Read Hadiyya 2Agannuwwi Kitaaba 3 Bible Online

2Agannuwwi Kitaaba 3 - Hadiyya bible

2Agannuwwi Kitaaba 3

¹Salamoonim Yerusaaleemanne Waa'i ixxi anni Daawiitina moo'amu Mooriy duunanne Iyyaabuus Oorin oodo'onne Daawiit gudisaa hee'u beyyonne Waa'ika Keesammi Mine baximma asheerukko.

²Salamoonim adil ihu soo'l hiinchaannonne la'm aga'n la'm ballanne Keesammi Mine baximma asheerukko.

³Salamoon baxiseena asheeru Keesammi Min gaassi keennaanchonne qeeraa'lloom lohayyi anga dufaachchi lammiyyi anga hee'ukko.

⁴Keesammi Mine aagakkam goocik qeeraa'lloom 20 anga uullichchim 20 angi hee'ukko; woro'l kollom muccur worqinne goolabukko.

⁵Keesammi Mi'nnaka lob mine hoominne baxaa muccur worqinne goolabaa ixxi hanennem dimbaabaa chimchimaa labo misilluwwa baxukko.

⁶Keesammi Minem bito xee'aalli kinninne wereeggisukko; awwaaxxu worqim Faarwaayaa yakkam uulliinsi waaraakkoohan hee'ukko.

⁷Keesammi mi'nneka farashshaancho, gooccuwwa, gorte'ee xuffuwwaa worqinne goolabukko. Gorte'uwwannem kiruubee'l misila baxukko.

⁸Ee'isam Keesammiinsi Keesammi beyyo baxukko. Ixxekim qeeraa'lloom Keesammi Mi'n qeeraa'lloomisam lamiyyi anga, haraaroomim lammiyyi anga hee'ukko. Ee Keesammiinsi keesammi mi'nnekam woro'l gorte'e 20,400 kiilo'i muccur worqinne goolabukko.

⁹Musmaara baxisimmina onti xibbee lamarayyi giraamaa ihoo qax worqa guullukko. Fooq baxxanchuwwi woro'l gortannam worqinne goolabukko.

¹⁰Keesammiinsi Keesammi beyyonne kiruubeelluwwi misi'lleka lamo baxisaa muccur worqinne goolabisukko.

¹¹Tochchiinsi tochchi afeebe'e biddiqu kiruubbuwwik lad lamiyyi angi hee'ukko. Luxxi kiruubee'llek mat lad onti angi ihaa Keesam Mi'n gorte'e nakkookko; odim mulli lad onti angi ihaa mulli kiruubee'l lado nakkookko.

¹²Ee'isam la'm kiruubee'l ladim onti angi ihaa e kolli gorte'e nakkookko; la'm ladim e kiruubee'l lado nakkookko.

¹³Ee biddiqu kiruubbuwwi lad lamiyyi angi ihaa illi kolloom Keesammi Mi'n lob mi'n kolli daba'llaa hee'ukko.

¹⁴Keesammiinsi Keesammi beyyinam talbi danaam fatirinne baxamaakkoo du'm eddechchi hee'ukko. Ee du'm eddechchikim hagar shaano'oo kuulaa ihaa ixxi hanennem kiruubee'l misil baxamaakkoohan hee'ukko.

¹⁵Salamoon uullichchi sadee onti angaa ihoo lam utubbuwwa baxaa Keesammi Mi'n illagenne uullisuko. Ee utubbuwwi ludonne onti anga ihoo lam goobinaanchi annannichchonnem hee'ukko.

¹⁶Chimchima illaanchisa dadaa utubbuwwi ludonne issukko. Naas xaarinnem roomaana laboo mat xibbi misilluwwa baxaa ee chimchimmuwwanne issukko.

¹⁷Utubbuwwam Keesammi Mi'n illagenne lamem shiininnem uullisukko. Woroo'n qarinne uullu utuba Yaakiina hanaa'n qarinne uullu utuba Boo'eeza [1] yakkaman hee'ukko.