Read Hadiyya 2Agannuwwi Kitaaba 18 Bible Online

2Agannuwwi Kitaaba 18 - Hadiyya bible

2Agannuwwi Kitaaba 18

¹Yihuxxi adil Yoosaafix amaxxinnee lombinnee la'amaakkoohan hee'ukko. Aki'aab abaroosinnem balluwwi moolloom hee'ukko.

²Hofqax hiinchiinsi lasage Yoosaafix Aki'aaba moo'eena Samaare'e marukko. Aki'aabim ixxenaa ixxenne maqire hee'u manninaa lobakat gereebbaa mirgo'uwwaa durukko. Raamoot Gala'aadanne maraa ixxenne maqire weerarona atoorassukko.

³Isra'ee'l adil Aki'aab Yihuxxi adil Yoosaafiixa «Raamoot Gala'aadanne iinninne maqire weerattoohonnihe?» yaa xa'mmukko. Yoosaafixim ixxena dabaraa «Anii atii mato; i minaadab ki minaadaphphisame; kiinninnem weeraroommo.

⁴Ihukkaarem Yoosaafix odim Isra'ee'l adilina gaassitaa Waa'ika doo'lla hase» yukko.

⁵Ee bikkina Isra'ee'l adil soor xibbi hiraagaano wixxaa'aa «Iraamoot Gala'aadanne weeraronnii uroo?» yaa xa'mmukko. Ixxuwwim «Waa'i ki anganne higisaa uwwoo bikkina mare» yita'a dabatto'o.

⁶Ihukkaarem Yoosaafix «Odim xa'mminoommi mulli hiraagaanchi ka beyyonne bee'ennihe?» yaa xa'mmukko.

⁷Isra'ee'l adilim Yoosaafixina «Waa'a xa'mminoommi mat mulli hiraagaanchi yookko. Ihukkaarem ixxi iina hinki ammanem joriinsi bagaan eroomma hiraagoobee'i bikkina an ixxo ha'yyoombee'ane. Ixxim Yimiil beet Mikkiyaasatte» yaa dabarukko. Yoosaafixim «Adil eehid yimmi hasisooyyo!» yukko.

⁸Ee bikkina Isra'ee'l adil ixxi gassaaniinsi mato weeshaa «Yimiil beet Mikkiyaasa qaqqissaa i beyyo wore» yaa ijaajukko.

⁹Ee ammane lamem adilluwwim adilla'n eddechcha edde'lla'a Samaare'i ooxxi gooc gadanonne biiree'n kollinne hee'oo oodo'onne annichchi annichchi adilla'n barcumannem afuutta'a hee'llo'o. Hiraagaan hundim ee adilluwwi illagennette ikka'a hiraago woccam hee'llo'o.

¹⁰Ee hiraagaaniinsim mat hee'u Kanaa'in beet Sedeeqiyaas xaarinne buudo baxaa adil Aki'aabina «Waa'i ‹Ka buudduwwinne Sooriy manni beedditeebe'e qassootto› yoolla» yukko.

¹¹Mulli hiraagaanim ixxesam yito'o. Ixxenam «Waa'i ki anganne higisaa uwwoo bikkina Iraamoot Gala'aadanne weerare; kaa'llootto» yito'o.

¹²Mikkiyaasa weesheena maraa hee'u asse'amaanchi Mikkiyaasina «Mulli hiraagaan hundim adil Aki'aab kaa'eena xanoo'isa moo'isoo hiraaqqi sagara wocco'ookko. Ee bikkina atim ixxuwwisam adila liiransoo hiraago woccona uunxoommo» yukko.

¹³Ihukkaarem Mikkiyaas «Hee'oo Waa'i la'ona! I Moollanni yookkoka xale'e wocoommo» yaa dabarukko.

¹⁴Mikkiyaasim adil Aki'aab illagenne hincaa lasage Aki'aab «Mikkiyaasa, Iraamoot Gala'aadanne weerallonnii ullo?» yukko. Mikkiyaasim «Mare; kaa'llootto. Kaa'anta'ahim ki anganne ubbamo» yaa dabarukko.

¹⁵Aki'aabim «Hanqiinsi bagaan mulli luwwa iina woccoobee'isa Waa'i summinne keese hidiisoommok mee'i kore» yukko.

¹⁶Mikkiyaasim «Isra'eel hundim allaaraanchi bee'i gereebbisa duunnuwwanne binnaakkoo moo'ummo. Waa'im ‹Ka minaadabina annichchi bee'e. Ixxuwwi annannichchim ixxuwwi gaqqi mine xumminne daba'llitona› yaakko» yukko.

¹⁷Isra'ee'l adilim Iyoosaafixina «Ixxi iina xale'i joriinsi bagaan eroka hiraagoobee'ane yummoyyonnihe?» yukko.

¹⁸Mikkiyaasim odim «Ee bikkina Waa'ika sagara macceese Waa'i ixxi adillanonne afuuraa iima'n gogotim ixxi makkannee qeddannee uullaakkoo moo'ummo.

¹⁹Waa'im ‹Isra'ee'l adil Aki'aab Iraamoot Galaa'aada maraa ee beyyonne lehona huushiseena xanookkok ayyette?› yukko. Matii mato; mullekii odim mulli sawwite hincaa'ukko.

²⁰Lasaanchonne mat ayyaan Waa'i illagenne hincaa uullaa ‹An ixxo huushisoommo› yukko. Waa'im ‹Hinkid issitaa?› yukko.

²¹Ixxim ‹Maraa Aki'aab hiraagaan hundim qophphano woccamisa issoommo› yaa dabaruko. Waa'im ‹Eehidetti ihulas at huushisseena xantoo bikkina mattaa huushise› yukko» yaa edaa wocukko.

²²Mikkiyaasim «Waa'i ku ki hiraagaan qophpha'n ayyaaninne kiina hiraaggamisa issaakko; eehid issukkokim kiina bichcha qoodu bikkinatte» yukko.

²³Kanaa'in beet Sedeeqiyaas Mikkiyaas kolli hincaa oobo'inne aphphisaa «Waa'i Ayyaan eese hinkeen higaate ku keese atoorassukkok?» yukko.

²⁴Mikkiyaasim «Maaxamteena kosha aaggoo ammane laqqootto» yaa dabarukko.

²⁵Ee ammanenne Isra'ee'l adil «Mikkiyaasa amaddakka'a ka beero'i gassaanchi Amoon beyyoo adi'l beet Yoo'aash beyyoo massitakka'a

²⁶‹An gaadiinsi xummanne daba'lleembe'e ka mancho karaxxi mine aagissakka'a xale'i kutub waasaa wo'oo uwwehe› yoolla yitakka'a i summinne kullehe» yaa ijaajukko.

²⁷Mikkiyaasim «Atimdu gaadiinsi xumminne daba'llitlas Waa'i iinninnette ihaa wocukkoyyo yimma!» yukko. Minaadabinam «Minaadaba ki'nnuwwim ee woshsha macceessehe!» yukko.

²⁸Ee lasage Isra'ee'l adil Aki'aabii Yihuxxi adil Yoosaafixii Raamoot Gala'aada matto'o.

²⁹Isra'ee'l adilim Yoosaafixina «An orina mulli eddechcha edde'aa aagoommo; ihukkaarem at ki adilla'n eddechcha edde'e» yukko. Ee bikkina Isra'ee'l adil mulli edechcha edde'aa orina marukko.

³⁰Sooriy adilim faraxxi gaarre'i awwonsaano «Isra'ee'l adiliinsi bagaan hoffaanninnem ihukko lobaanninne mulli manninne ayyennem orantakkotte» yaa ijaajukko.

³¹Oo faraxxi gaarre'i awwonsaanim Yoosaafixa moo'lla'a «Kuk Isra'ee'l adila» yaqqanto'o; ee bikkina ixxo qasseena kibbito'o. Ihukkaarem Yoosaafix laarukko. Waa'im ixxena hara'mmukko. Waa'im ixxi kolliinsi ixxuwwa qeessukko.

³²Faraxxi gaarre'uwwa awwonsaanim Isra'ee'l adil ihubee'isa moo'lla'a ixxo hollansimma utto'o.

³³Ihukkaarem gaadaaniinsi mat dangonnem chokaatisu xiyyi o'l qoobe'i lammejja higaa Isra'ee'l adila qasukko. Adilim ixxi faraxxi gaarre'i ushe'aanchina «Eese qasakko'ookko; ee bikkina faraxxi gaarre'e dabattaa ka o'l lambe'iinsi eese fisse» yukko.

³⁴Orim ee balla hundoomam iibbukkisam hosukko. Isra'ee'l adilim Sooriy gogoxxi illagenne faraxxi gaarre'enne bakke'aa uulli hiimeebe'e afuuraa hee'ukko. Ixxim eelliinchi aagukkuuyyi lehukko.