Read Hadiyya 2Agannuwwi Kitaaba 4 Bible Online

2Agannuwwi Kitaaba 4 - Hadiyya bible

2Agannuwwi Kitaaba 4

¹Salamoon qeeraa'lloom lamiyyi anga dufaachchoomim lamiyyi anga uullichchi tommi anga ihoo kit'm beyyo naas xaarinne baxukko.

²Ee'isam midaad tochchiinsi tochchi afeebe'e tommi anga uullichchi onti anga ihoo jaalo'o bukkamaa daadu xaarinne baxukko. Ixxekim kululleet sad anga hee'ukko.

³Ee jaalo'i suumiinsi woroon lam ogoranne baxamaakkoo tommi moolluwwi misil hee'ukko. Oo moolluwwi misilluwwim ee jaalo'inne mat ihaa baxamaakkoohan hee'ukko.

⁴Oo jaalo'i tommonnee lam moolluwwannee uullaakkoohan ihaa ee moolluwwikim sas hanaa'n qaranne sas eelliinchi aagganne sas woroo'n qaranne sas eelliinchi firanne ille dabaraakkoohan hee'ukko. Hundikim afaree'n kolli lambe'enne daba'llaakkoohan hee'ukko.

⁵Ee jaalo'ikim gumu'llaalloom mat taachcho'i ihaa suum odim kubbaayyi suume te'im suuf fiita laboohan hee'ukko. Oo jaalo'im 60,000 liitir wo'o amadoohan hee'ukko.

⁶Odim Salamoon aanshaqqakkam gabatika tommo baxisaa ontoo Keesammi Miniinsi hanaa'n qarinne ontoo woroo'n qarinne dissukko; oo gabattuwwim shokkiisakka'a hincaa'akkam kitimina ihoo luwwi hundim aanshamoo beyyi hee'ukko. Lob jaalo'onne yoo wo'im qeessuwwi aanshaqqoohan hee'ukko.

⁷Ixxim baxina uwwamu awwonsisanne tommi caakka dissakkam mu'uta worqinne baxisaa Keesammi Minenne onto hanaa'n qarinne onto odim woroo'n qarinne dissukko.

⁸Ee'isam tommi xaraphpheezzuwwa baxisaa Keesammi Minenne onto hanaa'n qarinne onto odim woroo'n qarinne dissukko. Odim edaa mat xibbi loqooqo'i saahinnuwwa worqinne baxisukko.

⁹Qeessuwwina wixxixxi beyyo baxukko; ee'isam lob wixxixxi beyyoo gooccuwwaa baxaa ee gooccuwwa naas xaarinne goolabukko.

¹⁰Jaalo'oomam Keesammi Miniinsi woroo'n qarinne eelliinchi firinne yoo lamejjanne makki kollinne dissukko.

¹¹Huuraam odim qure'uwwa, giira hogoofakkam mu'uttuwwaa loqooqo'i saahinnuwwaa baxukko. Ee'isinnem Huuraam Keesammi Mi'n awwaadina ihoo mu'uttuwwa adil Salamoonina baxaa guullukko. Oo baxu mu'uttuwwim

¹²lam utubbuwwa, utubbuwwi ludonne yoo saahi'n kobi'llanne baxamaakkoo lam goominaanchoo lamem goominaanchom wereeggisimmina annannichchonnem baxamaakkoo lam chimchimmuwwa,

¹³goominaancho wereeggisimmina goominaanaanchuwwanne annannichchonnem lam ogoranne naas xaarinne baxamaakkoo oroomaa'n misha laboo wereeggika soor xibbe,

¹⁴aanshaqqakkam saahinnuwwa shafe'i'nnoo'i tululoo lokki yoo luwwinnem

¹⁵jaalo'oo eekka iyyoo tommoo lam moolluwwaa

¹⁶qure'uwwa, giira hogoofakkam mu'uttuwwa, qaphphuwwaa mulli ee keeno laboo mu'uttuwwaa angi lachchinne baxukko. Ku Huuraam Abbi'i adil Salamoon ijaajukkisinne Keesammi Mi'n awwaadina ihoo'isina ka mu'uta hundam baxukkok muccur naas xaarinnette hee'ukko.

¹⁷Adil Salamoon ka mu'uttuwwa hundam baxisukkok Yoordaanoos cebbanne Sukootannee Xareed lambe'ennee yoo nas xaara bukkakkam beyyonnette hee'ukko.

¹⁸Ee'isinne baxamu mu'uttuwwi lobakat ihu bikkina ixxuwwa baxiseena awwaaxxu naas xaar hinkaa'nna ihooda'e ayyim la'eena xanukkoyyo.

¹⁹Ee'isam adil Salamoon Keesammi Minina awwaadoo mu'uttuwwa oohim kiti'm beyyo, keesammi daabbo'o dissakkam xaraphpheeza,

²⁰uwwamu awwonsisinne Keesammi Mi'n illagenne caakkisoo'isina caakka dissakkam mu'uta kuraazzuwwinne maqirem,

²¹fiit kobi'llanne baxamaakkoo wereeggi mu'uttuwwa, kuraazzuwwa, gii'l buchcha giggissakkam mu'uttuwwa,

²²caakka xoo'isakkam mu'uta, loqooqo'i saahinnuwwa, cilfaa mude'uwwaa hundim muccur worqinne baxukko. Keesammiinsi Keesammi beyyi goocuwwii Keesammi mi'nnek lob gooccuwwii worqinne baxamaakkoohan hee'ukko.