Read Hadiyya Izir Kitaaba 9 Bible Online

Izir Kitaaba 9 - Hadiyya bible

Izir Kitaaba 9

¹Ee lasage Isra'ee'l awwonsaaniinsi mat mat keen i beyyo waatta'a «Isra'ee'l minaadab, qeessuwwaa Leewi'i oosoo edaa ixxuwwi olla'anne hee'llam mulli minaadabinne oohim Kana'aa'nnaanninne, Hiite'aanninne, Farze'aanninne, Iyyaabuusaanninne, Amoo'nnaanninne, Moo'aaphphaanninne, Gibxaanninnee Amoore'i manninnee eebaqqanchinne haashaaranchiinsi ixxuwwi gaga ega'llito'oyyo.

²Ixxuwwi gaginaa ixxuwwi oosinam ee mannika landa eebbo'ookko; keesammi shumo'om mulli minaadabinne hamaatto'ookko. Ee bi'ishshinam illag ikko'i keen awwonsaanoo daannuwwaa» yita'a kutto'o.

³Anim ee woshsha macceesummi ammanenne lobakata kichche'aa eedde'ummi eddechchaa kaabbaa dereerummo. Horoo'l sarataa haareeddaa goxxummo. Lobakatam kichche'aa uullanne afuurummo.

⁴Anim kichche'aa maaro'i balli kitim hincoo amman afeebe'e afuurummo. Qeefajjo'iinsi daba'llita'a waatto'i minaadab baxxo'i baaxii'l bikkina Isra'ee'l Moollanni saga'llisinne baa'lla'a kichche'llo'i keen hundim i gadanonne wixxito'o.

⁵Maaro'i balli kitim hincoo ammanenne dereerammi eddechcha edde'ummisam kichche'aa afuurummi beyyiinsi ki'ummo. Anim uullanne guruphphaa i Moollanni Waa'i kolli anga biddiqaa'aa

⁶«I Moollanna, ni baaxiil lophphaakko; ni hawwojjim iimane afaakko. I Moollanna, anim i ille ki kollonne ki'iseena tuuraammo; lobakatam sholle'aammo.

⁷Gaassi niyyanno'i doolliinsi ki'isaa kaballi afeebe'e neese keese lobakata hawwondaammo. Ni baaxiil lophphimmiinsi ki'aa neese, ni adilluwwii qeessuwwii mulli minaadab adilluwwi anganne umbaammo. Bisa'ina, boganchina, qeefadanchinaa sholle'nninaa anga uwwinaammo.

⁸Ni Moollanni Waa'a! Ni ille caakkissaatto. Ki illagennem neese nuura siindaa niinniinsi hofqax mannim agiddaniinsi wolabbanonne fillaa ka keesammi uullanne xumminne hee'nnoommisina ki doo'l ihaakko. Agiddanonne umbummaarem oono'o kaba niina haareechchi heechcha uwwitaatto.

⁹Neese agid hee'nnummo. Ihukkaarem at neese agiddanonne uttittoyyo. Faariis uulli adilluwwi niina qishixxitamisinaa foorinnem wolabbanonne fillaa gaassi gindamaa hee'u ki Keesammi Mine daballaa banxonaa Yihudannee Yerusaaleemannee xumminne hee'nnonaa ki doo'l ihukko.

¹⁰«Ihukkaarem ni Moollanna, kaba neese mayyinoommo? Neese ki ijaajo gindinaammo.

¹¹Sholliinsummokim ki awwaadaan ikko'i ‹Hiraagaaninne ki'nnuwwi lago aa'llakka'a aaggakkam uulli ee uulli minaadaphphi haashaaranchinne kolbamaakkoohane; tochchiinsi tochchi afeebe'e shigigaa'oo baxinnee haashaaranchinnee wo'mmaakkoohane.

¹²Ee bikkina ki'nnuwwi landa ixxuwwi oosina uwwitakkotte; ixxuwwi landam ki'nnuwwi oosina eebbakkotte. Qoxxaalluwwi ikkakkeena, ee uullikam er misha ittakkeenaa ki'nnuwwi oosinam heer hee'l amaxxa lago aa'issakkeenaa ee uulli manninne hore'em hidiro aaggakkotte› yitaa ijaajjaa hee'llitto.

¹³«Ni jor bax bikkinaa ni baaxii'l bikkinaa ku hawwi hundim neesenne afaakko; ihukkaarem neese keese hawwondummaanni qaxa guzumo'llittoyyo. Ee bikkenne baraara gatissaatto.

¹⁴Ee hanniinsi daba'llinaa hinkid ki ijaajo gindinaa ee jor manninne eebaqqammeena xannoommo? Atim neesenne quuqqaa matim gantoombee'isa bi'issooyyonnihe?

¹⁵Isra'ee'l Moollanni Waa'a! At hanqo'isanne oogattoohane. Ihukkaarem neese bichchiinsi baraara fissitaatto. Oono'o, neese ni baaxiilo iyyinaa ki illagenne hincineena lamboombeekeeno» yaa Waa'a uunxukko.