Read Hadiyya 2Agannuwwi Kitaaba 27 Bible Online

2Agannuwwi Kitaaba 27 - Hadiyya bible

2Agannuwwi Kitaaba 27

¹Yoo'aataam umur lamiyyee onti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa tommoo loh hiinchoo gassukko. Ixxi amam Yiruushatte ikka'a Saadooqina landichchotte hee'llo'o.

²Yoo'aataam ixxi annisam Waa'a liiransoo baxo baxukko. Ixxi anni Keesammi Mine aagaa aduruusa wiriisseena amadukkisa issukkoyyo. Ihukkaarem minaadab baaxiilo baximma urukkoyyi hee'ukko.

³Yoo'aataam Keesammi Mi'nneka hanaa'n qarinne yoo gooca areesaa baxukko. Odim Yerusaaleemanne yoo Oofee'l duu'n kollinne yoo ootam danaamisa areesaa baxukko.

⁴Ee'isam duunaam Yihuxxi uullanne beero'uwwa, doom lophphaa hee'oo beyyuwwannem girbuwwaa qoto'akka'a egerakkam beyyuwwaa baxaa hee'ukko.

⁵Ixxim Amoo'n uulli adilinne oramaa kaa'aa hee'ukko. Amoo'n uulli mannim hiincho hiinchonne sas hiinchina gudissa'a 3,400 kiilo'i biraa mat miliyoon kiilo'i arasaa mat miliyoon kiilo'i so'oo gibittamisa issukko.

⁶Yoo'aataam ixxi Moollanni Waa'i illagenne amma'nnatinne daba'llamu bikkina malaayyaam ihukkuuyyi marukko.

⁷Yoo'aataam adilla'n doollenne baxamu mulli bax oramu orii ixxi adilla'n awwonsatii hundim Isra'eelaannonnee Yihuxxi adilluwwi aganni kitaabbuwwannee kitaabamaakko.

⁸Yoo'aataam adil ihoo ammane ixxek umur lamiyyee onti hiinchoo ihaa hee'ukko. Ixxi heechchi beyyom Yerusaaleemanne issaa tommoo loh hiinchoo gassukko.

⁹Ixxim ee lasage lehaa Daawiit beero'onne waammamukko. Ixxi beet Akaazim ixxi beyyonne adil ihukko.