Read Hadiyya 2Agannuwwi Kitaaba 13 Bible Online

2Agannuwwi Kitaaba 13 - Hadiyya bible

2Agannuwwi Kitaaba 13

¹Yoorbi'aam Isra'eelanne adil ihu tommonnee sadeenti hiinchonnee Abiyyi Yihuxxi uullanne adil ihukko.

²Ixxi heechchi beyyom Yerusaaleemanne issaa sas hiincho adil ihukko. Ixxi amam Miikaayaa yamantam ixxek qaranchi Giibiy beero'iinsette ihoo Uri'eel landichchotte hee'llo'o. Abiy lambe'ennee Yoorbi'aam lambe'ennee or hee'ukko.

³Abiy doo'llanto'oo 400,000 geedduwwinne gaadukko. Yoorbi'aamim 800,000 geedduwwinne gaadukko.

⁴Abiy duunaam Efiree'm uullanne yoo Xamaaraayim duunanne firaa ixxeka sagara iimaa'aa «Yoorbi'aamii Isra'eelii macceessehe!

⁵Daawiitii ixxi shumo'ii Isra'eelanne heer heerina adil ihamoohan ihukkisa gindamoobee'i sooqixxi hidiro aagukkisa laqqakkammoyyonnihe?

⁶Ihukkaarem Salamoonina awwaadaanchi hee'u Naabaax beet Yoorbi'aam ixxi moollannanne bangujjukko.

⁷Salamoon beet Oroobi'aam ooshshichchi ihaa maham isseenaa ixxuwwinne uullixxameenaa xanoobee'i ammanenne Yoorbi'aam boqquwwaa awwaad bee'i keenoo wixxaa'aa ixxonne ki'ukko.

⁸Kabadem ki'nnuwwi Waa'i Daawiit Shumo'ina uwwu Adillanonne bangujjitakkeena qooddakko'ookko. Eehanninam lobakat o'l gogotaa Yoorbi'aam ki'nnuwwina worqinne baxisu addichchi misilaa amaddakka'a waattakko'ookko.

⁹Qeessoomaninne Waa'ina awwaaddam Aaroon oosoo Leewi'i oosoo hollitakko'ookko. Ixxuwwi bikkennem mulli minaadab issitamisam ki'nnuwwi gagina qeessuwwa doo'llitakko'ookko. Mat labeenaa lamar gereebbi ambulluwwaa amadaa ixxi gaga keeseena ki'nnuwwi beyyo waaroo ayyem ki'nnuwwi qophpha'n waa'uwwina qeessechchi issitakkamuulla.

¹⁰Ihukkaarem niina ni Waa'i Moollanna! Neesem ixxo ullummoyyo. Waa'ina awwaadu'uuyyi yo'i qeessuwwi Aaroon ooso; ixxuwwina hara'mmitam keenim Leewi'i ooso.

¹¹Hundi ammanem daraa maaro'oo Waa'ina shokkiisakka'a hicaa'akkam kitimaa er enji yoo aduruusaa kitim issita'a hincaa'llamuulla. Muccur xaraphpheezannem daabbo'o hincaa'llamuulla. Hundi ammanem worqinne baxamaakkoo caakka dissakkam beyyonne yoo kuraazzuwwa maaro'o maaro'o caakkissamuulla. Neesem ni Moollanni Waa'ika ijaajo egelloommo. Ihukkaarem ki'nnuwwi Waa'a uttakko'ookko.

¹²Waa'i niinninnette; niina awwonsaanchim ixxotte. Xurumba amaddo'i Waa'ik qeessuwwi ki'nnuwwanne o'l sagara macceesissammo. Isra'ee'l ooso! Hore'em kaa'llakkeena xantakkambee'i bikkina ki'nnuwwi anno'i Moollanni Waa'inne orantakkotte» yukko.

¹³Ihukkaarem Yoorbi'aam ixxi gogotiinsi kollo Yihuxxi manni gogotiinsi afaree'n kollinne dugga'a egettamisina asse'ukko. Kollo odim Yihuxxi manni gogoxxi illaginne orantamisa issukko.

¹⁴Yihuxxi gogotim ixxuwwi kululleeta moo'lla'a kibbanto'isa laqqa'a lasage Waa'i kollonne laatto'o. Qeessuwwim xurumba fuggo'o.

¹⁵Yihuxxi gogotim orina sha'llantu'uuyyi shuutto'o; Waa'im Yoorbi'aamaa Isra'ee'l gogotaa Abiyaannonnee Yihuxxi gogoxxi illagennee aphphisukko.

¹⁶Isra'ee'l gogotim Yihuxxi gogoxxi illagiinsi gibbo'o. Waa'im Isra'eela Yihudina higisaa uwwukko.

¹⁷Abiy ixxi gogotinne maqirem Isra'ee'l ooso kaa'aa kee'mmaa'llisa hawwodantamisa issukko. Ee oranne Isra'eeliinsi 500,000 la'anto'oo gaadaan leto'o.

¹⁸Yihuxxi minaadabim ixxuwwi anno'i Moollanni Waa'anne amma'nnanto'i bikkina kaa'llo'o; Is'raa'eelim sholle'llo'o.

¹⁹Abiy Yoorbi'aam gogota fiikkisukko; Beeti'eela, Yishaanaa Efiroonaa yakkam beero'uwwam ixxuwwi kululleetanne hee'oo hegeegguwwinne kaa'aa amadukko.

²⁰Ee lasage Yoorbi'aam Abiy adilla'n doollenne od malaayye siideena xanukkoyyo. Lasaanchonnem Waa'i ixxo aphphisu bikkina lehukko.

²¹Ihukkaarem Abiy wodukkuuyyi marukko. Ixxim tommoo soor meentoo eebaa lamiyyee lam goo'n oosoo tommoo loh landaa qarukko.

²²Adil Abiy mulli aganni, wocu sagarii baxu baxii hundim hiraagaanchi Iido'i aganni kitaabanne kitaabamaakko.