Read Hadiyya 2Agannuwwi Kitaaba 30 Bible Online

2Agannuwwi Kitaaba 30 - Hadiyya bible

2Agannuwwi Kitaaba 30

¹Ixxuwwi gaga keesso'oo lobakat qeessuwwi hee'llobee'i bikkinaa Yerusaaleemannem lobakat manni wixxubee'i bikkinaa higimmi uguda illagee'nnisam luxxi agananne lonsiteena xanto'oyyo. Ee bikkina adil Hizqiyaas, gassaanii Yerusaalee'm minaadabii higimmi uguda la'm agananne lonsiteena iittanto'o. Ee bikkina adil hundem Isra'ee'llekii Yihuxxekii ee'isam Efireem sullikii Minaas sulli minaadabii Isra'ee'l Moollanni ihu Waa'i lombina Yerusaaleemanne yoo Keesammi Mine waatta'a higimmi uguda baxxantona askitaaba asse'ukko.

⁴Adilii minaadabim ee woshshanne lobakata liiranto'o.

⁵Waa'i ijaaccisinne Isra'ee'l Moollanni Waa'ik higimmi ugud lobakat ammanina lobakat minaadabinne lonsamu bee'i bikkina adilii minaadabii hanaa'n qarinne Daaniinsi ki'isaa woroo'n qarinne Bersaabe'i afeebe'e hee'llam Isra'ee'l minaadab hundim Yerusaaleemanne wixxita'a higimmi uguda lonsitamisina alallaatamona qooddo'o.

⁶Adi'l ijaaccisinne ad'llekaa adi'l gassaan ikko'i gassaa'nnekaa kid yoo asso amadda'a asse'amaan Isra'ee'l uullaa Yihuxxi uullaa hundam matto'o. «Isra'ee'l minaadaba, Aasoo'l adilluwwi angiinsi xottakka'a gattakko'i ki'nnuwwi kolli daba'llona ki'nnuwwim Abrihaaminaa Yiisaaqinaa Yaaqoobinaa Moollanni ihu Waa'i kolli daba'llehe.

⁷Ki'nnuwwina Moollanni ihu Waa'ina amma'nnantobee'i ki'nnuwwi gaassi anno'isaa ki'nnuwwina abbaayyuwwi ikko'i Isra'ee'l minaadaphphisaa ikkakkotte. Ki'nnuwwi laqqakkamisam Waa'i ixxuwwa bichchina higisaa uwwaakko.

⁸Ki'nnuwwi Waa'ina ijaajammehe bagaan ixxuwwisa wodan duudaakkoo keen ikkakkotte. Ki'nnuwwi gaga Waa'ina uwwehe. Waa'i heer heerina keesu ixxi mine waallehe. Kanniinsi eehid Waa'ik qoxxaalli quunqi ki'nnuwwanne hanenne dilloobee'isa xale'i ixxena otossi'llehe.

⁹Ki'nnuwwi Waa'i kolli daba'llitakkolas ki'nnuwwi Moollanni Waa'i biijaallaa qishixoohanee ihu bikkina ki'nnuwwi abbaayyuwwii ki'nnuwwi oosii ixxuwwa qeefaddo'i kee'n illagenne qishixxato siiddamo. Ka uullam daba'llita'a waattamo. Ki'nnuwwi Waa'i kollonne daba'llitakkolas ixxi ille ki'nnuwwiinsi dabarooyyo.)

¹⁰Asse'amaanim Efireemaannonnee Minaas sulli uullannee hee'oo beero'uwwi hundam matta'a Zaabiloo'n sulli hanaa'n qar afeebe'e affo'o. Ihukkaarem oo minaadab gadda'a osatto'oo naacco'oo.

¹¹Ihukkaarem Aseer sulliinsi, Minaas sulliinsii Zaabiloo'n sulliinsii hofqax mannim ixxuwwi gaga heeshaa'lla'a Yerusaaleema waatto'o.

¹²Ee'isam adilii minaadaphphi gassaanii Waa'i saga'llisanne ijaajjo'i luwwa wonshitona Yihuxxi mannina Waa'i mat wodano uwwam hee'ukko.

¹³La'm agananne qorosho'i uguda lonsiteena lobakat minaadab Yerusaaleemanne wixxito'o.

¹⁴Yerusaaleemanne hee'u mulli waa'uwwina kitima kitimakkam beyyoo aduruusa wiriissakkam beyyoo hundam ki'issa'a massita'a Qeedroo'n cebbanne uunjito'o.

¹⁵La'm agan aagu tommonnee soor ballannee higimmi ugudina gereebbi geexxuwwa kitim issita'a dutto'o. Ee ammane ixxuwwi gaga keessobee'i qeessuwwii Leewi'i oosii lobakata tuutto'o. Ee bikkina ixxuwwi gaga Waa'ina keesso'o. Ee lasage Keesammi Minenne shokkiisakka'a hincaa'akkam kitima hincaa'lleena xanto'o.

¹⁶Waa'i manchi hee'u Muse'e uwwu see'l awwonsisanne Keesammi Minenne ixxuwwina qoodamu beyyonne uullito'o. Leewi'i oosim kiti'm xiiga qeessuwwina uwwito'aare ixxuwwi odim kit'm hanenne wixxo'o.

¹⁷Minaadabiinsim lobakat keen ixxuwwi gaga keessobee'i keen hee'llo'i bikkina higimmi uguxxi gereebba dutteena xanto'oyyi hee'llo'o. Ee bikkina Leewi'i oos ixxuwwi bikkenne dutta'a Waa'ina kitim issita'a hincaa'llo'o.

¹⁸Ee'isam Efreem sulliinsi, Minaas sulliinsi, Zaabiloon sulliinsii Yisaakoor sulliinsii waatto'i lobakat manni ixxuwwi gaga keessobee'i keen ikko'i bikkina higimmi uguda laboo'isinne lonsito'oyyo. Adil Hizqiyaasim ixxuwwi bikkina

¹⁹«Ku manni see'llisinne muccuttobee'aarem ixxuwwi anno'ina Moollanni Waa'a keese haseena ixxi wodano ki kollonne dabaroo keen hundina biijaalli Waa'a at haafihe» yaa uunxukko.

²⁰Waa'im Hizqiyaas uunxato macceesukko. Minaadabam fayyiisukko.

²¹Yerusaaleemanne wixxita'a hee'llo'i minaadabim qorosho'i uguda lamar balla hundam lobakat liiranchinne lonsito'o. Leewi'i oosii qeessuwwii hundem ballam mazmuura zammarakkam mu'utinne zammatu'uuyyi Waa'a galaxxitam hee'llo'o.

²²Hizqiyaasim Waa'ina otossimmi siyya'a erisa awwonsimminne ixxuwwi lachcha moo'isso'i Leewi'i ooso galaxxukko. Minaadabim ixxuwwi gaassi anno'i Moollanni Waa'i lombina lamar balla mateeyyoo'm kitima hincaa'lla'ahii itta'ahii lasage

²³Odim edda'a lamar balla ee uguda lonsiteena mat ikka'a iittanta'a lasage liiranchinne lonsito'o.

²⁴Adil Hizqiyaas mat kum moolluwwaa lamar kum gereebbaa fella'aa dutta'a ittona minaadabina uwwukko. Minaadaphphi gassaan odim mat kum moolluwwaa tommi kum gereebbaa fella'aa uwwito'o. Xigo lobakat qeessuwwim ixxuwwi gaga Waa'ina keesso'o.

²⁵Ee bikkina hundem Yihuxxi minaadab, Qeessuwwi, Leewi'i oosii hanaa'n qarinne yoo Isra'eeliinsi waatto'i mannii Isra'ee'l uullannee Ayihuxxi uullannee hee'llam waaraanii hundim lobakata liiranto'o.

²⁶Daawiit beet Salamoon doolliinsi ki'isaa kaballi afeebe'e kido'i ugud Yerusaaleemanne ihaa la'oobee'i bikkina Yerusaalee'm beero'i manni lobakata liiranto'o.

²⁷Qeessuwwii Leewi'i oosii uullita'a minaadaba maasse'llo'o. Waa'im keesammi ixxi minenne iimanenne ihaa ixxuwwi uunxato macceesukko.