Read Hadiyya 2Agannuwwi Kitaaba 5 Bible Online

2Agannuwwi Kitaaba 5 - Hadiyya bible

2Agannuwwi Kitaaba 5

¹Adil Salamoon Waa'i Keesammi mi'n baxo hundam guullaa lasage ixxi anni Daawiit Waa'ina annanni issaa dissu biraa worqaa ee'isam mulli mu'uttuwwi hundam Keesammi Mi'n woronne yoo mu'uta dissakkam minenne dissukko.

²Ee lasage adil Salamoon Waa'ika Hidi'l Saga'l Saaxina Daawiit beero'i ihu Xiyooniinsi Keesammi Mine eebakkamisina Isra'ee'l lommannaa sullikaa moolli awwonsaanoo hundam Yerusaaleemanne wixxitamisina ijaajukko.

³Lama'l agananne lonsakkam daas uguxxi ayyaamonne hundim waatta'a Yerusaaleemanne wixxito'o.

⁴Awwonsaan hundim mateeyyoominne wixxito'i ammanenne Leewi'i oos Hidi'l Saga'l Saaxina iyyita'a

⁵Keesammi Mine eebbo'o. Ee'isam qeessuwwii Leewi'i oosii Waa'ina otossakkam dukkaanaa ixxi woronne hee'u keesammi mu'uttuwwaa hundam Keesammi Mine eebbo'o.

⁶Adil Salamoonii Hidi'l Saga'l Saaxi'n illagenne ixxenne maqire wixxito'i Isra'ee'l minaadabii hundim dutimmiinsi ki'ukkok xigakkeena xanakkambee'i lobakat gereebbaa baa'lluwwaa ee Hidi'l Saga'l Saaxi'n illagenne kitimto'o.

⁷Qeessuwwim Waa'ika ee Hidi'l Saga'l Saaxina Keesammi Mi'n woronne keesammiinsi keesammi beyyonne aagissa'a kiruubbuwwi laddeewwiinsi woroon dissito'o.

⁸Kiruubbuwwim Hidi'l Saga'l Saaxiniinsi hanaan yoo beyyonne ixxuwwi lado bakkaa'lla'a Hidi'l Saga'l Saaxinaa ee saaxina iyyakkam wonnannuwwaa ifiissa'a hee'llo'o.

⁹Wonnannuwwi qeeraa'lluwwi hee'u bikkina Keesammiinsi Keesammi beyyi illaginne uulloo ayyi manchim ee wonnannuwwi ludo moo'eena xanam hee'ukko. Ihukkaarem ee beyyiinsi biireen uulloo ayyi manchim moo'eena hore'em xanam hee'ukkoyyo. Oo wonnannuwwim kaballi afeebe'em ee beyyonne yookko.

¹⁰Isra'ee'l minaadab Gibxi uulliinsi fitto'isam Waa'i ixxuwwinne maqire hidi'l sagara aagu ammane Muse'e Siina'i duunanne Hidi'l Saga'l Saaxi'n woronne dissu lamem ki'n ba'lliinsi bagaan ee saaxxi'n woronne mulli luwwi hee'ukkoyyo.

¹¹ Ee beyyonne hee'llo'i qeessuwwi hundim ixxuwwi awwaaddeena qoodanto'isinnetti ihoo'n hundim mat ikka'a ixxuwwi gaga Waa'ina keessa'a hee'llo'o.

¹²Zammaaraan ikko'i Leewi'i oos hundim Asaaf Heemaanii Yiduutaanii ee'isam ixxuwwi goo'n oosii ixxuwwi qarimannii hundim talbi danaam fatirinne dadamaakkoo eddechcha edde'lla'a doola, diitta'aa maasinqo'oo lellitu'uuyyi eelliinchi firinne kiti'm beyyi gadanonne uullita'a hee'llo'o. Ixxuwwinne maqirem xurumba fuggam mat xibbii lamiyyi qeessuwwii hee'lo'o.

¹³Oo xurumba fuggam keenii zammaaraanii hundim sagara matissita'a Waa'ina lombaa galataa hincaa'llo'o. Xurumbinne doolinnee mulli mu'uttuwwinnee «Waa'i biijaallaa ixxi iittim heer heerina qoxxaa hee'oohanee ihu bikkina Waa'a galaxxehe» yitu'uuyyi sagara iimmaa'lla'a zammattam hee'llo'o. Ee ammanenne Waa'ik Keesammi Min duubinne wo'mmukko.

¹⁴Waa'ik lombi Keesammi Minenne wo'mmu bikkina duubiinsi ki'ukkok qeessuwwi ixxuwwi awwaado awwaaddeena xanto'oyyo.