Read Hadiyya 2Agannuwwi Kitaaba 29 Bible Online

2Agannuwwi Kitaaba 29 - Hadiyya bible

2Agannuwwi Kitaaba 29

¹Hizqiyaas umur lammiyyee onti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa lamiyyee honsi hiinchoo gassukko. Ixxi amam Abiyaa yakkamotan ikka'a Zakkaariyaasina landichchotte hee'llo'o.

²Hizqiyaasina gaassi anni hee'u adil Daawiitika er kobi'lla awwonaa Waa'a liiransoo baxo baxukko.

³Hizqiyaas adil ihu hiinchi luxxi agananne Keesammi mi'nneka gooccuwwa hundam fooqaa'aa areesukko.

⁴Qeessuwwaa Leewi'i oosom Keesammi Miniinsi eelliinchi firinne yoo dummichchi beyyonne wixxaa'ukko.

⁵Ixxim «Leewi'i ooso macceessehe; ki'nnuwwi gaga keessehe; ki'nnuwwi anno'i Waa'ika Keesammi Minem muccussehe. Keesammi Mine haashaassoo luwwi hundam bi'issehe.

⁶Niyyanno'i ni Moollanni Waa'ina amma'nnanto'oyyo. Waa'am utta'a ixxena heechchi beyyi ihu ixxi gatti miniinsi ille dabatto'o.

⁷Keesammi mi'nneka gooccuwwa hundam xuffo'o. Caakkuwwam bi'isso'o. Isra'ee'l Moollanni Waa'ina Keesammi Minenne aduruusa wiriissimma te'im shokkiisakka'a hincaa'akkam kitima hincaa'imma utto'o.

⁸Ee mashka'innem Waa'ik quunqi Yihuxxi uullannee Yerusaaleemannee dillukko. Ki'nnuwwi kaba moo'llakkamisam ixxuwwanne baachchii mugimmii ihoo'isa issaakko. Ixxuwwannem naacanchi afoo'isa issaakko.

⁹Ee bikkina niyyanno'i oranne beeddito'ookko. Ni meentii ni oosii hundim qeefadanto'ookko.

¹⁰Hizqiyaasim «Kanniinsi eehid Waa'ik quunqi niinniinsi qee'lloo'isina oono'o an kaba Isra'ee'l Moollanni Waa'inne hidi'l sagara aageena murte'aammo.

¹¹I ooso! Ixxi illagenne uullitakka'a ixxena awwaaddakkona, ixxi awwaadaanom ikkakkonaa kitimam ixxena hincaa'llakkonaa Waa'i ki'nnuwwa doo'llaakkoohan ihu bikkina jalaggakkotte» yukko.

¹²Baxo baxxeena doo'llanto'i Leewi'i oosik summi Qa'aat moolliinsi, Amaasaay beet Maahaatattee Azaariyaas beet Iyyu'eelattee; Meeraar moolliinsi Abiid beet Qiishattee Yihaali'eel beet Azaariyaasattee; Gershoon moolliinsi Ziim beet Yoo'aahattee Yoo'aah beet Edenattee; Eelxaafaan moolliinsi Shiimiirattee Yi'ii'eelattee; Asaaf moolliinsi Zakkaariyaasattee Maatinyattee; Heemaan moolliinsi Yihii'eelattee Shiimi'attee; Yiduutuun moolliinsi Shamaa'iyattee Uzi'eelattee hee'ukko.

¹⁵Ixxuwwim ixxuwwina abbaayyuwwi ikko'i mulli Leewi'i ooso wixxaa'lla'a lasage hundim Waa'i See'llisinne ixxuwwi gaga muccussitto'o. Ee lasage adil ixxuwwa ijaajukkisinne oo Leewi'i oos Waa'ika mine Waa'i See'llisanne muccussito'o.

¹⁶Qeessuwwim Keesammi Mine muccussiteena woro aaggo'o. Keesammi Mi'n woronne siiddo'i haashaarammi luwwa hundam Keesammi Mi'n wixxixxi beyyonne fissito'o. Leewi'i oosim ee beyyiinsi ki'issa'a Qeedroo'n cebbanne uunjito'o.

¹⁷Ee muccussimmi baxom luxxi agan aagu balliinsi ki'issa'a ee aga'n sadeenti ballina Keesammi Mine aagakkam gooca edda'a hundam guullito'o. Ee lasage Keesammi Mine Waa'ina otossakkam siyya'a gudisseena sadeenti balla edda'a ee aga'n tomii lohii afeebe'e baxxo'o.

¹⁸Leewi'i oosim adil Hizqiyaas beyyo aagga'a «Shokkiisakkam kitim hincoo beyyoo keesamaakkoo daabbo'o dissakkam xaraphpheezaa mulli mu'uttuwwaa hundam Keesammi Minee hundam see'llisinne muccussinaammo.

¹⁹Ee'isam adil Akaaz adil hee'u doollenne Waa'ina amma'nnancha hoogimminne massaa hee'u mu'uta hundam daballaa wollaa Waa'ina keesamaakkoo keen issinaammo. Oo hundem mu'utim Waa'ina kitim hincoo kiti'm beyyi illagenne yookko» yita'a kutto'o.

²⁰La'm balli daram adil Hizqiyaas ee beero'i gassaano wixxaa'aa ixxuwwinne maqirem Keesammi Mine marukko.

²¹Ixxuwwim adi'l abaroosaanninaa Yihuxxi minaadaphphaanninaa baaxii'l haafitinaa ee'isam Keesammi Mine muccussimminaa kitim ihaa Waa'ina hincoo lamar moolluwwa, lamar gereebbi ambulluwwa, lamar gereebbi geexxuwwaa lamar fella'i ambulluwwaa eebbo'o. Adilim Aaroon shumo'i ikko'i qeessuwwi ee eebbo'i fooraam diinate Waa'i kiti'm beyyonne kitim issita'a hincaa'llona ijaajukko.

²²Qeessuwwim gaassita'a moolluwwa ee lasage gereebbi ambulluwwa lasaanchonnem gereebbi geexxuwwa dutta'a hundem kiti'mmekam xiiga kiti'm beyyonne wixxo'o.

²³Ee lasage fella'a adi'l beyyoo adilinne maqire wixxaa hee'u manni beyyoo hincaa'llo'o. Ixxuwwim ee fella'i hanenne ixxuwwi anga issito'o.

²⁴Adil shokkoo kitimii baaxii'l kitimii Isra'ee'l minaadabina hundinam baaxii'l haafit ihona ijaajaa hee'u bikkina qeessuwwi ee ijaaccisinne fella'a dutta'a baaxii'l kitim issita'a xiiga kiti'm boyyi hanenne dunto'o.

²⁵Adil Hizqiyaasim hiraagaan hee'llo'i Gaadinnee Naataaninnee ihaa Waa'i adil Daawiitina uwwu awwonsinnee Daawiitim baxonne hosisu ijaajo awwonimminnee diitta'a, doolaa maasiinqo'oo losso'oo Leewi'i ooso Keesammi Minenne uullisukko.

²⁶Leewi'i oos ee Daawiit awwaaxxam hee'u mazmuu'l mu'uta amadda'a, qeessuwwim xurumba amadda'a gudda'a uullito'o.

²⁷Adil Hizqiyaasim shokkiisakka'a hincaa'akkam kitima kiti'm beyyonne kitimtona ijaajukko. Kitimimma ashsheetto'isam Waa'ik mazmuur zammaramukko. Zammaaraanim xurumba fugimmaa Daawiit mazmuu'l mu'uttuwwinne zammarimmaa asheetto'o.

²⁸Ee beyyonne hee'u minaadab hundim mateeyyoominne Waa'ina otossito'o. Shokkiisakka'a hincaa'akkam kitim shokkaa beeddeebe'i afeebe'e uullukkoyyo.

²⁹Kitima hincaa'immi bax beeddu ammanenne adil Hizqiyaasii ee beyyonne hee'u mannii hundim guruphphaa Waa'ina otossukko.

³⁰Adil Hizqiyaasii minaadaphphi awwonsaanii hundim Daawiitii hiraagaanchi Asaafii fissito'i galaxxi mazmuura Leewi'i oos Waa'i lombina zammattona ijaajjo'o. Ee bikkina hundim aad heeshita'a otossitu'uuyyi lobakat liiranchinne zammattam hee'llo'o.

³¹Ee lasage adil Hizqiyaas minaadabina «Kaba ki'nnuwwi gaga Waa'ina keessakko'oohan ihu bikkina Waa'ina galaxxi kitimaa mulli kitimaa hundam Keesammi Mine eebbehe» yukko. Ixxuwwim adil ijaajukkisam issito'o. Mat mat keenim ixxuwwi gaqqi doo'llinne shokkiisakkam kitimina ihoo fooraam diinate eebbo'o.

³²Ee'isinne Waa'ina shokkiisakka'a hincaa'akkam kitim ihaa hincihona eebbo'i fooraam diinaxxek xig hundim lamarayyi moolluwwa, xibbi gereebbi ambulluwwaa lam xibbi gereebbi geexxuwwaa hee'ukko.

³³Odim mateeyyoo'm kitimina annanni ihu diinaxxek xig loh xibbi moolluwwaa sas xibbi gereebbi ambulluwwaa hee'ukko.

³⁴Ee diinate hundam dutta'a omachcho coo'llam qeessuwwik xig hoffan hee'u bikkina see'llisinne muccutto'i qeessuwwi guddeebe'i afeebe'e Leewi'i oos hara'mmitam hee'llo'o. Leewi'i oos qeessuwwiinsi loboka xabbeen wodaninne keesanteena guddo'oo keen hee'llo'o.

³⁵Shokkoo kitiminne maqire hincoo mateeyyoo'm kiti'm di'irii aggi kitimii exxaa shokkiisakkam kitim hore'em lobakata hee'ukko. Ee'isinne Keesammi Minenne awwaadimmi ogor odim asheeramukko.

³⁶Adil Hizqiyaasii minaadabii ku hundim qaqisaa ihoo'isina Waa'i hara'mmu bikkina lobakata liiranto'o.