Read Hadiyya Nahim Kitaaba 10 Bible Online

Nahim Kitaaba 10 - Hadiyya bible

Nahim Kitaaba 10

¹Eekkam gassaanchi Hakaaliy beet hee'u gassaanchi Nahimii Sedeeqiyaasii koobbo'o. Ee lasage odim kanniinsi woroon yo'i manni koobbo'o.

²Ixxuwwim qeessuwwi moolliinsi Saraay, Azaariy, Ermiyaas, Phaashuur, Amaariy, Maalkiy, Haxuush, Shabaaniy, Maaluk, Hariim, Maremoot, Abdiy, Daani'eel, Giinaatoon, Baaruuk, Maashulaam, Abiiy, Miiyaamiin, Ma'aaziy, Biilgaayii Shamaa'iyii hee'llo'o.

⁹Leewi'i oosiinsi Azaaniyi beet Iyyaas, Henaadaad moollik Biinuy, Qaadmi'eel, Shabaaniy, Hodiiy, Qaliix, Phalaay, Hanaan, Miika'a, Rahoob, Hashaabiy, Zaakur, Sheereebiy, Shabaaniy, Hodiiy, Baani'ii Baanuunii hee'llo'o.

¹⁴Minaadaphphi awwonsaa'n moolliinsi Phaaroosh, Phahaatmoo'aab, Eelaam, Zatu'i, Baani'i, Buuni'i, Aazgaad, Beebaay, Adooniy, Bigwaay, Aadiin, Axeer, Hizqiyaas, Aazuur, Hodiiy, Hashuum, Beexaay, Hariif, Anaatoot, Neebaay, Maagphaash, Mashulaam, Heziir, Masheezaabi'eel Xaadooq, Yaadu'i, Phalaaxiy, Hanaan, Aanaay, Hoose'i, Hanaaniy, Hashuub, Haloheesh, Phiilih, Shobeeq, Rahuum, Hashaabin, Maa'iseey, Akiiy, Hanaan, Aanaan, Maaluuk, Hariimii Ba'aanii hee'llo'o.

²⁸Gatto'i Isra'ee'l minaadab, Qeessuwwi, Leewi'i oos, Keesammi Mi'n oox gooca egeraan, zammaaraan, naataaniimmuwwi, Waa'a seera doo'llito'i mulli keen hundim, ixxuwwi meenti, goon, landii qoossita'a laqqeena xantam keenii hundim

²⁹ixxuwwim ixxuwwi abbaayyuwwinnee awwonsaaninnee maqirem ixxena agishshi hee'u Muse'ennetti ihaa Waa'i uwwu Seera, ijaajo, oogato'oo gatti ogoraa hundam egatteenaa ijaajanteenaa iittanta'a mateeyyoominne hidi'l sagara aaggo'o.

³⁰Ni uullanne hee'llam mulli minaadaphphi manninne eebaqqammoommoyyo.

³¹Ee'isam usheexxaxxi ballanne te'im mulli uguxxi ayyaammuwwanne mulli uulli manni dadda'l mu'uta te'im annanni annanni hurbaata biteesseena eebbota'nnim neese ixxuwwiinsi bitaa'nnoommoyyo. Lama'l hinqaayyinsummi liqaayyi diinatem miqinsoommoyyo.

³²Hiinchonne hiinchonne Keesammi Mi'n awwaadina ihoo mat kin bi'l saxxi suume annannichchim eembaa uwwinoommo.

³³Ee'isam Keesammi Minenne ihoo awwaaxxi ammane hincoo keesammi daabbo'oo hundi ballam hincoo hurbaaxxi kitimaa shokkiisakkam kitimina ihoo fooraam diinatee usheexxaxxi ayyaamonnee aga'n aaggannee la'amaakkoo uguxxi ayyaammuwwannee odim mulli keesammi kitimmuwwaa hundam Isra'ee'l minaadaphphi baaxiil shiinshamona hincookkokaa Keesammi Minina hasisoo mulli luwwaa hundam hincaa'nnoommo.

³⁴See'l kitaabanne kitaabamukkisinnem hiincho hiinchonne ni Moollanni Waa'ina hincoo kitima shokkiisakkam haqqa hinki moolli hinki ammane hincaa'immi hasisooda'e neese minaadab, qeessuwwii Leewi'i oosii saaminne axinsoommo.

³⁵Hurbaaxxaanniinsii hundem haqqi mishiinsii ludo hiincho hiinchonne Keesammi Mine eembaa uwwinoommo.

³⁶See'l kitaabanne kitaabamukkisam ni goo'n oosika, la'lleka, gereebbikaa fella'ikaa wona Keesammi Minenne awwaadoo qeessichchina eembaa uwwinoommo.

³⁷Hurbaata wixxaa'akkam agananne wixxaa'nnoommi hurbaaxxeka, woyi'n diqaasika, wee'l zaytikaa ee'isam mulli itakkam haqqi mish hundikamii ludo Keesammi Minenne awwaadoo qeessichchina uwwinoommo. Ni abuulli uulluwwiinsi gibiro wixxaa'llamok Leewi'i oos ikko'i bikkina neeso'i uulli mutisoo luwwi hundiinsim tommiinsi mato ixxuwwina uwwinoommo.

³⁸Leewi'i oos tommiinsi mato wixxaa'llam ammane Aaroon shumo'iinsette ihu qeessichchi ixxuwwinne maqire hee'oona. Ee Leewi'i oos wixxaa'llam asiraatiinsi odim tommiinsi mato Keesammi Mi'n mu'uta dissakkam minenne eebba'a dissitona.

³⁹Isra'ee'l oosii Leewi'i oosii hurbaatiinsi, woyi'n diqaasiinsii wee'l zaytiinsii wixxu kitima aa'lla'a tarinne awwaaddam qeessuwwi, ooxxi gooca egeraanii zammaaraanii hee'llam minee Keesammi Mi'n mu'uta dissakkam minee eebba'a dissitona. Neesem ni Keesammi Minenne hore'em innaanninoommoyyo.