Read Hadiyya 2Agannuwwi Kitaaba 6 Bible Online

2Agannuwwi Kitaaba 6 - Hadiyya bible

2Agannuwwi Kitaaba 6

¹Ee lasage adil Salamoon «Waa'a ‹At tuunsi duuphphi woronne hee'oommo› yitaatto.

²Ono'o an heer heerina hee'lloo ka maalalsiisoo Keesammi Mine kiina baxaammo» yukko.

³Ee ammane Isra'ee'l minaadab ee beyyonne uullita'a hee'llo'o; adil Salamoonim ixxuwwi kolli daba'llaa Waa'ik maassi ixxuwwanne dilloo'isina

⁴«Isra'ee'l Moollanni Waa'i galaxxamona! Ixxim iyyanni Daawiitina uwwu neeyyaxxi sagara wonshaakko. Uwwu neeyyaxxi sagarim

⁵‹I minaadaba Gibxi uulliinsi fissummi ammanniinsi ki'isaa kaballi afeebe'e i summinne Keesammi Min baxamoo beyyo Isra'ee'l sulli beero'uwwiinsi matom doo'llummoyyo. I minaadab ikko'i Isra'eelam awwonsoo manchom doo'llummoyyi hee'ukko.

⁶Ihukkaarem kaba i summi ixxonne weeshamona Yerusaaleema, i minaadaba awwonsitonam Daawiita doo'llaammo› yaa hee'ukko.

⁷«Iyyanni Daawiit Isra'ee'l Moollanni Waa'i summina Keesammi Mine baxeena sawwaa hee'ukko.

⁸Ihukkaarem Waa'i iyyanni Daawiitina ‹I summina Keesammi Mine baxxeena ki tiironne sawwimminne eroka issitaatto.

⁹Ihukkaarem i summina ihoo Keesammi Mine iina baxookkok ki gubeediinsi qaramoo ki beeto bagaan ateyyo› yukko.

¹⁰«Oono'o Waa'i aagu neeyyaxxi sagara wonshaakko. Waa'i uwwu neeyyaxxisinne an iyyanni beyyonne Isra'ee'l minaadaphphi adilla'n barcumanne afuuraammo. Isra'ee'l Moollanni Waa'i summinam Keesammi Mine baxaammo.

¹¹Ee Keesammi Minennem Waa'i Isra'ee'l minaadabinne aagu Hidi'l Saga'l Saaxina dissaammo» yukko.

¹²Adil Salamoon qeeraa'lloom onti anga dufaachchoom onti anga uullichchi sas anga ihoo awwaadina uullakkam beyyo naas xaarinne baxisaa wixxixxi beyyi lambe'enne uullisaa hee'ukko.

¹³Salamoonim ee beyyonne firaa Waa'ina kitima hincaa'akkam beyyi illagenne uullukko. Ixxim Isra'ee'l minaadab hundi illagennem guruphphaa ixxi anga iim biddiqaa'aa

¹⁴«Isra'ee'l Moollanni Waa'a! Uullannem ihukko iimanenne kiinni'nnoo'i Waa'i hore'em bee'e. At ki minaadabinne aaggitti hidi'l sagara egettootto. Ixxuwwaanninne wo'm wodaninne ki googonne mattam keenina heer heerina hee'oo ki eroomma moo'issootto.

¹⁵Iyyanni Daawiitina uwwitti neeyyaxxi sagara egettaatto. At woccitti neeyyaxxi sagara hundam kaballa wo'nshitaatto.

¹⁶Isra'ee'l Moollanni Waa'a, iyyanni Daawiitina ‹At i seera qoxxitaa egettittisam ki oosim egerulas ki shumo'iinsi Isra'ee'l minaadaphphi adilla'n barcumanne i illagenne adil ihoo manchi hundi ammanem bee'ooyyo› yitaa aaggitti hidi'l sagara kaba qoxxissona an keese uunxoommo.

¹⁷Ee bikkina Isra'ee'l Waa'a, kiina awwaadaanchi ihu Daawiitina aaggitti neeyyaxxi sagar hundim wo'mmoo'isa isse.

¹⁸«Ihona bagaan hanqinam Waa'i ka uullanne manninne maqire hee'oonnihe? Oono'o iimanii iimaniinsi hanaan yoo iimanii keese iyyeena xanooyyo. Hore'oomam an kiina baxummi min hinkaa'nna hoffane?

¹⁹Ihona bagaan i Moollanni Waa'a! Kiina awwaadaanchi ihummi iikka uunxato macceese. Kiina awwaadaanchi ihummi an ki illagenne hincaa'oommi laachchaa uunxatoo erisa macceese.

²⁰‹Ka beyyonne I summi weeshamookko› yitti ki Keesammi Mi'n kolli ballaa hiimoo moo'e. An ki awwaadaanchim Keesamaakkoo ka ki Mi'n kolli uunxoommi uunxato macceese.

²¹An ki awwaadaanchi te'im ki minaadab ihu Isra'eel ille ka mi'n kollonne daballaa keese uunxinoommi ammane ni uunxato macceese; kiina heechchi beyyi ihu iimaniinsi macceese; macceessaahim haafihe.

²²Mat manchi ixxi beshichcho hawwodu bikkina kasasamaa Keesammi Mi'n kit'm beyyo worakka'a ihukkisa issakkam ammane

²³Waa'a iimanenne ikkaa at macceese; ki awwaadaaninam oogate; oohim hawwodu manchi hawwodukkisinnem guzumo'amoo'isa muccurimmi hawwodubee'an ihukkisa la'ise.

²⁴Ki minaadab ihu Isra'eel baaxiilo baxaa keese hawwodu bikkina ixxuwwi diina'i illagenne kaa'antota'nnii saxxita'ahim ki kolli daba'llita'a keesammi ka mi'n kolli waattota'nnii kiinniinsi haafite siiddeena ixxuwwi gaga heeshaa'lla'a maashaalloominne keese uunxitota'nnii

²⁵at iimanenne ikkaa ixxuwwika uunxato macceese; ki minaadaphphekam baaxiilo haafaammo yitaa ixxuwwi gaassi anno'inaa ixxuwwinaa uwwitti uulla dabattaa aagise.

²⁶(«Ki minaadab keese hawwodaa kichche'isimminne xeen uullanne ga'nnoobee'isa issitaa ammane at guzumo'l bikkina saxxita'a ixxuwwika ille ka keesammi mi'n kolli dabatta'a maashaalloominne keese uunxitota'n

²⁷Waa'a! At iimanenne ikkaa ixxuwwika uunxato macceese. Kiina awwaadaan ikko'i Isra'ee'l minaadaphpheka baaxiilo uraammo yihe. Xabbee'n googom ixxuwwina moo'ise. At ki minaadabina gulummi issitaa uwwitti ka uullanne xeena ga'nnise.

²⁸«Uullanne qaanne'i te'im booban aagoo ammane billi te'im waaggi te'im qawwaawwi te'im daquur uullanne aagoo ammane te'im ki minaadaba diina'i kibboo ammane te'im ki minaadabanne jabbi aagoo ammane te'im mah hawwim afoo ammane

²⁹ki minaadab Isra'eeliinsi ayyi manchim u'nnii jabbii ixxonne afu bikkina ixxeka anga ka Keesammi Mi'n kolli biddiqaa'aa uunxoo ammane

³⁰At iimanenne ki heechchi beyyonne ikkaa macceese; ixxuwwi hawwojjam uraammo yihe. Xale'i at manni oosika wodano saarayyitaa laqoohan ikki bikkina annichchi annichchinam ixxi baxisa miqe.

³¹Ee ammane niyyanno'ina at uwwitti uullanne hee'amoo doollenne hundannem keese baddimminne ki googonne maramoo'isinatte.

³²«Ki minaadab ikko'i Isra'eeliinsette ihubee'i mat mulli uulli manchi kiihaannina lombaam summi bikkna, ki malaayyaam wod bikkinaa biddiqaakkoo ki angi bikkinaa macceesaa qee'l uulliinsi waaraa ka Keesammi Mi'n kollonne ihaa keese uunxoo ammane

³³At iimanenne ki heechchi beyyonne ikkaa ixxi uunxato macceese. Uullanne hee'oo minaadab hundim kiina minaadab ikko'i Isra'ee'l minaadaphphisam laqqa'a keese badditona; oo mulli uulli manchi uunxoo uunxato hundam at macceese. Eehid ihoo ammane ku an baxummi Keesammi Min ki summi weeshamoo beyyi ihukkisa laqqamo.

³⁴«Ki minaadab diina'inne qasanteena orina fittona ijaajjoo ammane ixxuwwi hannonnem ikka'a ka at doo'llitti beero'onne an kiina baxummi ka Keesammi Mi'n kolli ille dabatta'a uunxitam ammane

³⁵at ixxuwwika uunxato iimannenne ikkaa macceese. Keese xa'mmitam luwwi hundam at ixxuwwina isse.

³⁶«Baaxiilo baxoobee'i manchi ayyim bee'an ihu bikkna ki minaadab Isra'eel baaxiilo baxxa'a keese kichche'issam ammane atim ixxuwwanne quuqqaa diina'i kaa'lla'a qeefadda'a mulli qee'l te'im abbis uulla massitona at cawwitaa uttoo ammane

³⁷Qeefadanta'a hee'llam uullannette ikka'a ‹baaxiilo banxaammo; Waa'a hawwondaammo; ijaajancham sambaammo› yita'a wodaninne baaxiilo biiraa yita'a saxxita'a daba'llitolas

³⁸qeefadanta'a hee'llam uullanne ikka'a ixxuwwi wo'm wodaninnee wo'm tiirinnee ki kolli daba'llitolasii at ixxuwwi anno'ina uwwitti ka uulli kolli, at doo'llitti ka beero'i kollii an ki summi bikkina baxisummi ka Keesammi Mi'n kollii ille dabatta'a uunxitolas

³⁹iimananne ki gatti beyyonnette ikkaa ixxuwwika uunxato macceese; keese hawwoddo'i ki minaadaphpheka baaxiilo hundam haafihe.

⁴⁰«Kabadem i Moollanni Waa'a! Ka beyyonne hincoo uunxatina ki illi fooqaakkoohan ki maccim qoossaa macceesoohan ihona.

⁴¹Moollanni Waa'a! Kaba ki'llaa ki malaayyi Hidi'l Saga'l Saaxininne maqirem ki usheexxaxxi beyyo waare. Moollanni Waa'a ki qeessuwwi gatimma edde'llona! Kiina amma'nnanto'oo keenim ki eroomminne liirantona!

⁴²Moollanni Waa'a at doo'llitti adila uunjititte! Kiina awwaadaanchi ihu Daawiitina eroomma issiteena aaggitti sagara sawwihe» yaa uunxukko.