Read Hadiyya 2Agannuwwi Kitaaba 10 Bible Online

2Agannuwwi Kitaaba 10 - Hadiyya bible

2Agannuwwi Kitaaba 10

¹Oroobi'aama adil issiteena hassam hanaa'n qaranne hee'llam Isra'ee'l minaadab Seekeemanne wixxita'a egetta'a hee'llo'i bikkina ixxi ee beyyo marukko.

²Adil Salamooniinsi gibaa Gibxa maraa hee'u Naabaax beet Yoorbi'aam ka woshsha macceesaa Gibxiinsi daba'llaa Isra'ee'l uulla waarukko.

³Ixxom hanaa'n qarinne hee'llam Isra'ee'l sulluwwi weeshisso'o. Ixxuwwim Yoorbi'aaminne maqirem Oroorbi'aam beyyo hincita'a

⁴«Kiyyanni neesenne kee'mmaalli gaanjaqqa iyyiisaakko; ee bikkina at ee kee'mmaalli gaanjaqqaa gassi ijaajoo niinniinsi sholliissilas neese kiina ijaajammoommo» yito'o.

⁵Oroobi'aamim «Sas balliinsi lasage daba'llitakka'a waallehe» yukko. Ee bikkina ixxuwwi daba'llita'a matto'o.

⁶Ee lasage adil Oroobi'aam «Ka mannina an mah dabachcha uwwona soggakkamo?» yaa ixxi anni Salamoon hee'u doollenne awwaaddam hee'llo'i lommanna a'llansukko.

⁷Lommannim «At ixxuwwina eroomma issittaa'lleensii ixxuwwi xa'mmichchinam laboo dabachcha dabattaa ixxuwwa liiransittaa'lleensii ixxuwwi kiina hundi ammanem ijaajantamo» yito'o.

⁸Ihukkaarem Oroobi'aam lommanni soggo'i woshsha uraa ixxi beshaa ixxena awwaadaan ikko'i harde'i woraadaa a'llansukko.

⁹Ixxuwwam «Kiyyanni neesenne iyyiisu gaanjaqqa sholliise» yitam ka manna maha issona eese soggakkamo?» yukko.

¹⁰Oo woraadim «Kiyyanni neesenne kee'mmaalli gaanjaqqa iyyiisaa hee'ukko. Ihukkaarem at kaba ni haniinsi sholliise yitam mannina ‹iikki hoffi maxxaachchi iyyanni lamadiinsi buuphphookko.

¹¹Iyyanni kee'mmaalli gaanjaqqa ki'nnuwwanne iyyiisaakko. Ihukkaarem an lonsaa kee'mmisoommo; iyyanni ki'nnuwwa halanginne loodaakko; ihukkaarem an ginxi halanginne ki'nnuwwa loodoommo› yihe» yito'o.

¹²Adil «Sas balliinsi lasage daba'llitakka'a waallehe» yukkisannem Yoorbi'aamii oo mannii Oroobi'aam beyyo waatto'o.

¹³Adil Oroobi'aam lommanni uwwu sogitano gadaa minaadaba quuqisoo woshsha wocimma asheerukko.

¹⁴Ixxim woraadduwwi kutto'i sogitano aa'aa «Iyyanni ki'nnuwwanne kee'mmaalli gaanjaqqa iyyiisaa hee'ukko. An odim gaanjaqqi lobakata kee'mmoo'isa issoommo. Iyyanni ki'nnuwwa halanginne loodaa hee'ukko. Ihukkaarem an ginxi halangiinne loodoommo!» yukko.

¹⁵Eehid ihu mashka'im Seelo'iinsi waaru hiraagaanchi Akiiyinne Naabaax beet hee'u Yoorbi'aam bikkina Waa'i wocu sagar wo'mmoo'isinatte. Adil Oroobi'aamim minaadaphphi sawwite aa'imma sabukkok ee bikkinatti hee'ukko.

¹⁶Isra'ee'l minaadab adil Oroorbi'aam ixxuwwi xa'mmichcha aa'ubee'isa moo'llo'i ammanenne «Niina Daawiitinne maqire mah berechchi yookko? Issayyi beetinne maqirdu niina mah edanchi yookko? Isra'ee'l minaadaba, ki mine elle'e! Daawiita ki mine ege'lle!» yita'a dabatto'o. Ee bikkina Isra'ee'l minaadab ixxi gaqqi minem marukko.

¹⁷Oroobi'aamim xale'i Yihuxxi uullanne hee'llam Isra'ee'l minaadabina adil ihukko.

¹⁸Ee lasage adil Oroobi'aam malaayyi baxo baxxam keeno baxisaanchi hee'u Adooniiraama Isra'ee'l minaadaphphi beyyo asse'ukko. Ihukkaarem ixxuwwi kininne aphphissa'a shito'o. Ee ammanenne Oroobi'aam faraxxi gaarre'enne qaqqisaa saa'llaa Yesusaleema gibaa xorukko.

¹⁹Ee ammaniinsi ki'isaa hanaa'n qaranne hee'oo Isra'ee'l minaadab kaballi afeebe'e Daawiit shumo'onne bangujjukkuuyyi yookko.