Read Hadiyya 2Agannuwwi Kitaaba 22 Bible Online

2Agannuwwi Kitaaba 22 - Hadiyya bible

2Agannuwwi Kitaaba 22

¹Araphphi uulli mannii ixxuwwinne maqire hee'llo'i mannii Yihuxxi uulla qasso'i ammane hoffan hee'u Akaaziyaasiinsi bagaan adil Yooram goo'n ooso hundam shita'a hee'llo'i bikkina Yerusaalee'm minaadab Akaaziyaasa anni bikkenne adil issito'o. Ee bikkina Yihuxxi uulli adil Yihooraam beet Akaaziyaas Yihuxxi uullina adil ihukko.

²Akaaziyaasik umur lamiyyee lam hiinchoo ihaakkoohaannonne adil ihukko. Ixxi heechchi beyyom Yerusaaleemannette issaa mat hiincho gassukko. Ixxi ama adil Oomiirina beet hee'u Aki'aab landichchotte hee'llo'o.

³Isem jor sogitano soggam hee'llo'i bikkina ixxim adil Aki'aab jor googo awwonaa marukko.

⁴Ixxi anni lehaa lasage Aki'aab abaroos soggam hee'llo'i bikkina ixxim Aki'aab mi'n abaroos issukkisam Waa'i illagenne jor luwwa issukko.

⁵Ixxuwwikam jor sogitano aa'aa Isra'ee'l adil Aki'aab beet Yooraam Sooriy uulli adil Azaaheela qaseena Raamoot Gala'aada maru ammane ixxenne maqirem marukko. Sooriy uulli mannim Yooraama qassa'a madisso'o.

⁶Ixxim ee madiinsi fayye'eena Yizra'ee'l beero'o daba'llaa marukko. Akaaziyaasim Yooraama xa'mmeena ee beyyo marukko.

⁷Akaaziyaas Yooraama xa'mmeena marimma Waa'i Akaaziyaas ubimmina mashka'i ihoo'isa issukko. Akaaziyaas ee beyyo afukkisam Niimshii'i beeto Iyyu'u aa'eena Yooraaminne maqirem firukko. Iyyu'um Aki'aab mine bi'isona Waa'i doo'llaakkoo manchi hee'ukko.

⁸Iyyu'u Aki'aab minenne Waa'ika oogato'o oogatukkuuyyi yoohaannonne Akaaziyaasa awwonta'a ixxenne maqirem waatta'a hee'llo'i Yihuxxi manni awwonsaanoo Akaaziyaas qarmannaa eekke'enne siidaa hundam shukko.

⁹Akaaziyaasim Samaarya'i uullanne maaxamaakkoo beyyonne hassa'a siiddo'o. Iyyu'i beyyom wotta'a shito'o. Ihukkaarem «Waa'a muccur wodaninne hasam hee'u ixxi lob anni adil Yoosaafix lombi bikkina yita'a ixxi leesha waammito'o. Ee bikkina Akaaziyaas abaroos lambe'iinsi adillano aa'aa awwonseena xanoo manchi ayyim gatukkoyyo.

¹⁰Adil Akaaziyaas ama Ataaliya is beeto shakko'isa macceesso'isam Yihuxxi manni adilluwwi abaroos ikko'i keeno hundam shishiisso'o.

¹¹Ihukkaarem adil Yihooraam landichcho Yihosheeba'a shakkam daannuwwi lambe'iinsi Yoo'aasa daphphaa'lla'a gatissa'a massita'a ixxoo ixxom li'issamotaa Keesammi Mi'n gadanonne yoo jagaranne maaxxo'o. Isem Akaaziyaasina aayyatte hee'llo'o. Is manchim Yihooyaada yakkam qeesichchi hee'ukko.

¹²Ixxim Ataalya adilla'n doollenne hundannem Keesammi Minenne loh hiincho hundam maaxamaa hee'ukko.