Read Hadiyya Izir Kitaaba 8 Bible Online

Izir Kitaaba 8 - Hadiyya bible

Izir Kitaaba 8

¹Adil Arxeeksis adilla'n doollenne Baabiloo'n uullanne qeefadanta'a hee'llam beyyiinsi iinninne maqire Yerusaaleema daba'llito'i moolli awwonsaan,

²Finhaas moolliinsi Gershoom, Itaamaar moolliinsi Daani'eel, Daawiit moolliinsi Shakaaniy beet Haxuush,

³Phaaroosh moolliinsi Zakkaariyaasii ixxi abaroosiinsi 150 goonii kitaabanto'o.

⁴Phahaat Moo'aab moolliinsi Zaraahiy beet Eel yaaho'enaay 200 gooninne maqirem,

⁵Zaatu moolliinsi Yaahazi'eel beet Shakaaniy 300 gooninne maqirem,

⁶Aadiin moolliinsi Yoonaataan beet Ebeed 50 gooninne maqirem,

⁷Eelaam moolliinsi Ataaliy beet Shaa'iy 70 gooninne maqirem,

⁸Shafaaxiy moolliinsi Mikaa'eel beet Zabaadiy 80 gooninne maqirem,

⁹Yoo'aab moolliinsi Yihii'eel beet Abdiy 218 gooninne maqirem,

¹⁰Baan moolliinsi Yoosifiy beet Shaloomiit 160 gooninne maqirem,

¹¹Beebaay moolliinsi Beebaay beet Zakkaariyaas 28 gooninne maqirem,

¹²Azgaad moolliinsi Haaqaaxaan beet Yoohanaan 110 gooninne maqirem,

¹³Adooniiqaam moolliinsi Eelifeeleex, Yi'i'eelii Shamaa'iyii hofqaxam laso gatta'a 60 gooninne maqirem,

¹⁴Bigwaay moolliinsim Utaayii Zaakurii 70 gooninne maqirem daba'llito'o.

¹⁵Anim Ahaawa'i kolli daadoo daajji gammalanne minaadaba hundam wixxaa'ummo. Eekke'em sas balla wiiddannaa afuullummo; ee dummichchi woronnem minaadabaa qeessuwwaa wollisummaare Leewi'i oosik matim hee'ukkoyyo.

¹⁶Ee bikkina Eeli'eezera, Ari'eela, Shamaa'iya, Eelinaataana, Yaariiba, Eelinaataana, Naataana, Zakkaariyaasaa Mashulaamaa yakkam honsi awwonsaa'n beyyoo ee'isam Yooyaaribaa Eelinaataanaa yakkam lam losisaa'n beyyoo manna asse'ummo.

¹⁷Ixxuwwam Kaasiifiyanne hee'oo mannina awwonsaanchi hee'u Ido'i beyyo asse'aa ni moollanni Keesammi Minenne awwaaddam awwaadaano asse'llona Ido'onaa ixxenne maqire yo'i Keesammi Mi'n awwaadaaninaa kuttamisa issummo.

¹⁸Ixxuwwim ni Waa'ik er angi niinninne hee'u bikkina Maahiil moolliinsetti ihoo Sheereebiya yakkam lobakat lachchi yoo Leewekkichcho asse'llo'o. Ixxim ixxeka 18 goo'n oosoo ixxi abbaayyuwwaa amadaa ni beyyo waarukko.

¹⁹Ee'isam Meeraar moolliinsetti ikko'i Hashaabiyaa Shaa'iyaa yakkam manna lamiyye ikkam ixxuwwi qarmanninne maqirem asse'llo'o.

²⁰Adil Daawiitii ixxi gassaanii Keesammi Mi'n awwaadina Leewi'i ooso hara'mmitamisa issita'a hee'llo'i manni shumo'iinsetti ikko'oo 220 manchoo eebbo'o. Ixxuwwim summi summinne kitaabanto'o.

²¹Waa'i ni googo taaphansoo'isinaa neese, ni oosoo ni amaxxaa hundam egeroo'isinaa ixxi illagenne ni gaga heeshaa'nnaa soommanimminne Ahawa'i daajji gadanonne Waa'a uunxinoommisina alallaatummo.

²²Anim adil Arxeeksisina «Ni Moollanni Waa'ik eroommi ixxonne amma'nnitam keeninne hundinnem maqir ihookko. Ihukkaarem ixxo laggam keenonne malaayyaam ixxi quunqa dilliisookko» yaa wocaa hee'ummi bikkina ni googonne hee'oo ni diina'iinsi gatisoo gaadaanoo Faradaanoo uwwoo'isina adila xa'mmeena tuuraa hee'ummo.

²³Ee bikkina neese ni Waa'i ixxi gagim egeroo'isina soommannaa uunxinummo; ixxim ni uunxato macceesukko.

²⁴Awwonsaan ikko'i qeessuwwiinsi Sheereebiya, Hashaabiyaa ixxuwwi abbaayyuwwiinsim tommo edaa tommoo lam manchoo doo'llummo.

²⁵Ee lasage adil, ixxi sogaan, mulli gaassaanii Isra'eelii hundim Keesammi Mi'n awwaadina uwwito'i bira, worqaa mulli keesammi mu'uttuwwaa hundam keenaa ee qeessuwwina uwwummo.

²⁶Ixxuwwina uwwummi Keesammi Mi'n mu'uttuwwim 22,000 kiilo'i kin bira, 70 kiilo'i kin birinne baxamaakkoo mat xibbi mu'uttuwwa, 3,400 kiilo'i worqa,

²⁷8 kiilo'oo 400 giraamaa ihoo worqinne baxamaakkoo lamiyyi wocittuwwaa worqi'nnoo'i naas xaarinne baxamaakkoo lam wocittuwwaa hee'ukko.

²⁸Anim ixxuwwina «Ki'nnuwwi gaassi niyyanno'i Moollanni Waa'ina keesantakko'oo keeno. Ku mu'uttuwwim keesamma; birii worqim niyyanno'i Moollanni Waa'ina gaqqi doo'llinne uwwamaakkoohane.

²⁹Yerusaaleemanne hee'oo qeessuwwi awwonsaa'n illagenne, Leewi'i oos illagennee Isra'ee'l moolli awwonsaa'n illagennee keentakkeebe'i afeebe'e qoxxitakka'a egallehe» yummo.

³⁰Ee lasage qeessuwwii Leewi'i oosii Yerusaaleemanne yoo Waa'i Keesammi Minenne massita'a dissiteena bira, worqaa mulli keesammi mu'uttuwwaa hundam keenta'a aa'llo'o.

³¹Neesem luxxi agan aagu tommonnee la'm ballannee Ahawa'i daajji gadaniinsi ki'nnaa Yerusaaleema mallummo. Ni Waa'i niinninne hee'u bikkina diina'iinsii googonne maaxamaa egeraa hawwodoo manniinsii egerukko.

³²Yerusaaleemam amfaa lasage sas balla usheexxinummo.

³³Ee lasage soo'l ballanne Keesammi Mine mallummo. Bira, worqaa keesammi mu'uttuwwaa hundam keennaa Uriy beet qeessichchi Mareemootina uwwinummo; Finihaas beet Ali'aazar, Leewi'i oos Iyyaas beet Yoozaabaadii Biinuy beet No'aadiyii ixxenne maqirem hee'llo'o.

³⁴Hundem luwwim xigamaahii keenamaahii kitaabamukko.

³⁵Qeefajjo'iinsi daba'llito'i keen Isra'ee'l Waa'ina shokkiisakka'a hincaa'akkam kitimina ihoo luwwa hundam hincaa'llo'o. Oohim hundem Isra'ee'l minaadaphphi summinnem tommoo lam labeennuwwa, honsayyee loh gereebbi ambulluwwaa lamarayyee lamar gereebbika geex ambulluwwaa hincaa'llo'o; ee'isam baaxii'l haafixxi kitimina tommoo lam fella'i ambulluwwaa hincaa'llo'o. Oo keen hundim shokkiisakka'a Waa'ina hincaa'akkam kitim hee'ukko.

³⁶Adi'l ijaacci kitaabam Efiraaxiisiinsi eelliinchi aagginne hee'llam gassaanina hincaa'llo'o. Ixxuwwim minaadabaa Keesammi Mi'n baxoo hara'mmito'o.