Read Hadiyya 1 Agannuwwi Kitaaba 9 Bible Online

1 Agannuwwi Kitaaba 9 - Hadiyya bible

1 Agannuwwi Kitaaba 9

¹Isra'ee'l minaadab hundim ixxuwwi abaroosinne abaroosinnem kitaabanta'a hee'llo'o; oohim Isra'ee'l adilluwwi doonanne kitaabamaakko. Yihuxxi minaadab ixxuwwi baaxii'l mashka'inne qeefadakka'a Baabiloo'n uulla massakka'a hee'ukko.

²Ixxuwwi beero'uwwannee ixxuwwi ullannee daba'llita'a waatta'a afuutto'i Qeessuwwii Leewi'i oosii Keesammi Mi'n awwaadaanii mulli Isra'ee'l oosii hee'llo'o.

³Yihudaanniinsi, Biiniyaamaanniinsi, Efreemaanniinsii Minaas sulliinsii Yerusaaleemanne hee'lleena matto'o.

⁴Yihuxxi sulliinsi Yerusaaleemanne hee'lleena matto'i abaroosik xig 690 hee'ukko. Yihuxxi beet ihu Faarees shumo'i Oomiir beet beeto Aamihud beeto Uutaaya awwonsaanchi issita'a doollito'o; mulli Faarees shumo'i Iimirattee Baani'attee hee'llo'o. Yihuxxi beet Sheelaa'i shumo'i Asaaya awwonsaanchi issita'a doo'llito'o; ixxim ixxi oosinne maqirem abaroosina awwonsaanchi hee'ukko. Yihuxxi beet Zaaraah shumo'i Yi'u'eela awwonsaanchi issita'a doo'llito'o.

⁷Biiniyaam sulliinsi Yerusaaleemanne hee'lleena matto'i abaroosik xig 956 hee'ukko. Haasanu'i beet Hoodaayiwatte, Hodaayiw beet Mashulaamatte, Mashulaam beet Saalu'utte, Yiirohaam beet Yubinaayyatte, Miikir beet beet Uuz beet Eelatte, Yubiiniiy beet Raagu'eelatte, Raagu'eel beet Shafaaxiyattee Shafaaxiy beet Mashulaamattee hee'ukko; kanniinsi hanaan weeshanto'i goo'n oos hundim abaroosina awwonsaan hee'llo'o.

¹⁰Yerusaaleemanne hee'llo'i abaroos awwonsaan qeessuwwik xig 1,760 hee'ukko; ixxuwwim Yidaa'iyatte, Yihooyaarbattee Yaakiinattee. Keesammi Minina awwonsaanchi hee'ukkok Hilqiy beet Azaaryaasatte; ixxenam gaassi anno'i hee'llo'i keen Mashulaamatte, Xaadooqatte, Maraayootattee Ahiixoobattee. Ixxi gaassi anno'im Phaashihurattee Maalkiiyattee hee'llo'o. Adii'eel beet Maa'isaayatte. Ixxi gaassi anno'im Yaahzeeratte, Mashulaamatte, Mashiilemiitattee Iimeerattee hee'llo'o. Ku keen hundim Keesammi Minenne baxamoo baxo baxxeena xantam lachchi yookeen hee'llo'o.

¹⁴Yerusaaleemanne hee'llo'i Leewi'i oos. Hashuub beet Shaamaa'iyatte; ixxekim gaassi anno'i Meeraar moolliinsetti hee'llo'i Aazirqaamattee Haashabattee. Baaqbaaqaaratte, Heereeshattee Gaalaatattee. Miikaa'i beet Maataaniyatte; ixxi gaassi anno'im Ziikrattee Asaafattee hee'llo'o. Shamaa'iy beet Abidiyatte; ixxi gaassi anno'im Gaalaalattee Yihudutattee hee'llo'o. Naxoof Beero'uwwanne hee'u Eelqaan beetina beet hee'u Asa'i beet Baraakiyatti hee'ukko.

¹⁷Yerusaaleemanne Keesammi Mine egattam hee'llo'i waardiyyuwwi Shaaluumatte, Aquubatte, Xaalmoonatte, Ahiimaanattee ixxuwwi abbaayyuwwaa hee'llo'o; ixxuwwi awwonsaanchi Shaaluumatti hee'ukko.

¹⁸Ee doolli afeebe'em eelliinchi firinne adi'l ooxxi gooca ee moolli abaroos egettam hee'llo'o; ixxuwwim illageen Leewi'i oos amba'a aagakkam ooxxi gooccuwwa egattam hee'llo'o.

¹⁹Abiyaasaaf beetina beet hee'u Qore'i beet Shaaluum Qore'i moolliinsetti ikko'i mulli qarmanninne maqirem gaassi ixxuwwi anno'i Waa'i gatti mi'n hegeego egattam hee'llo'isinnem Waa'ina otossakkam dukkaa'n woro aagakkam gooca egettam hee'llo'o.

²⁰Illagee'n doollenne gooca egeram hee'ukkok awwonsaanchi Ali'aazar beet Finihaasatti hee'ukko; Waa'im ixxenne maqire hee'ukko.

²¹Mesheleemiy beet Zakkaariyaas Waa'ina otossakkam dukkaana aagakkam gooca egeraanchi hee'ukko.

²²Aagakkam gooca egetteena doo'llanto'i waardiyyuwwi hundikim xig 212 hee'ukko. Ixxuwwim hee'llam hegeeqqis hegeeqqisinne xiganta'a kitaabanto'o; ee egeraanom ee beyyonne egettamisa issito'ok adil Daawiitattee Hiraagaanchi Saamu'eelattee hee'llo'o.

²³Ixxuwwii ixxuwwi shumo'ii Keesammi Mi'n dukkaa'n gooccuwwina egeraan hee'llo'o.

²⁴Ixxuwwim eelliinchi aagginne, eelliinchi firinne, hanaa'n qarinnee woroo'n qarinnee soorem kollinnem yoo gooccuwwa egattam hee'llo'o.

²⁵Ixxuwwi hegeegonne hee'llam ixxuwwi qarmannim lamar lamar balla egettu'uuyyi hara'mmitam hee'llo'o.

²⁶Soorem Leewi'i oosim waardiyyuwwina awwonsaan ikka'a Keesammi Mi'n woronne yoo baxxanchuwwinaa ee baxxanchuwwanne hee'oo mu'uttuwwinaa hundinam anno'i ikka'a egettam hee'llo'o.

²⁷Keesammi Mine egerimmikii dar dara ooxxi gooccuwwa fooqaa'immikii bax ixxuwwan ihu bikkina ixxuwwi gattam hee'llo'ok Keesammi Mi'n hegeegonnetti hee'ukko.

²⁸Mulli Leewi'i oos Waa'ina otossakkam ammane awwaaxxakkam mulli mu'uttuwwaa egeraan hee'llo'o; awwaadina hasisoo ammane xigga'a uwwita'a odim awwaad beeddaa lasage xigga'a aa'lla'a dissitam hee'llo'o.

²⁹Mulli keen odim mulli mu'uttuwwina, qamina, woyi'n diqasina, wee'l zaytina, aduruusinaa mulli annanni annanni ihaakkoo enjuwwinaa hundinam anno'i ikka'a egettam hee'llo'o.

³⁰Ihukkaarem shitto'o gudisimmik bax xale'i qeessuwwan hee'ukko.

³¹Qooraah moolliinsi Shaaluumina won beet ihu Maatiitiy kitimina ihoo daabbo'o gudisaanchi hee'ukko.

³²Qa'aat moolli abaroos odim Keesammi Minenne usheexxaxxi ayyaamonne hincoo daabbo'ina gudisaan hee'llo'o.

³³Leewi'i oos abaroosiinsi kolli odim Keesammi Minenne zammattam hee'llo'o; ee abaroosikim awwonsaan hiimoo ballaa hundam awwaaddam bikkina Keesammi Mi'n ooxxi woronne hee'oo minneewwanne hee'llam hee'llo'o; ixxuwwi mulli awwaado maham awwaaddam hee'llo'oyyo.

³⁴Ku Leewi'i oosik abaroos hundim awwonsaan hee'llo'o; ixxuwwim ixxuwwi sullisinne awwonsaan ikka'a Yerusaaleemanne hee'llam hee'llo'o.

³⁵Yi'ii'eel Gaba'oon beero'o baxaa eekke'enne hee'am hee'ukko; ixxi meentichchokim summi Maa'ikatti ihukkuuyyi

³⁶ixxi won beet summim Aabdoona yakkaman hee'ukko; mulli ixxi goo'n oosikim summi Xuuratte, Qiishatte, Ba'aalatte, Neratte, Naadaabatte,

³⁷Gaadooratte, Ahiyotte, Zakkaariyaasattee Shiimii'i anni Miiqlotattee hee'llo'o.

³⁸Ixxuwwi shumo'im mulli ixxuwwi moolli abaroosinne gadanonne Yerusaaleemanne hee'llam hee'llo'o.

³⁹Neer Qiisa qarukko; Qiis adil Saa'oola qarukko; Saa'oolim Yoonaataana, Maalkiishu'a, Abiinaadaabaa Eshbaa'aalaa soorem goo'n oosom qarukko.

⁴⁰Yoonaataanim Mariibaa'aala qarukko; Mariibaa'aalim Miika'a qarukko.

⁴¹Miikim Phiitona, Meeleeka, Taare'aa Akaazaa soor goo'n ooso qarukko.

⁴²Akaazim Yaa'iira qarukko; Yaa'iirim Aalemata, Aazmaaweetaa Zimiiraa sas goo'n ooso qarukko; Zimiirim Mooxa qarukko.

⁴³Moox Biini'a qarukko; Biini'im Raafaaya qarukko; Raafaay Eeli'aasaana qarukko; Eeli'aasaanim Axeela qarukko.

⁴⁴Axeelim Aazriiqaama, Bookaara, Isma'eela, Sha'aariya, Abdiyoo Hanaanaa loh goo'n ooso qarukko.