Read Hadiyya 2Agannuwwi Kitaaba 19 Bible Online

2Agannuwwi Kitaaba 19 - Hadiyya bible

2Agannuwwi Kitaaba 19

¹Yihuxxi adil Yoosaafix Yerusaaleemanne yoo ixxi adilla'n mine xummannem daba'llukko.

²Hanaan beet hiraagaanchi Iyyu'u adil Yoosaafix beyyo maraa ixxena «Baaxiilaano hara'mmimmii Waa'a sabbam keenom iittimmii eranennihe? Ee mashka'inne Waa'ik quunqi ki hanennette.

³Ihukkaarem Asheerina otossakkam misilluwwa ka uulliinsi bi'issaahii Waa'am guullitaa ki wodaninne hassaahii eroomma issitaatto» yukko.

⁴Yoosaafix ixxeka heechchi beyyo Yerusaaleemanne issaa afuurukko. Beersaabehiinsi ki'isaa duunaam Efireem uulli afeebe'e daba'llamukkuuyyi minaadaba ixxuwwi gaassi anno'i Moollanni Waa'i kollonne dabarukko.

⁵Girbamaakkoo Yihuxxi uulli beero'uwwanne hundannem gassaano doo'llukko.

⁶Ixxuwwinam «Ki'nnuwwi oogattakkamok Waa'inatte bagaan manni bikkinayyo; ee bikkina oogato'i hundannem Waa'i ki'nnuwwinne yoo bikkina oogattakkam ammane ki'nnuwwi gaga ege'llehe.

⁷Hanqa boqqisimmi, golo'immii maqanxa aa'immii ni Moollanni Waa'i beyyonne bee'an ihu bikkina kabadem Waa'a baddimminne ege'llitakku'uuyyi oogattehe» yukko.

⁸Yoosaafix ixxuwwika heechchi beyyo Yerusaaleemanne issita'a Waa'i summinne hanqa oogattonaa manni lambe'enne ki'oo fito daannoominne moo'llonaa Leewi'i ooso, qeesuwwaa moolli awwonsaanoo Yerusaaleemanne doo'llukko.

⁹Ixxuwwinam «Waa'a badditakku'uuyyi amma'nnanchinnee wo'm wodaninnee guullitakka'a awwaaddehe.

¹⁰Beero'onne hee'llam ki'nnuwwi abbaayyuwwiinsi xiiqqi woshsha, te'im seera, ijaajo, siyya'aa heechchi qaanqaa moo'oo'isinne ayyi woshshim ki'nnuwwi illagenne hincoo ammane Waa'a hawwoddambee'isa qoxxissakka'a kullehe. Oo beelas Waa'i quunqi ki'nnuwwannee ki'nnuwwi abbaayyuwwannee dillookko. Ee'isa issitakkolas Waa'a hawwoddakkamoyyo.

¹¹Waa'an ihu luwwanne hundannem qeessuwwa awwonsaanchi Amaariyyi daanni ihukkuuyyi Yihuxxi uulli gassaanchi hee'u Isma'eel beet Zabaadiy odim adi'llan ihu woshshanne hundannem daanni ihaa doo'llamaakko. Leewi'i oosim ki'nnuwwina gassaan ikka'a awwaaddona. Qoxxitakka'a baxxehe. Waa'im er baxo baxoo keeninne maqir ihona!» yukko.