Read Hadiyya 2Agannuwwi Kitaaba 12 Bible Online

2Agannuwwi Kitaaba 12 - Hadiyya bible

2Agannuwwi Kitaaba 12

¹Oroobi'aam ixxi adillano qoxxaallisa uullisaahii malaayye siidaahii lasage ixxii Isra'ee'l minaadabii hundim Waa'i seera egerimma utto'o.

²Ixxuwwim Waa'ina amma'nnantobee'i bikkina Oroobi'aam adil ihu onti hiinchonne Gibxi uulli adil Shiishaaq Yerusaaleemanne weerarukko.

³Ixxim Gibxiinsi 12,000 faraxxi gaarre'e, 60,000 faradaanoo ee'isam Liibiyika, Sukikaa Tophphe'ikaa dut gaadaanoo amadaa waarukko.

⁴Yihuxxekam girbamaakkoo beero'uwwa hundam amadukko. Yerusaaleem afeebe'em waarukko.

⁵Ee lasage hiraagaanchi Shamaa'iy Oroobi'aaminaa Shiishaaqa baddita'a Yerusaaleemanne wixxito'i Yihuxxi awwonisaaninaa Waa'i ‹Eese uttakko'i bikkina anim Shiishaaqina ki'nnuwwa higisaa uwwaammo› yoolla» yukko.

⁶Adil Yoorbi'aamii Yihuxxi manna awwonsaanii «Waa'i muccura» yita'a ixxuwwi gaga heeshaa'llo'o.

⁷Waa'im ixxuwwi gaga heeshaa'llo'isa moo'u ammanenne hiraagaanchi Shamaa'iyina «Ixxuwwi gaga heeshaa'llo'i bikkina an ixxuwwa gatisoommo bagaan bi'isoommoyyo. I quunqam Shiishaaqinne ihaa Yerusaaleemanne dilliisoommoyyo.

⁸Ihukkaarem iina ijaajanchannee uulli adilluwwina ijaajanchannee yoo annannaato annanni issita'a laqqeebe'e Shiishaaq ixxuwwa gassookko» yukko.

⁹Ee bikkina Gibxi adil Shiishaaq Yerusaaleemanne weeraraa Keesammi mi'nnekaa adi'lla'n mi'nnekaa amaxxaa ee'isam adil Salamoon worqinne baxisu agilluwwaa hundam bogaa massukko.

¹⁰Adil Oroobi'aam Shiishaaq massu agilluwwi bikkenne mulli agilluwwa naas xaarinne baxisaa adilla'n mi'n ooxxi gooca egettam waardiyyuwwi ijaajaanonne uwwukko.

¹¹Adil Keesammi Mine waaroo ammane waardiyyuwwi ee agilluwwa amadda'a awwontam hee'llo'o. Adil maraa lasonnem dabatta'a waardiyyuwwi minenne dissitam hee'llo'o.

¹²Yoorbi'aam ixxi gaga heeshaa'u bikkina Waa'i quunqi ixxeensi daba'llukko; guullaahim bi'isukkoyyo. Yihudannem er luwwi hee'ukko.

¹³Adil Oroobi'aamik adillan Yerusaaleemanne qoxxukko; ixxi adil ihu ammane umur soree mat hiinchoo ihaa hee'ukko. Waa'i ixxak summi eehe'enne hee'oo'isina Isra'ee'l uulli hundiinsim doo'llu Yerusaaleemanne afuuraa tommoo lamar hiinchoo gassukko. Ixxi amakim summi Naa'imatti ihaa isem Amoo'n uullitane hee'llo'o.

¹⁴Oroobi'aam Waa'a ixxi wodaninne guullaa hasubee'i bikkina jor baxo baxukko.

¹⁵Adil Oroobi'aam ixxi adi'lla'n doollenne baxu luwwi hundim luxxaanniinsi ki'isaa lasaanchi afeebe'e hiraagaanchi Shamaa'iy kitaabu aganni doonannee hiraagaanchi Iido'i kitaabu shumo'i agannannee kitaabamaakko. Oroobi'aamii Yoorbi'aamii ixxuwwi doollenne amman hundam orantam hee'llo'o.

¹⁶Oroobi'aamim ixxi anno'isam lehukko. Daawiit beero'onnem waammamukko. Ixxi beyyonnem ixxi beet Abiy adil ihukko.