Read Hadiyya 2Agannuwwi Kitaaba 31 Bible Online

2Agannuwwi Kitaaba 31 - Hadiyya bible

2Agannuwwi Kitaaba 31

¹Ee lasage ee ugudanne hee'llo'i Isra'ee'l minaadab hundim hundem Yihuxxi beero'uwwam matta'a kininne baxamaakkoo otossakkam beyyuwwaa Asheera yakkam qophpha'n waa'uwwi misilluwwaa hundam iiqansito'o. Ee'isam Yihuxxaannonne, Biiniyaamaannonne, Efireemaannonnee Minaas uulluwwannee hee'u otossakkam beyyuwwaa kiti'm beyyuwwaa gindito'o. Isra'ee'l oos ee hundam bi'issa'a lasage ixxuwwi gaqqi beero'uwwaa uullaa daba'llito'o.

²Adil Hizqiyaas Keesammi Mi'n illagenne shokkiisakka'a hincaa'akkam kitimaa mateeyyoo'm kitimaa hincaa'llonaa, Waa'ina awwaaddona, ixxom galaxxitonaa mazmuurinne lonsitonaa qeessuwwaa leewe'i oosoo annannichchom laboo'isinne awwaaddona uullisukko.

³Waa'i see'llisinne hundi ammanem daraa maaro'oo shokkiisakkam kitiminaa usheexxaxxi ayyaammuwwannee aga'n aagguwwannee qoodamaa la'amaakkoo mulli ugudduwwannee hincoo kitiminaa ihoo gereebbaa mulli fooraam diinatee adil Hizqiyaas ixxi gaqqi amaxxiinsi uwwam hee'uko.

⁴Odim qeessuwwii Leewi'i oosii ixxuwwina yoo ammane hundam Waa'ika seeraa ijaajoo awwaadonne hosissona ixxuwwina uwwimmi hasisoo luwwi hundam Yerusaalee'm minaadab uwwitamisina adil ijaajukko.

⁵Isra'ee'l minaadabim ee adi'l ijaajo macceesso'isam woyi'n diqaasika, wee'l zayixxeka, maraphphekaa mulli hurbaaxxi mishikaa hundikam doo'llamaakkoo ludo aa'lla'a uwwito'o. Ixxuwwina yoo luwwi hundiinsim tommiinsi mato fissita'a uwwito'o.

⁶Yihuxxi beero'uwwanne hee'llam Isra'ee'llekii Yihuxxi minaadabii gereebbiinsi, fella'iinsi, mulli fooraam diinatiinsii ee'isam ixxuwwi Moollanni Waa'ina annanni issito'i luwwi hundiinsi tommiinsi mato eebba'a tuubbo'o.

⁷Uwwimmam asheetto'ok saxxi aganannette ihaa lama'l agananne eebba'a guullito'o.

⁸Adil Hizqiyaasii minaadaphphi gassaanii waatta'a uwwakko'i luwwi lobakata tuubamaakkoo moo'lla'a Waa'a galaxxito'o; Isra'ee'l minaadabam maasse'llo'o.

⁹Hizqiyaasim qeessuwwaa Leewi'i oosoo ee tuubbi bikkina xa'mmukko.

¹⁰Saadooq shumo'iinsette ihoo hundiinsi lob qeessichchi Azaariyaasim dabaraa «Minaadab tommiinsi mato Keesammi Mine eebimma asheetto'aanniinsi kid niina ihoo qax hurbaata siindaammo. Niinniisem ihaa gataakko; Waa'i Minaadaba maasse'u bikkina ka hundam lobakata siindaammo» yukko.

¹¹Adil Hizqiyaasim Keesammi Minenne gootara baxxona ijaajukko; ixxuwwim baxxo'o.

¹²Tommiinsi mato, ludoo keesamaakkoo uwwanchuwwaa hundam ee gootaranne amma'nnanchinne dissito'o. Ee gootaram egarimmina Leewe'i shumo'iinsetti ihu Konaanyi doo'llamukko; ixxi abbaayyi Shiimi'im ixxo bikkoo egeraanchi ihukko.

¹³Ixxuwwi awwonsiinsi woroon ikka'a baxxam keen Leewi'i oosiinsi tommi doo'llanto'o. Ixxuwwi summim Yihii'eelatte, Azaaziyatte, Naahaatatte, Asaaheelatte Yiriimootatte, Yoozaabaadatte, Eeli'eelatte, Yusmaakiyatte, Maahatattee Baanaayattee hee'llo'o. Ixxuwwa hundam doo'llito'i keen adil Hizqiyaasattee qeessuwwa awwonsaanchi Azaariyaasattee hee'llo'o.

¹⁴Eelliinchi firoo kollinne Keesammi Mi'n gooca egaraa'n awwonsaanchi hee'u Leewi'i sulliinsette ihu Yumin beet Qore'ena odim Waa'ina hincoo gaqqi doo'llinne uwwamoo luwwa hundam aa'immikii baxxansimmikii dannoommi uwwamukko.

¹⁵Qeessuwwi hee'llam beero'uwwanne ixxuwwina abbaayyuwwi ikko'i keenina hooffaanninaa lobaanninaa hundinam amma'nnanchinne baxxansimminne Qore'ena hara'mmitam hee'llo'i keen Edenatte, Miiniyaamiinatte, Iyyaasutte, Shamaa'iyatte, Amaariyattee Shakaaniyattee hee'llo'o.

¹⁶Ee'isam ixxuwwik summi ixxuwwi moollisinne kitaabamukkisanne annanni annanni baxina Keesammi Mine balli hundam aaggam umur sas hiinchoo sas hiinchiinsi hanaanii ihu goo'n oosina hundinam uwwamu bax sharaxxisinne baxxansitam hee'llo'o.

¹⁷Ee'isam ixxuwwi moollisinne xiganto'i qeessuwwinaa umur lamiyyee eehanninsi hanaanii ihu Leewi'i oosinaa ixxuwwina uwwamu baxisinnee qoodo'isinnee baxxansito'o.

¹⁸Ku Qeessuwwii Leewi'i oosii ixxuwwi gaga keesso'oo keenoo amma'nnanto'oo keenoo hee'llo'i bikkina ixxuwwi meentinnee oosinnee ixxuwwi gassitam hee'llo'i manni hundinnee maqire kitaabantam hee'llo'o.

¹⁹Aaroon shumo'ina uwwamu beero'uwwanne te'im ee beero'i hegeegguwwanne hee'oo allaachchi biilluwwanne hee'llam qeessuwwiinsi qeessuwwi abaroosinaa ixxuwwi summi ixxuwwi moollisinne kitaabamukkisanne Leewi'i goo'n oosinaa baxxansiteena doo'llanto'i manni hee'llo'o.

²⁰Adil Hizqiyaas Yihuxxi uulli hundannem Moollanni Waa'a liiransoo er baxo baxukko.

²¹Keesammi Mi'n awwaadina te'im seeraa ijaajoo egerimmina ixxi baxu bax hundim ixxi Moollanni Waa'a wo'm wodaninnee Keesammi Mi'n bikkina to'achchimminnettee hee'u bikkina ixxena hundem luwwim taaphanukko.