Read Hadiyya 2Agannuwwi Kitaaba 9 Bible Online

2Agannuwwi Kitaaba 9 - Hadiyya bible

2Agannuwwi Kitaaba 9

¹Saaba'i adila Salamoonika er sado macceessa'a shitto'o, lobakat worqaa bito xee'aal kinaa gaameela'anne iyyiissa'a kee'mmaalli xa'mmichchinne Salamoona keenteena dut manninne maqirem Yerusaaleema waatto'o. Isem Salamoon beyyo affa'a lasage is sawwixxeka hundam atoorassito'o.

²Salamoonim ise xa'mmito'i xa'mmichchi hundinam dabachcha uwwukko. Ixxi dabarimma hoogaa ixxeensi daphphu luwwi mahim hee'ukkoyyo.

³Saaba'i uulli adilam qooroominne wo'mmaakkoo Salmoon woshsha macceesso'o. Ixxi baxisaa hee'u ixxi adilla'n minem moo'llo'o.

⁴Salamoonina hincoo hurbaaxxi maadda, daannuwwi afuuttam hee'llo'i ogora, adilla'n minenne baxxam baxaanii diqaasa danaanaanii edde'lla'a hee'llo'i eddechchaa Keesammi Minina hicaa'am hee'u shokkiisakka'a hincaa'akkam kitimaa hundam moo'lla'a lobakata maalalto'o.

⁵Adil Salamooninam «Ki baxxi bikkinaa lophphaakkoo ki qooroo'm bikkinaa i uullanne hee'ummuuyyi macceesummi luwwi hundim hanqa.

⁶Ihona bagaan ka beyyo waaraa hundem luwwam an i illinne moo'eembe'e iina kuramu luwwi hundam an amma'nnummoyyi hee'ukko. Hanqinam an macceesummok kaba an i illinne moo'ummaannika kollom ihooyyo. Kiikki qooroom iina kurakko'aanniinsi hore'em lobane.

⁷Hundi ammanem ki illagenne ikka'a qooroominne wo'mmaakkoo ki woshsha macceessam gassaanii ki awwaadaanii hinkido'i gada'aammuwwa.

⁸Adil ikkaa ixxi summinne gassitona keese Isra'ee'l minaadabanne adil isseena doo'llu ki Moollanni Waa'i galaxxamona; ixxi iittinnem Isra'ee'l minaadab heer heerina qoxxaa hee'ona hasu bikkina hanqii hanqo'i oogato'ii qoxxaa hee'oo'isa issitoo'isina keese doo'llaa adil issaakko» yito'o.

⁹Saaba'i uulli adila eebbo'i soor kum kiilo'iinsi lophphoo worqa, lobakat shitto'oo bito xee'aalli kinaa irifo'i issita'a Salamoonina uwwito'o. Ise Salamoonina uwwito'i shitto'i kanniinsi illageen hore'em moo'akka'a la'akkambee'an hee'ukko.

¹⁰Adil Kiiraamikii Salamoonikii manni Oofiira yakkam uulliinsi Salamoonina worqa eebbo'isam araaraa bito xee'aalli kinaa eebbo'o.

¹¹Adil Salamoonim ee araa'l haqqinne Keesammi Mi'nnekaa ixxi adilla'n mi'nnekaa gardabbuwwaa ee'isam zammaaraan awwaaxxitam maasinqo'oo diitta'aa baxisukko. Ka mu'uta laboo mu'ut eehanniinsi illageen Yihuxxi uullanne hore'em hee'ukkoyyo.

¹²Adil Salamoon ise eebbo'i irifo'iinsi loboka Saaba'i uulli adila xa'mmito'i luwwi hundam uwwukko. Ee lasage Saaba'i uulli adila isenne maqire waaru manninne maqirem is gaqqi uullam daba'llita'a matto'o.

¹³Adil Salamoonina 23,000 kiilo'oo ihoo qax worqa hiinchonne hiinchonne manni uwwam hee'ukko.

¹⁴Oohim annanni daddaraan miqqam gibiriinsi mullan hee'ukko. Ee'isam Araphphi uulli adilluwwi hundimii Isra'ee'l uulli gassaanii Salamoonina worqaa kin biraa hincaa'llam hee'llo'o.

¹⁵Adil Salamoon annannichchim lamar kiilo'o ihoo qax muccur worqinne lam xibbi geejji agilluwwa baxukko.

¹⁶Ee'isam annannichchim sas kiilo'o ihoo qax muccur worqinne sas xibbi hoffi agilluwwa baxukko. Ee agilluwwam «Liibaanoos Dooma» yakkam adilla'n minenne dissukko.

¹⁷Ee lasage Salamoon daane'i inqinne wereeggisakka'a muccur worqinne goolabakko'oo mat geejji adilla'n barcuma baxukko.

¹⁸Ee barcumanne firakkam gardabbi loh ihaa worqinne baxamaa ixxenne amaxxamaakkoo hance'akkam beyyi yoohan hee'ukko. Ee barcu'm makkinnee qeddinnem anga bakkiisakkam luwwi yoohan ihaa gadanonnem mat mat hobbichchi misil uullaa hee'ukko.

¹⁹Ee'isam ee lohem gardabbi lamem midaadonne annannichchonnem mat mat hobbichchi uullaakkoohan ihaa hundoomim tommoo lamoo hee'ukko. Eehido'i adilla'n barcum hinka'i uullannem hannonnem baxamukkoyyo.

²⁰Adil Salamoon aggi «Liibaanoos dooma» yakkam adilla'n minenne yoo mu'utii hundim muccur worqinne baxamaakkoohan hee'ukko. Salamoon adilla'n doollenne kin bir awwaad bee'aannisa ihaa xigamam hee'u bikkina birinne baxamu luwwi mahim hee'ukkoyyo.

²¹Adil Salamoonina Kiiraamina awwaadaan hee'llo'i markaphphi ushe'aaninne Tarisees uulla maroo markabbuwwi hee'ukko. Ee markabbuwwinnem saxxi hiinchonne mataagge worqa, bira, daane'i inqe, daageeraa qamaraa amadda'a waattam hee'llo'o.

²²Adil Salamoon heer uullanne yoo adilluwwiinsi hundiinsim qooroominnee amaxxinnee loban hee'ukko.

²³Heer uullanne yo'i adilluwwi hundim Waa'i uwwu qooroom wo'mmaakkoo woshsha macceesseena Salamooninne edanteena hassam hee'llo'o.

²⁴Maarag hundam ixxi beyyo waattam hee'llo'i keen hundim kin bi'llekaa worqikaa annanni annanni mu'uta, eddechcha, o'l mu'uta, shitto'o, faradoo baqullaa irifo'i issita'a eebbam hee'llo'o.

²⁵Adil Salamoon faraxxi gaarre'uwwinaa faradinaa soor kum gol hee'ukko. Ee'isam ixxena 12,000 faradaan hee'llo'o. Ee keenom ixxi hee'oo Yerusaaleemannee faraxxi gaarre'i beero'uwwannee dissukko.

²⁶Salamoon Efiraaxiis daajjiinsi ki'isaa Filisxeemannee Gibxi uulli tochchi afeebe'ee hee'oo adilluwwa hundam gibissiisam hee'ukko.

²⁷Salamoonik kin bir Yerusaaleemanne ayyi ki'nnisam hee'ukko; digiphphi haqqim duu'n lugumonne mutoo ayyi oda'isam hee'ukko.

²⁸Salamoonina Gibxi uulliinsii mulli uulliinsii hundiinsim farado eebakkam hee'akko'o.

²⁹Adil Salamoonik aganni luxxaanniinsi ki'isaa lasaanchi afeebe'e hiraagaanchi Naataan agannanne, Seelo'i uulliinsette ihoo hiraagaanchi Akiiy hiraagonnee Isra'ee'l adil hee'u Naabaax beet Yoorbi'aam adilla'n doollennem wocam hee'u hiraagaanchi Ido'i kaaltannee kitaabamaa yookko.

³⁰Adil Salamoon ixxeka heechchi beyyo Yerusaaleemanne issaa Isra'ee'l uullanne hundannem sor hiincho adil ihukko.

³¹Ixxim ee lasage ixxi anno'isam lehukko. Ixxi anni Daawiit beero'onnem waammamukko. Ixxi beet Yoorbi'aamim ixxi beyyonne adil ihukko.