Read Hadiyya 2Agannuwwi Kitaaba 34 Bible Online

2Agannuwwi Kitaaba 34 - Hadiyya bible

2Agannuwwi Kitaaba 34

¹Iyyoosiyaas umur sadeenti hiincho ihaakkoohaannonne Ayihuxxi uullanne adil ihukko. Ixxi heechchi beyyom Yerusaaleemanne issaa sadee mat hiinchoo gassukko.

²Iyyoosiyaas Waa'i illagenne er baxo baxukko. Ixxi anni Daawiitika er googo awwonukko; ee googiinsi makkannem qeddannem daba'llukkoyyo.

³Iyyoosiyaas adil ihu sadeenti hiinchonne woraadichchi hee'ukkuuyyam ixxi anni Daawiitika Waa'a hasukko. Tommonnee la'm hiinchonnem duunnuwwanne otossakkam beyyuwwa, Asheer misilluwwa, qophpha'n waa'uwwaa bukkakka'a anginne baxakko'i misilluwwaa Yihudiinsii Yerusaaleemiinsii bi'isimma asheerukko.

⁴Ixxi ijaajinnem Ba'aalina kitima hincaa'akkam beyyuwwa, gindansito'o; ixxim eekee'n hanenne hee'u aduruusa wiriissakkam beyyuwwa iiqansukko. Asheer misilluwwa, qophpha'n waa'uwwaa anginne baxamu misilluwwaa xaansukko; eehid issaa lasage eekka massaa ee keenina kitimtam hee'llo'i kee'n waammanne binnaa'ukko.

⁵Ee beyyuwwanne awwaaddam qeessuwwi miqem ixxuwwi kiti'm beyyuwwannem shokkiissukko. Yihudaa Yerusaaleemam ee'isinne muccussukko.

⁶Minaasika, Efreemikaa Simi'oonikaa ee'isam Niftaaleem beero'uwwaa eekee'n kululleetanne gindamaa beyyuwwaa hundam muccussukko.

⁷Kiti'm beyyuwwa gindukko; Asheer misilluwwaa, qophpha'n waa'uwwaa xaansukko; Isra'ee'l uullanne hundannem hee'u aduruusa wiriissakkam beyyuwwa bi'isukko. Ee lasage Yerusaaleema daba'llukko.

⁸Iyyoosiyaas adil ihu tommonnee sadeenti hiinchonnee ixxi uullaa Keesammi Minee muccussaa lasage Axaaliy beet Saafaana beero'i gassaanchi hee'u Maa'iseeya, Yoo'ahaaz beet kitaabaanchi Yo'aahinaa ixxi Moollanni Waa'ika Keesammi Mine areessa'a baxxona asse'ukko.

⁹Ixxuwwim hundiinsi lob qeessichchi hee'u Hilqiy beyyo matta'a Keesammi Minina wixxaa hee'u diinate uwwito'o. Ee diinatem Waardiyyuwwi hee'llo'i Leewi'i oos Minaasaanniinsi, Efreemaanniinsii mulli Isra'ee'l minaadabiinsii hundiinsim ee'isam Yihuxxaaniins, Biiniyaam minaadabiinsii Yerusaaleemanne hee'oo keeniinsii wixxaa'llo'oohan hee'ukko.

¹⁰Oo diinatim Keesammi Mine areesseena doo'llanto'i keenina uwwamukko; ixxuwwim ee diinatiinsi Keesammi Mine areessa'a baxxo'i keenina miqqo'o.

¹¹Ee'isam Yihuxxi adilluwwi gindita'a hee'llo'i mine baximmina ihoo cabbarammi kina, farashshaanchoo lamejji haqqaa aa'llona kin cabbaraaninaa anga qoor keeninaa uwwito'o.

¹²Oo keenim ee baxo amma'nnamaakkoo'isinne baxxo'o. Ixxuwwam ijaajjamok Leewi'i shumo'i ihu Meeraar moolliinsi Yahaatattee, Abdiyattee, Qa'aat moolliinsim Zakkaaryaasattee Mashulaamattee hee'llo'o. Mazmuu'l mu'uta lellimma laqqam Leewi'i oos hundim

¹³mu'uta gugguuttam keeninaa annanni annanni baxo baxxam keeninaa awwonsaanoo ijaajaanoo hee'llo'o. Ee'isam mulli Leewi'i oos kitaabaano, gassaanoo waardiyyuwwaa hee'llo'o.

¹⁴Keesammi Minenne wixxaa hee'u diinate fissitu'uuyyi qeessichchi Hilqiy Waa'i Muse'enne ihaa uwwu See'l Kitaaba siidukko.

¹⁵Hilqiyim kitaabaanchi Saafaanina «See'l kitaaba Keesammi Minenne siidaammo» yukko. Ee kitaabam Saafaanina uwwukko.

¹⁶Saafaanim ee kitaaba adi'l beyyo massaa adilina «At neese ijaajji luwwi hundam issinoommuulla.

¹⁷Keesammi Minenne wixxaa hee'u diinatem massinaa awwonsaaninaa baxaaninaa uwwinaammo» yukko.

¹⁸Odim kitaabaanchi Saafaan adilina «Qeessichchi Hilqiyina mat kitaaba uwwaakko» yukko. Ee kitaabam adilina qananaa'ukko.

¹⁹Adilim ee See'l sagara macceesaa eddechcha deree'llukko.

²⁰Adilim ee lasage Hilqiyina, Saafaan beet Ahiiqaamina, Mikkiyaas beet Abidoonina, Adilla'n mi'n kitaabaanchi Saafaaninaa adillina hincixxi awwaadaanchi hee'u Asaayinaa

²¹«Mattakka'a i bikkinaa Yihudannee Isra'eelannee gatu minaadaphphi bikkinaa Waa'a xa'mmehe. Ka kitaabanne yoo losa'n bikkina la'issehe. Gaassi niyyanno'i Waa'i sagarina ijaajancha hoogimminnee ku kitaab yookkoka wonshimma hoogimminnee Waa'i ixxi quunqa neesenne diilliisaakko» yoo ijaajo uwwukko.

²²Hiilqiyii gatto'i mulli mannii adil ijaajukkisinne Yerusaaleemanne la'm baxxanchanne hee'llam Huldaa yamantam hiraagaanchi meentichchi beyyo ee asse'anto'i woshshi bikkina matta'a xa'mmito'o. Is manchim Tiiqiwaa'i beet Harhaas beet beet Shaaluumatte hee'ukko. Ixxim Keesammi Minenne hee'oo eddechchuwwa egeraanchi hee'ukko. Oo mannim ee hiraagaanchona woshshi hundam caakkissa'a kutto'o.

²³Isem ixxuwwina dabatta'a «Ki'nnuwwa i beyyo asse'u adi'l beyyo daba'llitakka'a mattakka'a kanniinsi woroon yoo waa'i sagara kullehe» yito'o.

²⁴Oo sagarim «An Waa'i Yihuxxi adilina qanannaatamu kitaab woronne yoo duunchinne Yerusaaleemaa ixxi woronne yoo minaadabaa hundam guzumo'oommo.

²⁵Ixxuwwi eese utta'a mulli minaadab waa'uwwina kitima hincaa'llo'ookko. Oo ixxuwwi baxxo'i jor baxim an quuqoommisa issaakko. Yerusaaleemanne quuqummi i quunqi aphphookko bagaan Xoo'ooyyo.

²⁶Waa'a xa'mmeena ki'nnuwwi asse'u Yihuxxi adilina ‹At macceessitti saga'l bikkina Isra'ee'l Moollanni Waa'i

²⁷An Yerusaaleemaa ixxi minaadabaa hinkid guzumo'oomda'e macceessaa lasage ki gaga sholliissaa ki eddechcha dereettaahii wi'llitaahii baaxiilo biira yitti bikkina ki uunxato an macceesaammo.

²⁸At foorinne hee'llittuuyyi Yerusaaleemanne bichchi ihoo'isa issoommoyyo. At xumminnem letoo'isa issoommo› yoolla» yoohan hee'ukko. Mannim ee asso amadda'a adil Iiyoosyaas beyyo daba'llito'o.

²⁹Adil Iyyoosiyaas Yihudiinsii Yerusaaleemiinsii la'anto'oo lommanna wixxitamisa issukko.

³⁰Adilim ixxuwwinne maqirem qeessuwwaa Leewi'i oosoo mulli minaadabam goddaanoo buxaa hundam edaa amadaa Keesammi Mine marukko. Adilim Keesammi Minenne siidamu Hidi'l Saga'l kitaabanne yoo sagara hundam minaadabina qananaa'ukko.

³¹Adilim ki'aa adilluwwi utuphphi gadanonne uullukko. Ixxim Waa'ina ijaajameenaa ixxi wo'm wodaninnee wo'm sawwitinnee Hidi'l Saga'l kitaab woronne yoo ijaajoo seeraa hundam egereenaa ijaajameenaa Waa'i illagenne hidi'l sagara aagukko.

³²Ee lasage odim Biiniyaam uulli mannii Yerusaaleemanne hee'llo'i mannii hundim ee woshshanne sagara aaggamisa issukko. Ee'isinne Yerusaalee'm minaadab ixxuwwi gaassi anno'ina Moollanni ihu Waa'inne aaggo'i hidi'l sagar xa'mmoo luwwa hundam wonshito'o.

³³Adil Iyyoosiyaasem Isra'ee'l uullanne hee'u haashaarammi waa'uwwa hundam bi'isukko. Isra'ee'l minaadab hundim ixxuwwi Moollanni Waa'ina awwaaddamisa issukko. Minaadabim ixxi adilla'n doollenne hundannem ixxuwwi gaassi anno'i Moollanni Waa'iinsi qee'llukkoyyo.