Read Hadiyya Nahim Kitaaba 1 Bible Online

Nahim Kitaaba 1 - Hadiyya bible

Nahim Kitaaba 1

¹Hakaaliy beet Nahim wocu woshshi kanniinsi woroon yoohane. Arxeeksis Faariis uulli adilluwwi adil ihu lamiyyi hiinchonne Kisleew[1] yakkam agananne an Nahim lob beero'onne Suusa'anne hee'ummo.

²Iyyabbaayyuwwiinsi mat hee'u Hanaan mulli manninne maqirem Yihuxxi uulliinsi i beyyo waarukko. Anim Yerusaalee'm bikkinaa qeefadanta'a Baabiloona mattoo'n gatto'i minaadaphphi bikkinaa xa'mmummo.

³Ixxuwwim «Qeefadanta'a Baabiloona mattoo'n gatto'i Ayihuxxi minaadab kee'mmaalli hawwonnee sholle'nnannee yo'o. Yerusaalee'm oottuwwim gindamaakko; ooxxi gooccuwwim shokkaakko» yita'a dabatto'o.

⁴Anim ee hundam macceesaa uullanne afuuraa wi'llummo; lobakat ballam soommaninnee kichchechchinnee higisummo. Waa'am.

⁵«Iimanenne hee'lloo Moollanni Waa'a! At lobane; neesem ki illagenne baachchinne uullinoommo. At keese iittitam keeninnee ijaajantam keeninnee ki hidi'l sagara qoxxissaa egettootto.

⁶Waa'a! Kiina awwaadaan ikko'i Isra'ee'l minaadaphphi gatimmi bikkina hiimoo ballaa keese uunxoommi uunxato macceese; eesem sawwihe. Neese Isra'ee'l minaadab banxummi baaxiilo biiraa yoommo; hanqinam anii niyyanno'ii keese hawwondaammo.

⁷Neese ki ijaajo gindinaa keese hawwondaammo; kiina awwaadaanchi ihu Muse'enne niina uwwitti seeraa gatti ogoraa egellummoyyo.

⁸Kiina awwaadaanchi Muse'ena ‹Ki'nnuwwi Isra'ee'l oos amma'nnantakka'a eese awwontakkobeelas mulli minaadaphphi lambe'enne binnaa'oommo; ihukkaarem i kolli daba'llitakka'a i ijaajo egettakkolas uulli tochchi afeebe'e bintakkota'nnim i summi weeshamoo'isina doo'llummi beyyonne dabaraa wixxaa'oommo› yitaa woccitti sagara sawwihe.

¹⁰«Moollanna, ku keen kiina awwaadaanoo ki gaqqi minaadabaa; kanniinsi illageenim ki malaayyinnee qoxxaalli ki wodinnee gatissaatto.

¹¹Oono'o ki agishshi an uunxoommi uunxato macceese; ee'isam keese lonsitam mulli awwaadaa'nnekam macceese; kaballa an sawwoommi sawwit taaphanoo'isina adilluwwi adi'lleka wodano maashise» yaa uunxummo. Ee ammane an adi'l minenne woyi'n diqaasa danaanaanchi hee'ummo.