Read Hadiyya Izir Kitaaba 10 Bible Online

Izir Kitaaba 10 - Hadiyya bible

Izir Kitaaba 10

¹Izir Waa'i Mi'n illagenne ubaa wi'llimminne baaxiilo biiraa yukkuuyyi Isra'ee'l oosiinsi lobakat goon, meentii ciilluwwii ixxi kululleetanne wixxaa qaraaraalli wi'llo ixxenne maqirem wi'llam hee'ukko.

²Ee lasage Eelaam moolliinsetti ihoo Yihii'eel beet Shakaaniy Izirina «Ni kululleetanne yo'i minaadabiinsi mulli minaadaphphi landa eebimminne ni Waa'a hawwondaammo. Ihukkaarem kabadem Isra'eelina neeyyat yookko.

³Kaba ee mulli minaadaphphi meento ixxuwwi oosinne maqirem hollineena Waa'i illagenne hide'nnona; at ni moollannii ni Waa'ika seera egettam keenii niina uwwitakkam sogitano hundam aa'nnoommo; ni Waa'ik seer ijaajookkoka hundam issinoommo.

⁴Oo hundim ki angannetti ihu bikkina ki'e; neesem hara'mminoommo; qoxxe» yukko.

⁵Ee bikkina Izir qeessuwwi awwonsaano, Leewi'i oosoo Isra'ee'l minaadabaa hundam hincu sawwite issitamisina hidiisukko; ixxuwwim hide'llo'o.

⁶Izir Keesammi Mi'n illagenne hee'u beyyiinsi ki'aa Eeliyaashshiib beet Yoohanaan hee'oo mine aagukko. Ixxim qeefado'iinsi daba'llito'i keen baxxo'i baaxii'l bikkina kichche'aa wi'llukko; eekke'em hurbaata itukkoyyo; wo'om agukkoyyo.

⁷Ee lasage qeefajjo'iinsi daba'llito'i manni hundim Yerusaaleemanne wixxitamisina Yihudannee Yerusaaleemannee alallaatakko'o.

⁸Oo alallaatim ka sas ballanne ee dummichcha waaroobee'ek ayyim hee'ulas ixxi amaxxi hundim bogamoo'isaa ixxim qeefajjo'iinsi daba'llito'i manni dummichchiinsi yaayyamoo'isaa ijaajoohan hee'ukko. Oohim minaadaphphi awwonsaanii lommannii a'llanchinnee ijaajinnee qooddo'oohan hee'ukko.

⁹Ee bikkina sas balli woronne Yihuxxekii Biiniyaam minaadabii hundim Yerusaaleemanne Keesammi Mi'n illagenne yoo wixxixxi beyyonne dummito'o. Oohim honsi agan aagu lamiyyi balli ihaa minaadab ee amma'n woshshanne kichche'llo'i bikkinaa kee'mmaalli xeenanne aashsho'i bikkina huxe'llu'uuyyi macceessam hee'llo'o.

¹⁰Qeessichchi Izirim minaadaphphi illagenne uullaa «Ki'nnuwwi mulli minaadaphphi meento eebimminne Isra'ee'l jollenne hanenne jolle eddakko'ookko. Ki'nnuwwim amma'nnantakkambee'i keen ikkakko'ookko.

¹¹Kabadem ihukkaare ki'nnuwwi anno'ina Moollanni ihu Waa'i illagenne ki'nnuwwi baaxiilo hundam biira yi'llehe. Ixxim liiramoo luwwi hundam issehe. Ka uullanne hee'llam mulli minaadabiinsii ixxuwwiinsi eebbakko'i mulli minaadab meentiinsii annanni ikkehe» yukko.

¹²Minaadabim sagara immaa'aa «At yittok hanqa; yittoka hundam issinoommo.

¹³Ihukkaarem ka beyyonne wixxu minaadab lobakata; ammanim malaayyaam hagayye; ee bikkina biiranne uullineena xannummoyyo. Niinniinsi lobakat ee baaxiilonne aangaammoo bikkina ku woshshi mat ballanne te'im lam ballanne beeddoohaneyyo.

¹⁴Ee bikkina ni awwonsaan ni bikkenne Yerusaaleemanne afuutta'a ka woshsha moo'llona. Ni beero'onne yoo mannik mulli minaadabiinsi meento eebu manchi ayyim ixxena qoodamaa uwwamoo balli woronne ixxi hee'oo beero'i lommannaa daannuwwaa amadaa waarona; ee'isinne Waa'ik neesenne waaru kee'mmaalli quunqi daba'llookko» yukko.

¹⁵Ee woshsham Asaaheel beet Yoonaataanii Tiiqiw beet Yaahizaayii sabbo'o bagaan mullek ayyim sabukkoyyo. Leewi'i oosiinsi ee ixxuwwi sawwite bakkiisso'ok xale'i Mashulaamattee Shabataayattee.

¹⁶Hundem minaadabim ee sawwitenne iittanto'o. Qeessichchi Izirim abaroosiinsi annannichchiinsim mat mat awwonsaancho doo'llaa hundam summinne summinne kitaabukko. Ee lasage tommi agan aagu luxxi ballanne ee woshsha saarayyiteena dummito'o.

¹⁷Ixxuwwim luxxi agan aagu luxxi balli afeebe'e mulli minaadabiinsi meento eebu qax manna annanni issita'a laqqo'o.

¹⁸Mulli minaadabiinsi meento eebbo'i qeessuwwi moolli moollinne Yooseedeeq oos hee'llo'i Iyyaasiinsii ixxi abbaayyuwwi moolliinsii Maa'iseey, Eeli'eezar, Yaaribii Gadaaliyii

¹⁹ixxuwwi meento holliteena iittanta'a lasage baaxii'l haafixxi bikkina ihoo mat gereechchi ambula shokkiisakkam kitim issita'a hincaa'llo'o.

²⁰Iimeer moolliinsi Hanaanii Zabaadiyii.

²¹Haariim moolliinsi Maa'iseey, Eeliyaas, Shamaa'iy, Yihii'eelii Uziiyii.

²²Faashuur moolliinsi Eeliyo'enaay, Maa'iseey, Isma'eel, Naatinaa'eel, Yoozaabaadii Eeli'aasii.

²³Leewi'i moolliinsi Yoozaabaad, Shiimi'i, Qaliixa yakkam Qeelaay, Faataahiy, Yihudii Eelii'eezerii.

²⁴Zammaaraaniinsi Eeliyaashiib hee'ukko. Keesammi Mi'n ooxxi gooca egeraaniinsi Shaaluum, Xeeleemii Uurii.

²⁵Mulli Isra'eeliinsi Phaaroosh moolliinsi Raamiy, Yiiziy, Malkiy, Miiyaamiin, Ali'aazar, Malkiyii Baanaayii.

²⁶Eel aam moolliinsi Maataaniy, Zakaariyaas, Yihii'eel, Abdi'i, Yaremootii Eeliyii.

²⁷Zaatu moolliinsi Eelyo'enaay, Eeliyaashiib, Maataaniy, Yaremoot, Zabaadii Aaziizii.

²⁸Beebaay moolliinsi Yehohanaan, Hanaaniy, Zaabaayii Atilaayii.

²⁹Baanii moolliinsi Mashulaam, Maaluk, Adaay, Yaashub, Sha'aalii Yaraamootii.

³⁰Phaatmo'aab moolliinsi Aadin, Kalaal, Baanaay, Maa'iseey, Maataaniy, Baasili'eel, Biinuyii Minaasee.

³¹Haariim moolliinsi Eeli'eezar, Yishiiy, Maalkiiy, Shamaa'iy Simi'oon,

³²Biiniyaam, Maaluukii Shamaariyii.

³³Hashuum moolliinsi Maataanaay, Maataat, Zaabaad, Eelifeeleex, Yareemaay, Minaasee Shiimi'ii.

³⁴Baanii'i moolliinsi Ma'idaay, Aamiraam, U'eel,

³⁵Baanaay, Beediy, Kaaluh,

³⁶Waaniy, Mareemoot, Eeliyaashiib,

³⁷Maataaniyaa Matinaayii Yaa'isii.

³⁸Biinuy moolliinsi Shiimi'i,

³⁹Shelemiy, Naataan, Aadaay,

⁴⁰Maakinaadabaay, Shaashshaay, Shaaraay,

⁴¹Azaari'eel, Shelimiy, Shamaariy,

⁴²Shaaluum, Amaariyii Yooseefii.

⁴³Nabo'i moolliinsi Ya'ii'eel, Maatiitiy, Zaabaad, Zabiin, Yaadaay, Iyyu'eelii Baanaayii.

⁴⁴Ku keen hundim mulli minaadabiinsi meento eebba'a hee'llo'i keeno. Ixxuwwim ee meento oosinnem hollito'o.