Read Hadiyya Nahim Kitaaba 2 Bible Online

Nahim Kitaaba 2 - Hadiyya bible

Nahim Kitaaba 2

¹Arxeeksis adil ihu lamiyyi hiinchonne «Niisaana» yakkam agananne mat ayyaamo adilina woyi'n diqaasa hincaa'ummo; ee balliinsi bagaan mulli balla an kichche'aa moo'u balli bee'e.

²Ee bikkina adil eese «Mahina lobakata kichche'llaate? Xissitoo'nnim ki illi kaa'nna heemachchukkok mahinatte?» yaa xa'mmukko. Anim lobakata baddummuuyyi

³«Adilluwwi adil heer heerina hee'ona; gaassi niyyanno'i waammi yoo beero'i gindamaahii ooxxi gooccuwwim giirinne shokkaahii i illi mahina heemachchooyyo» yaa dabarummo.

⁴Adilim «Eehannah at issiteena hassoo luwwi maha?» yaa xa'mmukko. Anim iima'n Waa'a uunxaa

⁵Adilina «Adila, keese liiransoolasii ki doo'l ihaakkoolasii Yihuxxi uullanne gaassi niyyanno'i waammuwwi yoo Yerusaalee'm beero'o maroommisaa ee beero'om dabaraa baxoommisaa isse» yaa uunxummo.

⁶Ee ammane adi'l mi'n ama adi'l gadanonne affuta'a hee'llo'o; adilim i sawwitte aa'aa «Goog hinkaa'n ammane massookko? Hinkaa'nnanne daba'lliteena xantootto?» yaa xa'mmukko. Anim masseena xanoo ammanee odim daba'lleena xanoommi ammanee kurummo.

⁷Odim adilina «Efiraaxiis daajjiinsi eeqidonne eelliinchi aaggi kolli uulla gassaanina Yihuxxi uulla marummuuyyi eese hawwissambee'isa assi kitaaba kitaabbaa uwwe» yaa uunxummo.

⁸Ee'isam Keesammi Mi'n ooxxi goocina, beero'i ooxxi gooccuwwinaa an usheexxoommi mi'n baxinaa ihoo haqqa murona ijaajoo assi kitaaba adilla'n haqqa egeroo Asaafina kitaabona xa'mmummo. Waa'ikim biijoom iinninne maqire hee'u bikkina adil an xa'mmummoka hundam uwwukko.

⁹Adilim hofqax gaaxxi awwonsaanoo faradaanoo iinninnem maroo'isa issukko; anim Efiraaxiis daajji eeqidinne, eelliinchi aaggi kollinne aa'aa marummo. Ee daajji eeqidom afaa lasage ee uulli gassaanina adi'l assi kitaabbuwwa uwwummo.

¹⁰Ihukkaarem Beetihooroo'n beero'iinsetti ihu Sanbalaxii Amoo'n uulli gassaanchi Xoobbiyii Isra'ee'l oos bikkina eroomma sawwoo manchi waarukkisa macceessa'a lobakata qacqacito'o.

¹¹Anim Yerusaaleema afaa lasage sas balla ee beyyonne afuurummo.

¹²Ee lasage hofqax manninne maqirem ee beero'ina maha issoomda'e Waa'i iina caakkisu luwwa ayyenam kuroo'nnim hiimonne ki'aa marummo; iinninnem an saa'llaa hee'ummi hallichchiinsi bagaan mulli diinat mahim hee'ukkoyyo.

¹³Uulli soodoo'nnim Cebbi Ooxxi goocinne aa'aa Xarakkichchi Bu'o yakkam beyyinne higaa woroo'n qaranne ‹Hacca Uunji Gooca› yakkam beyyo afummo. Eeheen higummuuyyim gindamu Yerusaalee'm ootaa giirinne shokkaakkoo ooxxi gooccuwwaa do'aa moo'ummo.

¹⁴Ee lasage beero'iinsi eelliinchi firinne yoo «Bu'i firoo gooca» yakkam beyyinnee adi'l delbi gadaninnee higaa marummo; ihukkaarem an saa'llaa hee'ummi hallichcho higgseena xanoo goog horem hee'ukkoyyo.

¹⁵Anim ee hiimo Qeediroo'n cebbi gammalinne higaa gindamu oota hundam moo'aa lasonne ee marummi googinnem daba'llaa Cebbi goccinne beero'o aagummo.

¹⁶Ee ammane ee uullanne hee'llo'i gassaaniinsi matim an hanno marummida'ee mah issuma'ee la'ukkoyyo; ee'isam iinninne hee'llo'i Yihuxxi i beshshuwwina, qeessuwwina, awwonsaanina, gassaanina, maqire baxxam keeninaa mulli keeninaa maham kurummoyyo.

¹⁷Anim ixxuwwina «Neese kaba Yoommine'i adaraallano, Yerusaaleemim gindamukkisaa ooxxi gooccuwwim giirinne shokkukkisaa moo'llakkamuulla. Ee bikkina kaba waallehe ka lasage sholle'nnoombee'isa beero'i oota daballaa banxona» yummo.

¹⁸Waa'im iinninne hee'ukkisaa adilim iina hara'mmu hara'mmatoo hundam ixxuwwina kurummo. Ixxuwwim ki'nnaa banxona yito'o. Ixxuwwi angam ee danaam baxina qoxxisso'o.

¹⁹Ihukkaarem Sanbaalaax, Xoobbiyii Araphphi Geesheemii banxeena murte'nnaa ki'nnummisa macceessa'a neesenne osatto'o. Naacantu'uuyyim «Ku baxxakkam bax maha? Adilluwwi adilina ijaajancha sabbakkeena hassakka'ahinnihe?» yita'a xa'mmito'o.

²⁰Anim «Niina iima'n Waa'i hara'mmookko; neesem ixxi awwaadaan ki'nnaa banxoommo. Ihukkaarem ki'nnuwwina Yerusaaleemanne sharad, hanqii niihane yitakkam luwwii te'im ki'nnuwwa tiirakkam aganni hee'ooyyo» yaa dabarummo.