Read Hadiyya Izir Kitaaba 6 Bible Online

Izir Kitaaba 6 - Hadiyya bible

Izir Kitaaba 6

¹Adil Daariyoosim Baabiloo'n adilla'n mi'n aganni doonnuwwi hundim saarayyamoo'isina ijaajukko.

²Ihukkaarem Baabiloo'n beero'onnette ihoo'n Meedoo'n uullanne «Ahimtaa» yakkam beero'onne mat xaacci omachchi siidamukko.

³Ixxonnem Qiiroos adil ihu luxxi hiinchonne Waa'aannina Yerusaaleemanne yoo Keesammi Mi'n bikkina fissu ijaaj «Waa'ina kitima hincaa'akkam beyyi ihoo'isina Waa'ik Keesammi Min daba'llaa baxamona! Shooto'im shooto'amona! Ixxekim uullichchi lamiyyee lamar meetira midaadim lamiyyee lamar meetira ihona.

⁴Ixxi ootim sas ogora geejji geejji kininne baxamaakkoohan ihaa eehanni horoor odim mat ogor haqqinne baxakka'a goollakko'oohan ihona. Ee baxinam hasisoo diinat adilla'n miniinsi uwwamona.

⁵Ee'isam adil Nabukadanaxoor illageen Yerusaaleemanne hee'u Keesammi Miniinsi qeefadaa eebu woriqinnee kin birinnee baxamaakkoo keesammi mu'uttuwwi hundim daba'llaa Yerusaaleemanne baxamoo Keesammi Minenne eraa'llisam afuurona» yoo sagar kitaabamaa siidamukko.

⁶Ee lasage Daariyoos «Efiraaxiisiinsi eelliinchi aagginne yoo uulla gassaanchi ikkitti Taatanaayina, Shataarbooznaayinaa ee uullanne hee'llam ki'nnuwwi beshshuwwinaa hundinam Keesammi Mi'n woshshanne aaggakkotte.

⁷Oo Keesammi Minim baxamoobee'isa qolat ihimmiinsi egaxxammehe; Yihuxxi uulli gassaanchii Ayihuxxi manni awwonsaanii Keesammi Min illageen hee'u beyyonnem dabatta'a baxxona.

⁸Ki'nnuwwim Waa'ika Keesammi Mine baxxam Ayihuxxi awwonsaano hara'mmitakkamisina ijaajaammo; ee bikkina baxina hasisoo diinat hundim Efiraaxiis daajjiinsi eelliinchi aagginne yoo uulliinsi wixxu adi'l gibiriinsi uwwamona; oo Waa'ik Keesammi Mi'n baxim uulloobee'isina ijaajaammo.

⁹Odim Yerusaaleemanne hee'llam qeessuwwi xa'mmitamisinne iimanenne hee'oo Waa'ina ballina ballina hincaa'llam kitimina hassam luwwa hundam labeennuwwa, gereebbi ambulluwwa, te'im geex ambulluwwa, ee'isam arasa, Sooqido, woyi'n diqaasaa wee'l zaytaa uwwehe.

¹⁰Oohim iima'n Waa'ina inje'oo kitima hincaa'imminne iinaa i oosinaa Waa'a uunxitonatte.

¹¹Ka ijaajina ijaajamoobee'ek ayyim hee'ulas ee mancho ixxi mi'n utuba ubbuusakka'a ludo shobakka'a qasakkona. Ixxi minim gindamaa hacca uunjakkam beyyi ihona.

¹²Ka ijaajina ijaajancha sabaa Yerusaaleemanne yoo Keesammi Mine gindeena anga ki'isoo ayyi adilam te'im minaadaba ixxi summa eekke'enne dissu Waa'i bi'isona. An Daariyoos ee ijaajo ijaajaammo. Ixxim egeranchi hasisookko» yoo asso asse'ukko.

¹³Ee lasage Efiraaxiisiinsi eelliinchi aagginne yoo uulla gassaanchi hee'u Taatanaay, Shataarbooznaayii ixxuwwi beshshuwwii adil ijaaju luwwa hundam qoxxita'a issito'o.

¹⁴Yihuxxi minaadaphphi awwonsaan, hiraagaanchi Hage'ii Ido'i beet hiraagaanchi Zakkaariyaasii kuttam hiraaginne qoxxitu'uuyyi baxxo'o. Isra'ee'l Waa'i ijaaccisanne ee'isam Faariis uulli adilluwwi Qiiroos, Daariyoosii Arxeeksisii ijaajjo'i ijaaccisinne ee Keesammi Mi'n baxo baxxa'a guullitto'o.

¹⁵Ee Keesammi Mi'n baxom Daariyoos adil ihu loh hiinchonne Adaara yakkam agan aagu saxxi ballanne baxxa'a guullito'o.

¹⁶Ee lasage Isra'ee'l minaadab Qeessuwwii Leewi'i oosii ee'isam qeefadanta'a hee'llam uulliinsi daba'llito'i mannii hundim Waa'ika Keesammi Mi'n maassi uguda lobakat liiranchinne lonsito'o.

¹⁷Ee ugudinam mat xibbi labeennuwwa, lam xibbi gereebbi ambulluwwaa soor xibbi geex ambulluwwaa kitimina hincaa'llo'o. Hundem Isra'ee'l oos baaxii'l haafixxi bikkinam hincoo kitimina ihoo 12 Fella'i ambulluwwaa sulluanninne annannichchi summinnem hincaa'llo'o.

¹⁸Odim Yerusaaleemanne baxamu Keesammi Mi'n Waa'i awwaadina qeessuwwaa Leewi'i oosoo Muse'e kitaabu see'llisanne gaalchinne gaalchinne uullisso'o.

¹⁹Qeefadanta'a hee'llam uulliinsi daba'llito'i minaadab luxxi agan aagu 14 ballannee Shaashshiqqi uguda lonsito'o.

²⁰Qeessuwwii Leewi'i oosii hundim see'llisinne ixxuwwi gaga muccussito'o. Leewi'i oosim shaashshiqqi gereechcho qeefajjo'iinsi waatto'i mannina, ixxuwwi abbaayyuwwi ikko'i qeessuwwinaa ixxuwwi gaginaa dutto'o.

²¹Eekkam qeefajjo'iinsi daba'llito'i manni, mulli minaadaphphi losaniinsii haashaaranchiinsii annanni ikka'a Isra'ee'l Moollanni Waa'a lonsitam keeninne hundinnem maqirem itto'o.

²²Qorosho'i ugudam lamar balla hundam lobakat liiranchinne lonsito'o; mashka'oomim Waa'i Aasoo'l adi'lleka sawwite ixxuwwi kollonne dabaraa Isra'ee'l Moollanni Waa'ika mine baxxona hara'mmoo'isa issu bikkinatte.