Read Hadiyya Izir Kitaaba 1 Bible Online

Izir Kitaaba 1 - Hadiyya bible

Izir Kitaaba 1

¹Hiraagaanchi Ermiyaas wocu Waa'i sagar wo'mmoo'isina Qiiroos Faariis uulli adil ihu luxxi hiinchonne Qiiroosa Waa'i ixxi gagim ki'isukko. Ixxim ixxi adilla'n uullanne hundannem kanniinsi woroon yoo ijaaj kitaabamaa alallaatamoo'isa issukko.

²Oo adilim alallaatisu ijaaj «Iima'n Moollanni Waa'i eese heer uullanne hundannem adil issaakko. Yihuxxi uullanne hee'oo Yerusaaleemanne ixxena Keesammi Mine baxoommisina ijaajaakko.

³Ki'nnuwwinne maqire hee'oo ixxi minaadabinne ayyennem Waa'i maqir ihona. Ixxim Yihuxxi uullanne hee'oo Yerusaaleema maraa Yerusaaleemanne hee'oo Isra'ee'l Moollanni Waa'ika Keesammi Mine baxona.

⁴Ka beyyonne gatoo hinka'i uullannem hee'oo manni hundim Yerusaaleemanne Keesammi Mine Waa'ina baximmina gaqqi doo'llinne uwwamoohaannonne hanenne bira, worqa, mu'utaa fooraam diinatee uwwimminne hara'mmona» yoohane hee'ukko.

⁵Ee lasage Yihuxxekii Biiniyaam sulli awwonsaanii, ee'isam qeessuwwi, Leewi'i oosii Waa'i tiissiisu mannii hundim daba'llita'a matteenaa Yerusaaleemanne yoo Waa'ika Keesammi Mine dabatta'a baxxeenaa guddo'o.

⁶Ixxuwwi olla'i mannim gaqqi doo'llinne uwwito'aannonne edda'a kin birinnee worqinnee baxamu mu'uttuwwa, annanni annanni mu'uta, fooraam diinatee mulli awwaadoo luwwaa uwwimminne hara'mmito'o.

⁷Eehanniinsim mulleka adil Qiiroos Nabukadanaxoor Yerusaalee'm Keesammi Miniinsi bogaa massaa ixxi qophpha'n waa'uwwi minenne dissaa hee'u keesammi mu'uttuwwa hundam dabaraa uwwukko.

⁸Faariis uulli adil Qiiroosim ee mu'uta hundam adilla'n mi'n mu'uxxi mi'n gassaanchi hee'u Miitiradaatinne xigisaa Yihuxxi manni gassaanchi ihu Sheshbaazaarina uwwukko.

⁹Ee mu'uttuwwikim xig kanniinsi woroon yoohane. Worqi saahinnuwwi 30. Kin birinne baxamu saahinnuwwi 1,000. Mulli annanni annanni saahinnuwwi 29.

¹⁰Worqinne baxamu loqooqo'i saahinnuwwi 30. Kin birinne baxamu loqooqo'i saahinnuwwi 410. Ee'isam mulli annanni annanni mu'uttuwwi 1,000 hee'ukko.

¹¹Qeefadanta'a hee'llam Baabiloo'n uulliinsi Yerusaaleema daba'llita'a waatto'i manninne maqirem Sheshbaazaar amadaa waaru birinnee worqinnee baxamu mu'uxxek hundoo'mmekim xig 5,400 hee'ukko.