Read Hadiyya 2Agannuwwi Kitaaba 28 Bible Online

2Agannuwwi Kitaaba 28 - Hadiyya bible

2Agannuwwi Kitaaba 28

¹Akaaz ixxek umur lamiyyi hiincho ihaakkoohaannonne adil ihukko. Ixxi heechchi beyyom Yerusaaleemanne issaa tommoo loh hiinchoo gassukko. Ixxim Waa'i illagenne eroomma issu ixxi anni Daawiitisa issukkoyyo.

²Isra'ee'l adilluwwi jor googo maraa Ba'aala yamamoo qophpha'n waa'ina otosseena misilluwwa bukkaa baxukko.

³Hiinoo'm cebbannem aduruusa wiriissukko. Isra'ee'l oos ee uulla aaggo'i ammane Waa'i ee uulliinsi yaayyaa hollu minaadaphphi shigigaa'oo losa'n googo awwonaa ixxi goo'n oosim gatoo'n shokkiisakkam kitim issaa qophpha'n waa'uwwina hincaa'ukko.

⁴Hoffi duunnuwwanne, lob duunnuwwannee haqqi lugummuwwannee otossakkam beyyuwwi hundannem kitima kitimukko; aduruusam wiriissukko.

⁵Adil Akaaz baaxiilo baxu bikkina Sooriy uulli adil ixxo kaa'oo'isaa lobakat Yihuxxi mannam qeefadaa Damaasqo'i beero'o massoo'isaa Waa'i issukko. Odim Ramaaliy beet ihu Isra'ee'l adil Faaquhe Akaaza kaa'oo'isaa mexxo'i ballannem la'anto'oo Yihuxxi geedduwwi gaadaa'nnek 120,000 letamisaa Waa'i issukko. Mashka'oomim Ayihuxxi manni ixxuwwi anno'ina Moollanni ihu Waa'a utta'a hee'llo'i bikkinatte.

⁷Ziikira yakkam mat Isra'ee'l gaadaanchi adil Akaaz beeto Maa'iseeya, adilla'n mi'n gassaanchi hee'u Aziriiqaamaa adilla'n mi'n daannoomanne adiliinsi la'm beyyonne yoo Hilqaanaa shukko.

⁸Ayihud ixxuwwina moolli ikko'aarem Isra'ee'l gaadaan 200,000 meentoo oosoo lobakat luwwinne maqirem qeefadda'a Samaare'i beero'o massito'o.

⁹Oodeeda yakkam mat Waa'i hiraagaanchi Samaariy beero'onne hee'am hee'ukko. Isra'ee'l gogot Yihuxxi manna qeefadda'a Samaare'i beero'o daba'llita'a waattu'uuyyi ixxuwwi beyyo maraa «Gaassi ki'nnuwwi anno'ina Moollanni ihu Waa'i Yihuxxi mannanne quuqu bikkina ixxuwwa ki'nnuwwi anganne higisaa uwwukko. Ihukkaarem ki'nnuwwi ixxuwwa monginne guullitakko'o. Monginne ki'nnuwwi ixxuwwanne issitakko'okam Waa'i moo'aakko.

¹⁰Oohim ihukkoyyo yitakka'a Yerusaalee'mmekaa Yihuxxekkaa goonaa landaa hundam ki'nnuwwi agid issitakkeena hassakkamuulla. Ki'nnuwdu baaxiilo baxxakka'a ki'nnuwwi Moollanni Waa'a hawwoddakko'oyyonnihe?

¹¹Kabadem macceessehe; ku ki'nnuwwi qeefaddakko'i keen ki'nnuwwina abbaayyuwwaa aayyuwwaa. Ee bikkina ixxuwwi waatto'i beyyom mattona fataki'llehe. Eebeelas Waa'i quunqi ki'nnuwwanne dillookko» yukko.

¹²Efireem uulli awwonsaaniinsi soor la'antoo keen yimmim Yihoohanaan beet Azaariyaas, Mashiilemoot beet Bereekiy, Shaaluum beet Yihiizqiyii Hadilaay beet Amaasaa'ii oriinsi daba'llito'i gaadaanina

¹³«Ka qeefadanto'i keeno keyye wottakkotte; kanniinsi illageen baaxiilo banxaa Waa'a kichche'insummi bikkina ixxi quunqi ni hanenne dillaakko; kabadem hawwojjanne hanenne hawwojja endona hassakka'ahinnihe?» yita'a quuqqo'o.

¹⁴Ee bikkina gaadaan qeefaddo'i mannaa qeefaddo'i luwwaa hundam minaadabinaa awwonsaaninaa uwwitto'o.

¹⁵Ee lasage oo soorem manchim qeefadanto'i mannina qeefadamu luwwiinsi hasisoo luwwa hundam uwwitamisina oohim leexa'am yo'i keenina eddechcha, caamma'a, ittam hurbaataa wo'oo uwwiteena qoodanto'o. Ixxuwwim mad yoo keenonne qaraare labbo'o lokkinne matteena xantambee'i keenom hallanne saa'llisso'o. Ixxuwwam Ayihuxxi uullanne hee'oo dimbaaphphi haqqi lophphaa hee'oo Iyyaarko'i beero'o dabatta'a massito'o. Ee lasage odim Isra'ee'l manni ixxuwwi hee'llam Samaariy beero'o daba'llito'o.

¹⁶Eedoo'm uulli manni Yihuxxi uulli mannanne odim weeratta'a lobakat manna qeefadda'a massito'o. Ee bikkina adil Akaaz ixxena hara'mmona Aasoo'l uulli adila uunxukko.

¹⁸Ee ammane Filisxee'm manni eelliinchi aagoo kollinne hee'oo duunnuwwiinsi woroon yoo Yihuxxi uullanne woroo'n qarinne hee'oo hoffi beero'uwwa amaddo'o. Oohim Beetisheemeesha, Ayaaloona, Gaderoota, Sooka, Tiiminaa Giimzoo yakkam beero'uwwaa ixxuwwi kululleetanne hee'oo hegeegguwwaa edda'a kaa'lla'a amaddo'o. Ee beyyuwwam heechchi beyyi issita'a afuutto'o.

¹⁹Yihuxxi adil Akaaz Waa'a lagu bikkinaa Yihuxxi uullannem baaxiil lophphoo'isa issu bikkinaa Waa'i Yihuxxi minaadaba sholliisukko.

²⁰Aasoo'l adil Tigilaat-Phaleeseer ixxi beyyo waaraa ixxo u'nnisukko bagaan ixxena hara'mmukkoyyo.

²¹Ee bikkina Akaaz Keesammi Miniinsi, adila'n miniinsii minaadaphphi awwonsaaniinsii lobakat worqa massaa Aasoo'l adilina uwwaa hee'ukko. Ihukkaarem maham hara'mmukkoyyo.

²²Akaazanne hawwi lophphukkuuyyi maru ammanenne ixxi odim ayyi ammanniinsim loboka baaxiilo baximminne Waa'a kichche'isukko.

²³Akaaz ixxi kaa'amoo'isa issito'i Sooriy uulli qophpha'n waa'uwwina kitima hincaa'ukko. Eekkam issu mashka'i «Sooriy uulli adilluwwina ixxuwwi waa'uwwi hara'mmito'ookko; iinam oo waa'uwwi hara'mmitona kitima hincaa'oommo» yaa sawwaatette; ixxo kaa'llo'i Damasqo'i uulli waa'uwwina kitima hincaa'ukko. Ihukkaarem ookki ixxenaa ixxi uullinaa bichcha eebukko.

²⁴Odim Akaaz Keesammi Mi'n mu'uta hundam fissaa iiqansukko; Keesammi Minem xufukko; Yerusaaleemannem mulli waa'ina otossakkam beyyuwwa beyyi hundannem uullisukko.

²⁵Yihuxxi uulli beero'uwwanne hundannem qophpha'n waa'uwwina aduruusa wiriissakkam duunnuwwanne hee'oo otossakkam beyyuwwa baxukko. Ee'isinne Akaaz gaassi ixxi anno'i Moollanni Waa'i quunqi ixxi gaganne ihoo'isa issukko.

²⁶Akaaz adilla'n doollenne luxxi ammaniinsi ki'isaa lasaanchi afeebe'e ihu mulli luwwi hundim Yihuxxaannonnee Isra'ee'l adilluwwaannonnee aganni kitaabanne kitaabamaakko.

²⁷Adil Akaazim lehukko. Yerusaaleemannem waammamukko. Ihukkaarem adilluwwa waammakkam beyyonne waammamukkoyyo. Ixxi beet Hizqiyaasim ixxo bikkaa adil ihukko.