Read Hadiyya 2Agannuwwi Kitaaba 16 Bible Online

2Agannuwwi Kitaaba 16 - Hadiyya bible

2Agannuwwi Kitaaba 16

¹Asa'a adil ihu sadennee loh hiinchonnee Isra'ee'l adil Baa'iish Yihudanne weerarukko. Ayyim adil Asa'i uulliinsi aageenaa fireenaa xanoobee'isa Raama'a girbukko.

²Asa'am Keesammi Mi'nnaanniinsii ixxi adilla'n mu'uxxi miniinsii kin biraa worqaa fissaa Damaasqo'onne ihaa gassoo Sooriy adil Beenihaadaadina asse'ukko.

³Asa'am «Iyyannaannonnee kiyyanni lambe'ennee hee'u hidi'l saga'llisam anii atii hiraaqqi sagara aangona. Oono'o an kiina kin biraa worqaa asse'aammo. Ee bikkina Isra'ee'l adil Baa'iish ixxi gaadaano i uulliinsi fissona ixxenne yoo hidi'l sagara ginditoo'isina uunxoommo» yukko.

⁴Beenihaadaadim adil Asa'i sawwitenne iittamaa ixxi gaaxxi awwonsaano Isra'ee'l beero'uwwa qassona asse'ukko. Ixxuwwim Iiyoona, Daana, Abeelbeetmaa'ikaa Niftaalee'm uullanne mu'uta dissakkam beero'uwwaa hundam kaa'lla'a amaddo'o.

⁵Baa'iishim eekka macceesaa Raama'anne baxeena amadaa hee'u girba baximma uullisukko.

⁶Ee lasage adil Asa'a Yihuxxi manna wixxaa'ukko; Baa'iish Raama'anne girbeena amadu kinaa haqqaa gugguussiisaa Geeba'ikaa Misiphphi beero'uwwaa girbukko.

⁷Ee ammane hiraagaanchi Hanaan adil Asa'i beyyo waaraa «Ki Moollanni Waa'anne amma'nnancha uttaa Sooriy adilanne amma'nnantitti bikkina Sooriy gogot ki angiinsi xoraakko.

⁸Tophphe'i minaadabinaa Liibiy minaadabinaa lobakat faraxxi gaarre'ii faradaanii hee'ukkoyyonnihe? Ihona bagaan ee ammane Waa'anne amma'nnitti bikkina Waa'i ixxuwwa kaa'lloo'isa issukko.

⁹Ixxuwwaanninne wo'm wodaninne ixxonne amma'nnitam keeno hara'mmeena Waa'i heer uulla hundam moo'ookko. Ihukkaarem at qawwoo'm baxo baxxi bikkina or kiinniinsi qee'llooyyo» yukko.

¹⁰Ee bikkina Asa'a ee hiraagaanchonne lobakata quuqaa karaxxi mine aagisukko. Ee ammaniinsi ki'isaa adil Asa'a minaadaphpheka mat mat keeno monginne barche'e issukko.

¹¹Asa'i adilla'n doollenne asheeroo'iinsi ki'isaa goollo'i afeebe'e baxamu luwwi hundim Yihuxxaannonnee Isra'ee'l adilluwwi aganni kitaabannee kitaabamaakko.

¹²Asa'a adil ihu sadennee honsi hiinchonnee ixxek lokki lobakata xissukko. Ee xissinam qaraa'l manna hasukko bagaan Waa'iinsi hara'mmato hasukkoyyo.

¹³Asa'am adil ihu sorennee mat hiinchonnee lehukko.

¹⁴Ixxi leeshannem annanni annanni enjaa shitto'oo labakka'a Daawiit beero'onne ixxi gagim lob kiniinsi fere'isaa baxisaakkoo waammanne waammakko'o. Ixxi lombi bikkinam lobakat haqqa tuubakka'a giirakku'uuyyi kee'mmaalli wi'llo wi'llakko'o.