Read Hadiyya Izir Kitaaba 7 Bible Online

Izir Kitaaba 7 - Hadiyya bible

Izir Kitaaba 7

¹Ee lasage Arxeeksis Faariis uullanne adil ihu doollenne hundiinsi lob qeessichchi Aaroon shumo'ik Izira yakkam mat manchi hee'ukko. Ixxi qaranchi lugu'm anno'im Izir Saraayane, Saraay Azaariyasane, Azaariyaas Hilqiyane, Hilqiy Shaaluumane,

²Shaaluum Saadooqane, Saadooq Ahiixoobane, Ahiixoob Amaariyane,

³Amaariy Azaariyane, Azaariy Maraayootane, Maraayoot Zaraahiyane,

⁴Zaraahiy Uuzane, Uuz Buuqane,

⁵Buuq Abiishu'ane, Abiishu'i Finihaasane, Finihaas Ali'aazarane, Ali'aazar hundiinsi lob qeessichchi Aaroonina beet hee'ukko.

⁶Izir Baabilooniinsi Yerusaaleema waarukko. Ixxim Isra'ee'l Moollanni Waa'i Muse'ena uwwu see'l kitaaba erisa la'oo losisaanchi hee'ukko. Moollanni Waa'i ixxenne maqire hee'u bikkina xa'mmu luwwi hundam adil ixxena uwwam hee'ukko.

⁷Ee'isam Arxeeksis adil ihu lama'l hiinchonne ixxenne maqirem qeessuwwi, Leewi'i oos, zammaaraan, waardiyyii Keesammi Mi'n awwaadaanii Yerusaaleema waatto'o.

⁸Arxeeksis adil ihu lama'l hiinchi onti agananne Izir Yerusaaleema afukko.

⁹Waa'ik eroommi ixxuwwinne maqire hee'u bikkina ixxuwwi luxxi agan aagu luxxi ballanne Baabilooniinsi ki'lla'a onti agan aagu luxxi ballanne Yerusaaleema affo'o.

¹⁰Izirim Waa'i seera saarayyeenaa egereenaa ee'isam Isra'ee'l minaadab hundinam losiseenaa ixxi gaga hundoomam higisaa uwwaakkoohan hee'ukko.

¹¹Waa'i Isra'ee'l minaadabina uwwu Seeraa ijaajoo erisa la'oo Qeessichchoo losisaanchoo ihu Izirina adil Arxeeksis uwwu assikitaab,

¹²«Adil Arxeeksisiinsi, iima'n Moollanni Waa'i Seera losisaanchi hee'u qeessichchi Izirina xummi kiina ihona.

¹³«An gassoommi adilla'n uullanne hee'llam Isra'eeliinsi, Qeessuwwiinsii Leewi'i oosiinsii kiinninne maqire Yerusaaleema daba'llaa mareena hasookkok hundim eexxaa marona an ijaajaammo.

¹⁴Odim an iinninne maqire yo'i lamarem sogaaninnem kiina uwwamu ki Waa'i Seerii ijaajii hanqo'isinne wo'mmoolda'e moo'llittuuyyi Yerusaaleemannee Yihudannee yoo duuha'a saarayyitona asse'aammo.

¹⁵Odim mattoo ammane Yerusaaleemanne Keesammi Min baxamu Isra'ee'l Moollanni Waa'ina anii i sogaanii liiranchinne uwwinummi biraa worqaa amaddaa mare.

¹⁶Ee hundinne maqirem at ki gagim Baabiloo'n uullanne wixxaa'llitti biraa worqaa odim Isra'ee'l minaadabii ixxuwwi qeessuwwii Yerusaaleemanne baxamu ixxuwwi Moollanni Waa'i Keesammi Minina uwwito'i luwwi hundam amaddaa mare.

¹⁷«Ee diinatinnem labeennuwwa, gereebbi ambulluwwaa geex ambulluwwaa ee'isam kitimina hincoo hurbaataa woyi'n diqaasaa bitaa'e; ee keenom Yerusaaleemanne yoo ki'nnuwwi Moollanni Waa'i Keesammi Minenne yoo kiti'm beyyonne hincaa'e.

¹⁸Eehanniinsi gatu birinnee worqinnee atii kiyyabbaayyuwwii Ayihuxxi minaadabii issitakkeena hassakkam luwwi hundam ki'nnuwwi Waa'i doo'llisanne issehe'e.

¹⁹Ki Waa'aannina Keesammi Mi'n awwaadina uwwamu keesammi mu'uttuwwa hundam Yerusaaleemanne Waa'i illagenne hincaa'e.

²⁰Odim ki Waa'i Keesammi Mi'n awwaadina hasisookko yitoo luwwi hundam adilla'n minenne yoo mu'uxxi miniinsi amaddaa mare.

²¹«Efiraaxiisiinsi eelliinchi aagginne yoo uullanne hee'llakkam gassaan hundim, iima'n Moollanni Waa'i uwwu seeraa ijaajoo erisa la'oo qeessichchi Izir xa'mmoo luwwi hundam ginaagintakkoo'n uwwitakkamisina an adil Arxeeksis ijaajaammo.

²²Oohim 3,400 kiilo'i kin bira, 10,000 kiilo'i arasa, 2,000 leetiro'i woyi'n diqaasa, 2,000 leetiro'i wee'l zaytaa hasisoo qax sooqidoo uwwehe.

²³Adilannee adi'l oosonnee Waa'ik quunqi dilloobee'isa iima'n Waa'i ixxi Keesammi Minina ijaaju luwwi hundam ginaagintakkoo'n uwwehe.

²⁴Ee'isam Qeessuwwiinsi, Leewi'i oosiinsi, zammaaraaniinsi, waardiyyuwwiinsii Keesammi Mi'n awwaadaaniinsii Gibiro miqisimmi hasisoobee'an ihukkisa laqqehe.

²⁵«Atim Izir ki moollanni Waa'i kiina uwwu lachchisinne Efiraaxiisiinsi eelliinchi aagginne hee'oo minaadabina hundinam ki Moollanni Waa'i seera laqqam gassaanoo oogataanoo doo'lle. Laqqambee'i keenina Ki Waa'ika Seera losise.

²⁶Ki Waa'i seerina te'im adi'l seerina ijaajamoobee'ek ayyim lehinne te'im uulliinsi yaayyanchinne te'im ixxena yoo luwwi hundim boganchinne te'im karanchinne guzumo'amona» yoohan hee'ukko.

²⁷Izir «Yerusaaleemanne baxamoo Waa'i Keesammi Minina adil lomba uwwoo'isa issukkok ixxotte ihu bikkina niyyanno'i moollanni Waa'i galaxxamaakkohan ihona.

²⁸Adi'llaannonne, ixxi sogaa'nnaannonnee mulli ixxi daannuwwaannonnee illagenne nuura siixxoommisa issukkok ixxotte. Isra'ee'l moolli awwonsaaniinsi dut keen iinninne maqire Yerusaaleema mattamisina amma'nniseenaa losiseenaa xanummokim Moollanni Waa'ik malaayyi iinninnetti ihu bikkinatte» yaa Waa'a galaxxukko.