Read Hadiyya 2Agannuwwi Kitaaba 26 Bible Online

2Agannuwwi Kitaaba 26 - Hadiyya bible

2Agannuwwi Kitaaba 26

¹Yihuxxi minaadab hundim umur tommoo loh hiinchoo ihaakkoo Ameesiyaas beeto Ooziy anni beyyonne adil issito'o.

²Ooziyim ixxi anni Ameesiyaas lehaa lasage Eelaat beero'o dabaraa amadaa areesaa baxukko.

³Ooziyik umur tommoo loh hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa ontayyee lam hiinchoo gassukko. Ixxi amam Yikolyaa yamantamotane ikka'a Yerusaalee'm beero'itan hee'llo'o.

⁴Ixxim ixxi anni Ameesiyaas issukisam Waa'ina liiransoo er luwwa issukko.

⁵Waa'a baddimmi sogitano uwwoo Zakkaariyaas hee'u doollenne ixxi Waa'a hasukko. Waa'a hasukkisam Waa'im ixxena luwwi hundam taaphansukko.

⁶Ooziyim Filisxee'm manna qasaa Gaatikaa Yaabine'ikaa Ashdooxxi beero'uwwikaa oota gindansukko. Ixxim Ashidooxxi gadanonnee gatu Filisxee'm uullannee girbamaakkoo beero'uwwa baxukko.

⁷Waa'im Filisxee'm minaadabaa Gurba'aala yakkam beyyonne Hee'llo'i Araphphi minaadabaa Ma'uu'n minaadabaa kaa'oo'isina hara'mmukko.

⁸Amoo'n uulli mannim Ooziyina gibitto'o. Ixxi lobakata malaayyukkuuyyi maru bikkina ixxek sad Gibxi uulli afeebe'e firukko.

⁹Ooziyim ooxxi tochchonne yoo gooc beyyonne Cebbi uulli Ooxxi goocannee ooxxi lamejjannee qeeraa'l egechchi beyyuwwa baxaa Yerusaaleema egerakkam girbuwwa qoxxisukko.

¹⁰Ee'isam eelliinchi aagginne duunnuwwi lokkagannee allaachchi beyyuwwannee lobakat allaachchi diinat hee'u bikkina hax uulluwwannem girbamaakkoo egachchi beyyuwwa baxukko. Lobakat wo'i barem hinukko. Abuulli baxom iittoo bikkina minaadab duu'n uullannee harish uulluwwannee ixxena woyi'n kaashsha kaassam abuullaan hee'llo'o.

¹¹Ooziyina gaalchinne gaalchinne orina gudaakkoo lobakat gogot hee'ukko. Ee gogoxxekam summa adi'l kitaabaan hee'llo'i Yi'ii'eelii Maa'iseeyii kitaabbam hee'llo'o. Ixxuwwam hundiinsi hanaan ihaa awwonsam hee'ukkok adilla'n mi'n baxaaniinsi mat hee'u Hanaaniyatte hee'ukko.

¹²Ee gogotam awwonsitam lam kumii loh xibbi sullo awwonsaanii hee'llo'o.

¹³Ixxuwwi awwonsaxxi woronne adi'l diina'inne oranteena xantam 307,500 geedduwwi hee'llo'o.

¹⁴Ooziyim gogot hundinam agiraa bagadoo o'l qoobe'ee orina biqenne edde'akkam eddechcha, xiyya, yambarishaa darabakkam kinaa gudisaa hee'ukko.

¹⁵Adil Ooziyim Yerusaaleemanne angii bax lachchinne la'anto'oo manni egachchi beyyuwwannee beero'i ooxxi lamejjuwwannee xiyyuwwaa geejji kinnuwwaa darabakkam mu'uttuwwa baxxamisa issukko. Waa'im ixxena hara'mmu bikkina lobakata malaayyaam ihukko. Ixxekim sad uulli hundannem macceesamukko.

¹⁶Adil Ooziy ixxi adillano qoxxisaa lasage bolxukko. Oo bolxoomim ixxo ubbuusukko. Ixxim Keesammi Mine aduruusa wiriisseena iggimminne aagaa Waa'a kichche'isukko.

¹⁷Ee ammanem qeessichchi Azaariyaasii ixxenne murte'aalluwwi ikko'i sadeentayyi qeessuwwii ixxi baxoo baxo uullisiiseena adila awwonta'a Keesammi Mine aaggo'o.

¹⁸Adilinam «Ooziya, At Waa'ina aduruusa wiriissiteena labbooyyo. Eekka issiteena qoodanto'oo Waa'ina annanni ikko'oo Aaroon shumo'i qeessuwwi xale'e. Ee bikkina at ka keesamaakkoo beyyiinsi fire; Moollanni Waa'a kichche'issaatto. Eekka issitti bikkina Waa'i keese lonsooyyo» yita'a adilanne quuqqo'o.

¹⁹Aduruusa wiriisseena wiriissakkam mu'uta anganne amadaa Keesammi Minenne aduruusa wiriissakkam kiti'm beyyonne uullaa hee'u Ooziy qeessuwwanne lobabata quuqonam ixxi miinenne baddisoo jabbi moo'amukko.

²⁰Hundiinsi lob qeessichchi Azaaryaasii ixxenne maqire hee'llo'i mulli qeessuwwii lobakata muggita'a adi'l miinne xuxxita'a moo'llo. Keesammi Miniinsi qaqqisaa firoo'isam issito'o. Ixxim Waa'i guzumo'ukkisa la'aa qaqqisaa firaa marukko.

²¹Adil Ooziyim leheebe'i afeebe'e see'llisinne muccur ihoo'nnim hee'ukko. Keesammi Minem od daba'llaa aageena xanukkoyyo. Bax hundiinsim annanni ihaa annanni minenne mullam hee'am hee'ukko. Ixxi beet Iyyoo'aataamim ixxi bikkenne uulla gassam hee'ukko.

²²Adil Ooziy adilla'n doollenne baxamu luwwi hundam ee ammane hiraagaanchi hee'u Aamoox beet Issaayyaas kitaabaakko.

²³Ooziyim ixxi anno'isam lehukko. Adilluwwi waammi gadanonne yoo beyyonnem waammamukko. Adilluwwi waammi beyyonne waammamubee'i mashka'im ixxaaonnonne oddomachchonne baddisoo jabbi hee'u bikkinatte. Ixxi beyyonnem ixxi beet Yoo'aataam adil ihukko.