Read Hadiyya 2Agannuwwi Kitaaba 11 Bible Online

2Agannuwwi Kitaaba 11 - Hadiyya bible

2Agannuwwi Kitaaba 11

¹Adil Oroobi'aam Yerusaaleema afaa lasage Yihuxxi sulliinsii Biiniyaam sulliinsii mat xibbee sadeentayyi kum doo'llanto'oo gaadaanoo weeshaa wixxaa'ukko. Eehid issu mashka'im Isra'ee'l shumo'inne oramaa ixxuwwi uulla dabaraa ixxi anganne isseena sawwaa hee'u bikkinatte.

²Ihukkaarem Waa'ik sagar Waa'i manchi hee'u Shamaa'iyina

³Salamoon beetina «Yihuxxi adil Oroobi'aaminaa ee'isam Yihuxxaannonnee Biiniyaa'm uullannee hee'oo Isra'eel hundinamii

⁴Waa'i ‹Kuk iinniinsetti ihu bikkina ki'nnuwwina abbaayyuwwinne orantakkotte. Ki'nnuwwi annannichchim ki'nnuwwi minem daba'llitakka'a mallehe› yoolla» yoo sagar waarukko. Ee bikkina Waa'i sagarina ijaajanta'a Yoorbi'aaminne oranteena marimma utta'a ixxuwwi minem matto'o.

⁵Oroobi'aam ixxi heechchi beyyo Yerusaaleemanne issaa Yihuxxaannonnee Biiniyaam uullannee girbuwwa baxukko.

⁶Oo beero'uwwim Beetaliheema, Eexaama, Taqo'a,

⁷Beetxuura, Soka, Adulaama,

⁸Gaata, Maareesha, Ziifa,

⁹Adooraayima, Laakiisha, Aazeeqa,

¹⁰Xoo'aara, Ayaaloonaa Keebiroonaa yamantam keen hee'llo'o.

¹¹Yoorbi'aam ee girbuwwa qoxxisaa girbukko. Ee girbuwwinam awwonsaano doo'llaa hurbaata, wee'l zaytaa woyi'n diqaasaa

¹²ee'isam agiraa bagadoo tuubukko. Ee beero'uwwam lobakata qoxxisukko; ee'isinne Yihudikaa Biiniyaam sullikaa uulla ixxi gulummi issukko.

¹³Qeessuwwii Leewi'i oosii Isra'ee'l uullanne hee'llam beyyi hundiinsim woroo'n qaranne yoo Yihuxxi uulla waatto'o.

¹⁴Yoorbi'aamii ixxi oosii qeessuwwi ikka'a Waa'ina awwaaddam Leewi'i ooso hollito'i bikkina Leewi'i oos ixxuwwika allaachchi biiraa ixxuwwi amaxxaa utta'a Yihuxxi uullaa Yerusaaleemaa waatto'o.

¹⁵Yoorbi'aamim duunnuwwanne otossakkam beyyuwwannee ee'isam habusinaa addichchi misi'l kobi'llanne baxu qophpha'n waa'uwwinaa awwaaddam ixxi gaqqi qeessuwwa doo'llukko.

¹⁶Ee bikkina Isra'ee'l Moollanni Waa'a ixxuwwi wo'm wodaninne hassam keen hundem Isra'ee'l sulliinsim feeranta'a ixxuwwi gaassi anno'ina Moollanni ihu Waa'ina kitima hincaa'lleena Leewi'i ooso awwonta'a Yerusaaleema waatto'o.

¹⁷Ee'isinne Daawiitikaa Salamoonikaa er kobi'lla awwonta'a sas hiincho hundoomam Yihuxxi adillano qoxxisso'o; Salamoon beet oroobi'aaminam har'mmito'o.

¹⁸Oroobi'aam Maahalaata yakkam meentichcho eebukko. Is annikim summi Yaariimoota yakkaman ihukkuuyyi ixxim Daawiit beet hee'ukko. Is amam Abiyaahile yakkamotan ikka'a Issayyena beet beet hee'u Eeli'aabina landichchotte hee'llo'o.

¹⁹Isem Oroobi'aamina Yi'uusha, Shamaariyaa Zaahaamaa yakkam sas goo'n ooso qatto'o.

²⁰Hofqax ammaniinsi lasge odim Oroobi'aam Ma'ika yamantam Abeseloom landichcho eebaa Abiya, Ataaya, Ziizaa Saloomiitaa yamantam soor goo'n ooso qarukko.

²¹Oroobi'aamina tommii sadeenti meentii lohayyi bakki meentii hee'ukko. Ixxuwwiinsim lamiyyee sadeenti goo'n oosoo lohayyi landaa qarukko. Ixxi meentiinsii bakki meentiinsii hundiinsim lonsaa Abeseloom landichcho Ma'ika iittam hee'ukko.

²²Oroobi'aam Ma'ik beeto Abiya adil isseena hasu bikkina ixxi oos hundinam awwonsaanchi issukko.

²³Oroobi'aam qooroominne ixxi goo'n ooso hundam Yihuxxaannonnee Biiniyaa'm uulluwwannee ee'isam girbamaakkoo beero'uwwannee hundannem awwonsaan issukko. Ixxuwwina hasisoo luwwi hundam lonsaa uwwukko. Lobakat meentom ixxuwwina eebukko.