Read Hadiyya 2Agannuwwi Kitaaba 14 Bible Online

2Agannuwwi Kitaaba 14 - Hadiyya bible

2Agannuwwi Kitaaba 14

¹Adil Abiy ixxi anno'isam lehukko. Daawiit beero'onnem waammamukko. Ixxi beet Asa'am ixxi bikkenne adil ihukko. Ixxi adilla'n doollennem tommi hiinchina uullanne xummi ihukko.

²Asa'am ixxi Moollanni Waa'i illagenne danaamoo xabbeenaa ihaakkoo luwwa issukko.

³Qophpha'n waa'uwwina kitimakkam beyyuwwaa duunnuwwanne otossakkam beyyuwwaa gindukko. Otossakkeena baxakko'i ki'n utubbuwwa iiqansukko. Asheera yakkam qophpha'n waa'i misilluwwam muransaa uunjukko.

⁴Asa'a Yihuxxi minaadab ixxuwwi anno'i Moollanni waa'i doo'lla issitonaa seeraa ijaajoo egettonaa ijaajukko.

⁵Duunnuwwanne hee'oo otossakkam beyyuwwaa aduruusa wiriissakkam kiti'm beyyuwwaa Yihuxxi beero'uwwiinsi hundiinsim bi'isu bikkina ixxi adilla'n doollenne xummi lophphaa hee'ukko.

⁶Uullanne xummi hee'u bikkina Yihuxxi uulli beero'uwwina girbuwwa baxukko. Waa'im xumma uwwaa hee'u bikkina ee doollenne or hee'ukkoyyo.

⁷Asa'am Yihuxxi minaadabina «Ka beero'uwwa banxona; kininnem oontaa qoto'akka'a egerakkam beyyuwwa, gooccuwwaa qirqire'uwwaa axinsona. Ni Moollanni Waa'ika doo'lla issinummi bikkina oono'o kaba ku uulli ni angannette. Neese ixxo hansummo; ixxim hundem koollinnem niina xumma uwwaakko» yukko. Ee bikkina baxxo'o; hundem luwwim taaphanukko.

⁸Asa'ana agirinnee bagadinnee orantam 300,000 Yihuxxi gogotii agira amadda'a xiyya chokkottam 28,000 Biiniyaam sulli gaadaanii hee'llo'o. Kukeen hundim qoxxaalli gaadaan hee'llo'o.

⁹Zeeraaha yakkam mat Tophphe'i manchi mat miliyoon gaadaanoo sas xibbi faraxxi gare'ee amadaa Yihuda qaseena Maareesh afeebe'e waarukko.

¹⁰Asa'am ixxenne orameena firukko. Maareesh gadanonne yoo Xaafaat cebbanne beyyi beyyo amadda'a orina guddo'o.

¹¹Asa'am «Waa'a, at malaayyaam gogoxxi angiinsi hoogaano gatissoohane. Ni Moollanni Waa'a, neese keesenne amma'nnammummi bikkina niina hara'mme. Ka xigo dut ihu gogotinne orammeena ki summinne waallaammo. Moollanna, at niina Waa'a; kiinninne uullixxameena xanoo ayyim bee'e» yaa ixxi Moollanni Waa'a uunxukko.

¹²Waa'im Asa'aannonnee Yihuxxi illagennee Tophphe'i gogota aphphisukko. Tophphe'i gogotim gibukko.

¹³Asa'aa ixxi gogotii Geeraar afeebe'e hollito'o. Waa'i illagennee ixxi gogoxxi illagennee kaa'amu bikkina Tophphe'i gogot beeddukko. Yihuxxi gogotim lobakat qeefado'o boggo'o.

¹⁴Waa'i Geeraa'l hegeegonne hee'oo beero'uwwi manni baa'oo'isa issu bikkina ixxuwwi ee beero'uwwa hundam bi'isso'o. Ee beero'uwwam bogga'a lobakat luwwa massito'o.

¹⁵Ee'isam diinaxxeka oottuwwa gindito'o; lobakat gereebba, fella'aa gaameela'aa qeefaddo'o. Ee lasage Yerusaaleema daba'llito'o.