Read Hadiyya 2Agannuwwi Kitaaba 17 Bible Online

2Agannuwwi Kitaaba 17 - Hadiyya bible

2Agannuwwi Kitaaba 17

¹Asa'i beyyonne ixxi beet Yoosaafix adil ihukko. Isra'ee'l minaadaba qaseenam ixxi malaayye qoxxisukko.

²Girbamaakkoo Yihuxxi beero'uwwaa ixxi anni Aasa'a kaa'aa amadu Efireem uulli beero'uwwaa gaadaan egettamisa issukko.

³Ixxi adilla'n asheero'onne ixxi anni Daawiitika er kobi'lla awwonu bikkina Waa'i Yoosaafixinnetti hee'ukko. Ixxim Ba'aala yakkam qophpha'n waa'a awwonukkoyyo.

⁴Ihukkaarem ixxi annika Waa'a hasukko; ixxi ijaajom egerukko. Isra'eel baxam hee'u jor baxom baxukkoyyo.

⁵Waa'im adillano ixxena qoxxisukko; Yihuxxi minaadabim Yoosaafixina irifo'o eebukko; ixxim amaxxaamoo lombaamoo ihukko.

⁶Waa'am ixxi wodaninne guullaa awwonukko. Ee'isam duunnuwwanne otossakkam beyyuwwaa Asheera yakkam qophpha'n waa'i misilluwwaa Yihudiinsi bi'isukko.

⁷Yoosaafix adil ihu saxxi hiinchonne Beenhayila, Abdiya, Zakkaariyaasa, Naatinaa'eelaa Mikkiyaasa yakkam ixxi gassaanoo Yihuxxi beero'uwwanne losissona asse'ukko.

⁸Ixxuwwinne maqirem Shamaa'iya, Naataaniya, Zabaadiya, Asaaheela, Shamiraamoota, Yihoonaataana, Adooniya, Xoobbiyaa Xobaadooniyaa yamantam Leewi'i oosoo, Eeliishaamaa'aa, Yihooraamaa yamantam qeessuwwaa edaa asse'ukko.

⁹Ixxuwwim Waa'ika See'l Kitaaba amadda'a matta'a Yihuxxi uullanne losissam hee'llo'o; Yihuxxi uulli beero'uwwanne hundannem daba'llantu'uuyyi minaadaba losissam hee'llo'o.

¹⁰Yihuxxi uulli kululleetanne hee'oo adilluwwi hundim baa'oo'isa Waa'i issukko; ee bikkina Yoosaafiixinne oranto'oyyo.

¹¹Filisxee'm manniinsi mat mat keen irifo'oo gibirina kin biraa Yoosaafiixina uwwitam hee'llo'o. Araphphi uulli mannim ixxuwwi diinaxxi allaachchiinsi 7,700 gereebbikaa 7,700 fella'ikaa ambulluwwa eebba'a uwwitam hee'llo'o.

¹²Yoosaafiixim malaayyaamoo hore'em lombaamoo ihukko. Yihudannem girbuwwaa mu'uttuwwa tuubakkam beero'uwwaa baxukko.

¹³Ixxi Yihuxxi uulli beero'uwwanne dut baxo baxukko; Yerusaaleemannem lachchi yoo gaadaano dissukko.

¹⁴Oo keenim ixxuwwi abaroos abaroosisinne kanniinsi woroon yo'i keeno. Yihuxxi shaalaqquwwi ijaajaanchi Adiinatti ihaa ixxennem 300,000 gaadaan hee'llo'o.

¹⁵Ixxeensi awwonaa yoo ijaajaanchi Yahoohaanaannatti ihaa ixxennem 280,000 gaadaan hee'llo'o.

¹⁶Yahoohanaaniinsi awwonaa ixxi gaqqi doo'llinne ixxi gaga Waa'ina annanni issu Ziikir beet Amaasiyatti ihaa ixxennem 200,000 gaadaan hee'llo'o.

¹⁷Biiniyaamiinsi malaayyaam gaadaanchi ihu Eeliyaada'atti ihaa ixxennem xiyyaa agiraa lade'llo'oo 200,000 gaadaan hee'llo'o.

¹⁸Ixxo awwonaa odim Yahoozaabaadatti ihaa ixxennem 180,000 orina guddo'oo gaadaan hee'llo'o.

¹⁹Ku keen girbamaakkoo Yihuxxi beero'uwwanne hundannem adil dissu keeniinsi mulli keen ikku'uuyyi adilina awwaaddam hee'llo'i keeno.