Read Hadiyya 2Agannuwwi Kitaaba 36 Bible Online

2Agannuwwi Kitaaba 36 - Hadiyya bible

2Agannuwwi Kitaaba 36

¹Ayihuxxi minaadabim Iyyoosiyaas beeto Yoo'ahaaza doo'llita'a anni beyyonne Yerusaaleemanne adil ihoo'isa issito'o.

²Ixxim umur lamiyyee sas hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa sas agana gassukko.

³Gibxi uulli adil Niikaa'i ixxo qeefadaa massukko. Ayihuxxi mannim sas kumaa soor xibbi kiilo'oo ihoo xaa'l biraa sadee soor kiilo'oo ihoo worqaa gibitamisa issukko.

⁴Niikaa'im Yoo'aahaazina abbaayyi Eeliyaaqeema Yihuxxi uullannee Yerusaaleemannee adil issukko. Ixxi summam dabaraa Yoo'aaqeema yaa fissukko. Ihukkaarem Yoo'ahaaza qeefadaa Gibxi uulla massukko.

⁵Yoo'aaqeemik umur lamiyyee onti hiinchoo ihaakkoohaannonne Yihuxxi uullina adil ihukko. Ixxi heechchi beyyom Yerusaaleemanne issaa tommoo mat hiinchoo gassukko. Ixxi Moollanni Waa'i illagennem jor luwwa issukko.

⁶Baabiloo'n uulli adil Nabukadanaxoorim Ayihuxxi uullanne weeraraa amadaa lasage Yoo'aaqeema qeefadaa naas xaarinne baxakko'oo chimchiminne karaa Baabiloo'n uulla massukko.

⁷Nabukadanaxoorim Keesammi Mi'n mu'uta bogaa massa Baabiloo'n uullanne hee'oo ixxi adilla'n minenne dissukko.

⁸Adil Yoo'aaqeem baxu luwwi hundim ixxuwwik shigigaa'oo losanii baxu jor baxii exxaa Isra'ee'llaannonnee Yihuxxi adilluwwi aganni doonannee kitaabamaakko. Ixxi beyyonnem ixxi beet Ikooniyaan adil ihukko.

⁹Ikooniyaan umur tommoo sadeenti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa sas aganaa tommi ballaa gassukko. Ixxim Waa'i illagenne jor luwwa issukko.

¹⁰Adil Nabukadanaxoorim fiitti agananne Ikooniyaana karaahii Keesammi Mi'n mu'uta bogaahii Baabiloo'n uulla massukko. Ee lasage odim Ayihuxxi uullannee Yerusaaleemannee Ikooniyaan abbaayyo Sedeeqiyaasa adil issukko.

¹¹Sedeeqiyaas umur lamiyyee mat hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa tommoo mat hiinchoo gassukko.

¹²Ixxim ixxi Moollanni Waa'i illagenne jor luwwa issukko. Waa'i sagara ixxena kuru hiraagaanchi Ermiyaas illagennem ixxi gaga aad heesha'ukkoyyo.

¹³Sedeeqiyaas ixxena amma'nnamaakkoohan ihoo'isina Waa'i summinne hidiisaa hee'u adil Nabukadanaxoorinam boqqukko. Saxximminnem Isra'ee'l Moollanni Waa'i kolli daba'llimma sabaa xiiqqamukko.

¹⁴Odim qeessuwwi awwonsaanii minaadabii hundim qophpha'n waa'uwwina otossitu'uuyyi ixxuwwi kululleetanne hee'llam hanqo'i Waa'a laqqambee'i minaadaphphi jor googonne matto'o. Waa'i ixxi gagim keesu Keesammi Minem bushisso'o.

¹⁵Ixxuwwi anno'ina Moollanni ihu Waa'im minaadabinaa ixxi mininaa qishixxu bikkina qoxxissa'a kuttamisina hiraagaano edaa, edaa asse'ukko.

¹⁶Ihukkaarem ixxuwwi Waa'i quunqi ixxuwwi hanenne iheebe'i afeebe'ee ixxi kee'mmaalli quunqiinsi gibba'a xotteena xantambee'i afeebe'ee Waa'i asse'ammaanonne naacanto'o. Ixxi sagaram gadda'a ixxi hiraagaano sholliissam hee'llo'o.

¹⁷Ee bikkina Waa'i ixxuwwi hanenne Baabiloo'n uulli adila eebukko. Ixxim Keesammi Minenne hee'llo'i keen gatoo'n Ayihuxxi uullanne hee'llam manna hundam bisa'inne shaa guullukko.

¹⁸Ixxim Keesammi Mi'n mu'utaa amaxxaa adi'l gassaa'n amaxxaa hundam bogaa Baabiloo'n uulla gugguurukko.

¹⁹Keesammi Minee Yerusaalee'm beero'om adila'n minneewwinnee woronnee yoo luwwi hundinnee shokkiisukko beero'i ootam gindansukko.

²⁰Bisa'inne letoo'n gatto'i qaxam qeefadaa Baabiloo'n uulla massukko. Ixxuwwim ee uullanne agid ikka'a adil Nabukadanaxoorinaa ixxi shumo'inaa Faariis uulli adilluwwi adil ki'eebe'i afeebe'e awwaaddo'o.

²¹Ee'isinne Waa'i gaassaa hiraagaanchi Ermiyaasinne «Minaadab Usheexxaxxi balla lonsimma sabu bikkina ku uulli lamarayyi hiinchina udma'i ihaa gatoo bikkina usheexxaxxi balli usheexxato siidookko yamamaa wocamu sagar wo'mmukko.

²²Waa'i hiraagaanchi Ermiyaasinnetti ihaa wocu ixxi sagar Qiiroos Faariis uulli adilluwwi adil ihu luxxi hiinchonne wo'mmukko. Waa'im kanniinsi woroon yoo alallaatto adil ixxi adilla'n uullanne hundannem alallaatisoo'isaa kitaabaa minaadab hundinam la'isoo'isaa issaa Qiiroosa ki'isukko.

²³Alallaaxxi sagarim «Faariis uulli adilluwwi adil Qiiroosim ‹Eese iima'n Moollanni Waa'i uulli adilluwwi hundam iina uwwaakko. Yihuxxi uullanne yoo Yerusaalee'm beero'onnem ixxena Keesammi Mine baxona ijaajaakko. Ee bikkina ixxi minaadabiinsi ki'nnuwwi lambe'enne hee'ookkok ayyi manchim Yerusaaleema marona. Ixxena Moollanni ihu ixxi Waa'im ixxenne maqir ihona› yoolla» yoohan hee'ukko.