Read Hadiyya 2Agannuwwi Kitaaba 20 Bible Online

2Agannuwwi Kitaaba 20 - Hadiyya bible

2Agannuwwi Kitaaba 20

¹Ee lasage Moo'aaphphekii Amoo'n uulli o'l googotii Ma'uu'n gogota edda'a Yoosaafixinne oranteena waatto'o.

²Mat mannim waaraa Yoosaafixina «Sooqixxi dambalaq eeqidiinsi Eedoo'm uulliinsi lobakat gogot waaraakko. Oono'o ixxuwwi kaba Eengaadannette» yukko.

³Yoosaafixim lobakata baddukko; Waa'am uunxukko; Yihuxxi uullanne hundannem soommano alallaatisukko.

⁴Yihuxxi minaadabim Waa'a uunxeena wixxukko; Yihuxxi beero'uwwiini hundiinsim Waa'a uunxeena waarukko.

⁵Yoosaafixim Keesammi Mi'n haareechchi wixxixxi beyyi illagenne Yihuxxaannonnee Yerusaalee'm dummichchi illagennee uullukko.

⁶Ixxim «Gaassi niyyanno'ina Moollanni Waa'a! Iimanenne hee'lloottok xale'i atette; uulli adilluwwa hundam gassitoottok atette. Wodii malaayyii hundim kiihane. Kiinninnem uullixameena xanookkok ayyim bee'e.

⁷Ni Moollanna! Ka uullanne hee'llo'i mulli minaadaba ki minaadab ikko'i Isra'ee'l illagiinsi yaayyitaa ki beshichchi ihu Abrihaam shumo'ina heer heerina uwwittok ateyyonnihe?

⁸Ixxuwwim ka uullanne affutta'a ka Keesammi Mine ki summi bikkina baxxa'a

⁹‹Neesenne jor luwwi oohim or te'im booban te'im sibaar ihuta'n ka Mi'nnaannonnee ki illagennee uullinaa ee hawwi bikkina ki kollonne laalloommo. Atim macceessaa neese gatissootto› yito'o.

¹⁰Oono'o kaba «Gaassi niyyanno'i Gibxiinsi fitto'i ammane ixxuwwi uulla aaggambee'isaa ixxuwwam nakkitambee'isaa issitti Amoo'nnek, Moo'aaphphekii Eedoo'm mannii kaba neesenne weeratto'ookko.

¹¹Ixxuwwi kaba niina miqqu'uuyyi yo'ok at niina gulummi issitaa uwwitti uulliinsi hollita'a neese fissimma.

¹²Ni Moollanna! At ixxuwwanne oogattooyyonnihe? Neesenne weeraru ka lobakat gogotinne uullixxammoommi malaayyi niina bee'i bikkina maha issinnoomda'e lanqoommoyyo. Ihukkaarem ni illi ki kollonnette» yaa uunxukko.

¹³Yihuxxi manni hundim ixxuwwi meentinnee oosinnee hundinnem ciilluwwam edda'a ee Keesammi Mi'n illagenne uullita'a hee'llo'o.

¹⁴Ee ammane Leewekkichchoo Asaaf shumo'anee ihu Zakkaaryaas beetonne Yaahazii'eelanne minaadabinne maqirem uullaakkoohaannonne Waa'ik Ayyaan dillukko. Ixxi annim Baanaay beeto, Baanaay Yi'ii'eel beeto, Yi'ii'eel Maataaniy beeto.

¹⁵Yaahazii'eelim «Adil Yoosaafiixa, ki'nnuwwi Yihudannee Yerusaaleemannee hee'llakkam minaadaba macceessehe; Waa'i ‹Ka xigo lobakat ihu gogotiinsi ki'aa ki'nnuwwi baa'llakkottee muggitakkottee. Or Waa'anne bagaan ki'nnuwwaneyyo.

¹⁶Ee bikkina soodo ixxuwwi Xiix gadanonne yoo daba'llamakkam beyyo iim waattu'uuyyi qassehe. Ixxuwwam Yiru'eel udma'i uullanne massoo cebbi tachchonne siiddakkamo.

¹⁷Ka oranne orantakkamok ki'nnuwwayyo; ki'nnuwwi xale'i beyyi beyyo amaddakka'a egallehe. Waa'i ki'nnuwwina uwwoo kaachcha moo'llakkamo. Yihudannee Yerusaaleemannee hee'llakkam minaadaba, Baa'llakkottee muggitakkottee. Soodo mattakka'a orammehe. Waa'im ki'nnuwwinne maqire ihookko› yoolla» yukko.

¹⁸Ee lasage adil Yoosaafixii ixxenne maqire Yihudannee Yerusaaleemannee hee'llam minaadabii hundim uullanne aad heeshita'a Waa'ina otossito'o.

¹⁹Odim Qa'aat moolliinsii Qoora'i moolliinsii ikko'i hofqax Leewi'i oosim uullita'a sagara lobakata iimaa'lla'a Isra'ee'l Moollanni Waa'a galaxxito'o.

²⁰Minaadabim la'm balli daram ki'aa Taqo'aa yakkam beyyi gadanonne yoo udma'i uulla marukko. Ee uulla mareena ki'ukkisam Yoosaafix «Yihudannee Yerusaaleemannee hee'llakkam minaadaba, macceessehe; ki'nnuwwi Moollanni Waa'anne amma'nnehe; qoxxaalluwwam ikkakkammo. Ixxi hiraagaan kuttam luwwam amma'nnehe» yukko.

²¹Adil Yosaafiixim minaadabinne maqire atooraraa lasage zammaaraan Waa'i lombina edde'akkam eddechcha edde'lla'a «Waa'a galaxxehe; ixxi iitti heer heerina qoxxaa hee'oohane» yita'a zammattu'uuyyi o'l gogoxxi illaginne higgona ijaajukko.

²²Zammaaraanim zammarimmaa Waa'a galaxximmaa asheeramukkisam Waa'i Yihuda qaseena waaru Amoo'nnaannonne, Moo'aaphphi gogotannee Seeyi'l duu'n mannannee la'amoobee'i ora ki'isaa ixxuwwi kaa'antamisa issukko.

²³Ee bikkina Moo'aaphphi gogotii Amoo'n gogotii Eedoo'm gogotanne ki'lla'a guullita'a bi'isso'o; ee lasage ixxuwwina'i ixxuwwim beeddixxanto'o.

²⁴Yihuxxi uulli mannim udma'i uulla aad moo'isoo qoffit beyyo affa'a ee lobakat diina'i gogota moo'llamaare oo diina'i hundim beeddaa leesh uullanne ubaa moo'llo'o. Mat manchim gibaa xorukkok hee'ukkoyyo.

²⁵Ee lasage Yoosaafix ixxi gaadaaninne maqirem qeefado'o masseena marukko. Ixxuwwim fooraam diinatika lobakata, googonne itakkeena amadakkam luwwa, o'l mu'uta, eddechchaa mulli bito xee'aalli mu'uttuwwaa eekke'enne siiddo'o. Qeefado'im lophphimmiinsi ki'aa wixxaa'immi sas balla massukko.

²⁶Soo'l ballanne kaballi afeebe'e «Barak cebba» yamamoo beyyonne wixxito'o. Waa'i issu luwwi hundinam ixxo galaxxito'o. Oo cebbim kaballi afeebe'e «Barak cebba» yamamukkok ee bikkinatte.

²⁷Ee lasage Waa'i ixxuwwi diina'anne kaachcha uwwu bikkina Yihuxxekii Yerusaalee'm mannii hundim Yoosaafix awwonsatinne liiranchinne Yerusaaleema daba'llito'o.

²⁸Yerusaaleema affa'ahim Diita'inne, Maasinqo'innee xurumbinnee kibbanta'a zammattu'uuyyi Keesammi Mine aago'o.

²⁹Waa'i Isra'ee'l diina'a hinkid issaa kaa'uda'e macceesso'i mulli adilluwwi hundim baachchinne wo'mmito'o.

³⁰Ee bikkina Yoosaafix uulla xumminne awwonsukko; Waa'im kolli hundinnem ixxina xumma uwwukko.

³¹Yoosaafix Yihuxxi uullanne adil ihukkok umur sadee onti hiinchoo ihaakkoohaannonnette. Ixxi heechchi beyyom Yerusaaleemanne issaa lamiyyee onti hiinchoo gassukko. Ixxi amama Azuubaa yamantaman ihaa Shiilha'ina landichchotte hee'llo'o.

³²Yoosaafix ixxi anni Aasa'i googo awwonukko; ee googiinsim firukkoyyo. Waa'i illagennem er luwwa issukko.

³³Ihukkaarem duunnuwwanne hee'oo otossakkam beyyuwwa bi'isukkoyyo; minaadabim ixxuwwi gaassi anno'ina Moollanni ihu Waa'i kolli wo'm wodaninne daba'llukkoyyom hee'ukko.

³⁴Iyyoosaafix adil ihu luxxi ammanniinsi ki'isaa lasaanchi afeebe'e issu mulli luwwi hundim Hanaan beet Iyyu'i kitaabu Isra'ee'l oos adilluwwi aganni kitaabanne kitaabamaa yookko.

³⁵Ee lasage Yihuxxi uulli adil Yoosaafix lobakat jor luwwa baxaa hee'u Isra'ee'l uulli adil Akaaziyaasina beshichchi ihukko.

³⁶Lamim mat ikka'a Tariseesa maroo dadda'l markabbuwwa Exiyoongaabiranne baxisso'o.

³⁷Ihukkaarem Maareesh uulliinsetti ihoo Doodaawaa'i beet Eelii'eezer Yoosaafixina «Akaaziyaasinne maqire mat ikkaa iittanti bikkina at baxxitti luwwi hundam Waa'i bi'isookko» yaa qoxxisaa kuraa hee'u bikkina markabbuwwi hundim iiqamukko; dambalaq hanennem matteena horem xanto'oyyo.