo hundam kaa'llamisa issukko.

²¹Ee Aggaar sulliinsim so'o, gaameela'a, 250,000 gereebba, 2,000 hallaa 100,000 mannaa qeefadda'a massito'o.

²²Oo or ihoo'isina Waa'i doo'l ihu bikkina diina'i kolliinsi lobakat manni lehukko. Ixxuwwi gagim qeefadanteebe'i afeebe'e oo uulli ixxuwwi anganne hee'ukko.

²³Eelliinchi firinne hee'u Minaas sullik kolli hanaa'n qarinne Ba'aalhermoona, Saniiraa Hermoo'n duunaa afeebe'e afoo Baasaa'n uullanne hee'llam hee'llo'o. Ixxuwwi minaadaphphekim xig dutukkuuyyi marukko.

²⁴Ixxuwwi moolli awwonsaanim Eferatte, Yushii'atte, Eeli'eelatte, Aazri'eelatte, Ermiyaasette, Hoodaayiwattee Yaahdi'eelattee hee'llo'o. Ku keen hundim la'anto'oo moolli awwonsaanoo geedduwwaa hee'llo'o.

²⁵Ihona bagaan Ixxuwwim ixxuwwi anno'i Waa'a hawwoddo'o. Waa'i ixxuwwi illagiinsi bi'isu ee uulli manni waa'uwwina otossimminne haashaaranto'o.

²⁶Ee bikkinam Waa'i Phuul te'im Tigilaat-Phaleeseer yakkam Aasoo'l uulli adila ki'isaa ee ixxuwwi uullaa ixxuwwi sullikam oohim Roobeel sullo, Gaad sulloo Minaas sullika kolloo qeefadaa massaa Halaahanne, Habooranne, Haaraa'annee ee'isam Goozaa'n daajji lallabonnee hee'llamisa issukko; ixxuwwim kaballi afeebe'e eekke'enne hee'llamo.