Read Hadiyya 2Agannuwwi Kitaaba 21 Bible Online

2Agannuwwi Kitaaba 21 - Hadiyya bible

2Agannuwwi Kitaaba 21

¹Adil Yoosaafix lehukko. Daawiit beero'onne hee'u adilluwwi waammi beyyonne waammamukko. Ixxi beyyonnem ixxi beet Yihooraam adil ihukko.

²Yihuxxi adil Yoosaafix beet hee'u Yihooraamina loh abbaayyuwwi hee'llo'o. Ixxuwwim Azaaryaasatte, Yihii'eelatte, Zakkaariyaasatte, Ezaariyattee Mikaa'eelattee Shafaaxyattee hee'llo'o.

³Ixxuwwi annim lobakat biraa worqaa bito xee'aalli ihu annanni annanni mu'uttuwwaa hundam ixxuwwina uwwukko. Ee'isam Girbamaakkoo Yihuxxi beero'uwwanne annannichchom mat mat beero'onne daanni issukko. Ihukkaarem Yihooraam ixxena won beet ihu bikkina ixxi beyyonne adil ihoo'isa issukko.

⁴Yihooraam ixxi adillano qoxxisaa lasage ixxi abbaayyuwwa hundam mat mat Isra'ee'l awwonsaaninne maqirem bisa'inne shukko.

⁵Yihooraam adil ihukkok sadee lam hiinchi woraaddichchoo hee'ukkuuyyatte hee'ukko. Ixxim ixxi heechchi beyyo Yerusaaleemanne issaa sadeenti hiincho gassukko.

⁶Aki'aab landiinsi mato eebaa hee'u bikkina adil Aki'aabikaa Isra'ee'l mulli adilluwwikaa jor googo ixxim maraa Waa'i illagenne baaxiilo baxukko.

⁷Ihona bagaan Waa'i Daawiit shumo'iinsi adillano bi'iseena hasukkoyyo. Oohim ihukkok Waa'i gaassaahim adil Daawiitinne hidiro aagaa hee'u bikkinaa Daawiit shumo'iinsi adillan muramoobee'an ihukkisa qoxxaalli neeyyaxxi sagara uwwaa hee'u bikknatte.

⁸Yihooraam adilla'n doollenne Eedoo'm uulli manni Yihuxxi minaadabanne bangujjaa ixxi gaqqi adila uullisukko.

⁹Ee bikkina Yihooraam gaaxxi awwonsaanoo faraxxi gaarre'uwwaa amadaa gaadimminne Eedoo'm uulla qasukko. Ee beyyonnem Eedoo'm gogot ixxuwwa kibbito'o. Ihukkaarem Iiyooraamii ixxi gogotii hiimonne ixxuwwa kibbito'i gogotiinsi iiqqa'a xotto'o.

¹⁰Ee ammanniinsi ki'isaa kaballi afeebe'em Eedoo'm manni Yihuxxi mannanne bangujjito'isam yo'o. Adil Yihooraamim gaassi ixxi anno'ika Moollanni Waa'a uru bikkina Libi'n beero'i manni ee doollennem Yihuxxi mannanne ki'llo'o.

¹¹Ixxim Yihuxxi uulli duunnuwwanne gatoo'n mulli minaadab otossitam beyyuwwa baxukko. Yihuxxi minaadabii Yerusaalee'm minaadabii baaxiilo baxxa'a Waa'a kichche'issamisam issukko.

¹²Ee lasage hiraagaanchi Eeliyaas «Kiyyanni Daawiitina Moollanni ihu Waa'i ‹Kiyyanni adil Yoosaafiixika te'im ki lob anni hee'u adil Aasa'aka er googo awwontittoyyo.

¹³Ihukkaarem at Isra'ee'l adilluwwi jor googo awwontaatto. Aki'aabii ixxi lasonne adil ikko'i adilluwwii Isra'ee'l minaadab baaxiilo baxxamisa issito'isam atim Yihuxxekii Yerusaalee'm minaadabii baaxiilo baxxamisa issitaatto. Ee'isam kiinniinsi e'llitam kiyyabbaayyuwwaa kiyyanni mi'n abaroosaa shitaatto.

¹⁴Ee bikkina Waa'i ki minaadaba, ki ooso, ki meentoo kiina yoo luwwaa hundam kee'mmaalli boobaninne aphphisookko.

¹⁵At ki gagim balliinsi ballanne baasukkuuyyi maroo hilleenni jabbinne jabbitootto. Lasaanchonnem oo jabbi ki hilleenna xoqolaa biiranne fissookko› yoolla» yoo assi kura Yooraamina asse'ukko.

¹⁶Dambalaq gammalanne wiiddanta'a hee'llam Tophphe'i manni gadanonne Filisxee'm uulli mannii Araphphi uulli mannii hee'llam hee'llo'o. Waa'im ixxuwwa Yihooraaminne orantamisa issukko.

¹⁷Ixxuwwim Yihuxxi uulli manna weeratta'a amaddo'o. Adilla'n mi'n mu'uta hundam boggo'o. Yooraam lasaanchi beet hee'u Akaaziyaasiinsi bagaan adi'l meentoo goo'n oosoo hundam qeefadda'a massito'o.

¹⁸Ee lasage Waa'i fayye'eena xanoobee'i kee'mmaalli hilleenni jabbi Yihooraamanne ihoo'isa issukko.

¹⁹Oo jabbim ixxo lobakata hawwisukkuuyyi hee'aa lasage la'm hiinchi beeddukkuuyyi ee jabbi mashka'inne ixxi hilleenni hundim biiranne firaa lobakatisa hawwaa lehukko. Minaadabim ixxuwwi anno'ina issitam hee'llo'isa ixxena waammi ballanne haqqa tuubba'a giira giitto'oyyo.

²⁰Yihooraamik umur sadee lam hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa sadeenti hiincho gassukko. Lehu ammanennem ayyim ixxena kichchee'ukkoyyo. Daawiit beero'onne waammamukko bagaan adilluwwi waammi beyyonne waammamukkoyyo.