Read Hadiyya Nahim Kitaaba 3 Bible Online

Nahim Kitaaba 3 - Hadiyya bible

Nahim Kitaaba 3

¹Yerusaalee'm beero'i oot daba'llaa ootamukkok kanniinsi woroon yoo'isannette. Hundiinsi lob qeessichchi Eelyaashiibii ixxena besh ikko'i qeessuwwii «Gereebbi Gooca» yakkam gooca baxxo'o; gooc xufa aagissa'a Waa'ina keesamaakkoohan issito'o. Ee ootam «Xibbe» yakkam godo'iinsi ki'isaa «Hanaani'eela» yakkam ki'n ooxxi godo'i afeebe'e Waa'ina keesamaakkoohan issito'o.

²Ee beyyiinsi ki'issa'a Yaarko'i manni baxxo'o; ixxuwwiinsi ki'isaa yookkoka odim Imiir beet Zaakur baxukko.

³Haasina'i oosim «Qurxumme'i Gooca» yakkam beyyi oota ootto'i utubbuwwam uullissa'a xuffeewwa aagisso'o; ee xuffeewwinam laqqo'uwwa, qirqire'uwwaa qulfuwwaa axisso'o.

⁴Ixxuwwi afissa'a uullisso'i beyyiinsi ki'isaa Haqoox beetina beet Uuriy beet Mareemoot baxukko. Ixxeensi ki'isaa Masheezaabeel beetina Baaraakiy beet Mashulaam baxukko. Eehanniinsi ki'isaa yookkoka odim Ba'aan beet Saadooq baxukko.

⁵Eehanniinsi ki'isaa yookkoka Taaqo'i beero'i manni baxxo'o; ihukkaarem ee beero'i daannuwwi ixxuwwina qoodamu baxxancha baximma sabbo'o.

⁶Yishaan ooxxi goocam Phaaseh beet Yoodaahee Baasoodiy beet Mashulaamii baxxo'o; utubbuwwam uullissa'a xuffeewwa aagisso'o; xuffeewwinam laqqo'uwwa, qirqire'ee qulfuwwaa axisso'o.

⁷Eehanniinsi ki'isaa yookkak Gaba'oo'n Malaaxiy, Meeronoot Yaadoonii Gaba'oo'nnekii Misiphphi beero'i mannii Efiraaxiis daajjiinsi eelliinchi aaggi uulli gassaanchi mi'n beyyi afeebe'e baxxo'o.

⁸Eehanniinsi ki'isaa yookkoka Worqa bukkaa baxoo Haarihay beet Uzi'eel baxxukko. Odim shitto'o gudisam hee'u Hanaaniy eehanniinsi ki'isaa yookkoka baxukko. Oohim «Haraar Oota» yakkam beyyi afeebe'e yoohan hee'ukko.

⁹Eehanniinsi ki'isaa yookkoka Yerusaalee'm gassi uullika kollo gassaanchi hee'u Huur beet Raafaay baxukko.

¹⁰Harumaf beet Yaadaay ixxi mi'n illagenne yoo beyyo baxukko. Ixxeensi ki'isaa odim Hashaabaaniy beet Haatush baxukko.

¹¹Haara'm beet Malkiyii Phahaatmoo'aab beet Haashubii awwonaa yoo beyyo te'im «Gii'l midachcha» yakkam beyyi utuba baxxo'o.

¹²Ixxuwwiinsi ki'isaa yoo beyyo odim Yerusaalee'm gassi uullika kollo gassaanchi ihu Halooheesh beet Shaaluum baxukko. Ixxi landim ee baxo hara'mmitam hee'llo'o.

¹³Haanunannee Zanohaanannee hee'llam manni hara'mmanta'a «Cebbi Gooca» yakkam gooca baxxo'o; xuffeewwam aagisso'o; xuffeewwinam laqqo'uwwaa, qirqire'uwwaa qulfuwwaa axisso'o. Ee'isam Hacca Uunji Gooc afeebe'e yoo 1,000 anga ihoo oota dabatta'a ootto'o.

¹⁴Beetihakaaree'm uulla gassaanchi hee'u Reekab beet Maalkiy Hacca Uunji Gooca haareechchisaa baxukko; xuffeewwam aagisukko. Ee xuffeewwinam qulfuwwaa laqqo'uwwaa axisukko.

¹⁵Misiphphi uulla gassaanchi hee'u Kolhoozee'i beet Shaluum Bu'i Gooca dabaraa baxukko. Goocannem goobinaancho issaa xuffeewwa aagisukko. Xuffeewwinam laqqo'uwwa qirqire'uwwaa axisukko. Ee'isam adi'l duubbi kaashshi beyyi gadanonne yoo Sheela'i bu'i beyyiinsi ki'isaa Daawiit beero'i cebba dillakam gardabbi afeebe'e yoo baxxancha baxukko.

¹⁶Ee lasage odim Beetixuur zoo'n kolli uulla gassam hee'u Azibuuq beet Nahim Daawiit Waammi illagiinsi ki'isaa «Wo'i Delba» yakkam beyyoo «Geedduwwi Wiiddana» yakkam beyyoo afeebe'e yookkoka dabaraa baxukko.

¹⁷Eehanniinsi lasage yoo beyyo Baani'i beet Rahuum baxukko. Qa'ila'i zoo'nneka kollo gassam hee'u Hashaabiy ixxi zoona bikkaa baxukko.

¹⁸Ee beyyiinisi ki'isaa yoo baxxancha odim Qa'ila'i zoo'nneka kollo gassam hee'u Heenaadaad beet Baawaay ixxi abbaayyuwwinne maqirem baxukko.

¹⁹Misiphphi zoo'n gassaanchi hee'u Iyyaas beet Eezeer o'l mu'uta dissakkam mi'n illagenne yoo beyyo ooxxi tochchonne yoo higakkam beyyi afeebe'e ootukko.

²⁰Ee lasage Zabaayyi beet Baaruuk ee lasaanchi tochchiinsi ki'isaa hundiinsi lob qeessichchi Eeliyaashiib mine aagakkam gooc afeebe'e yoo baxxancha qoxxaa baxukko.

²¹Haqoox beet beet ihu Uuriy beet Mareemoot qeessuwwa awwonsaanchi Eeliyaashiib mi'n lasaanchi afeebe'e yoo oota ootukko.

²²Eehanniinsi lasonne yoo baxxancha odim Yerusaalee'm kululleetanne hee'llo'i qeessuwwi ootto'o.

²³Ixxuwwiinsi ki'isaa Biiniyaamii Hashuubii ixxuwwi hee'llam minneewwi illagenne yoo beyyo ootto'o. Anaaniy beet beet Azaariyim ixxi hee'oo mi'n gadanonne yoo beyyo ootukko.

²⁴Henaadaad beet Biinuy Azaariy mi'n beyyiinsi ki'isaa lasaanchi tochchi afeebe'e yoo beyyi oota ootukko.

²⁵Uuzaay beet Phalaal ooxxi lasaanchi tochchiinsii waardiyyuwwi egattam beyyi gadanonne yoo hanaa'n kolli adi'l mine egerakkam beyyiinsii ki'isaa ootukko. Phaaroosh beet Fadaayii Oofee'l duu'n beyyonne hee'llam qeessuwwina hara'mmitam Keesammi Mi'n awwaadaanii wo'i ooxxi gooca yakka'a weeshakkam beyyi illagenne eelliinchi firinne Keesammi Mine egerakkam beyyi afeebe'e yoo oota ootto'o.

²⁷Ee lasage odim Taaqo'i manni waa'i mine egerakkam lob gimbi beyyi illagenne yoo beyyi ki'isaa Oofee'l ooxxi beyyi afeebe'e yoo oota ootto'o.

²⁸Mulli qeessuwwi odim Faraxxi gooca yakkam ootiinsi hanaa'n qarinne yoo oota annannichchim ixxuwwi hee'llam mi'n illage amadda'a ootto'o.

²⁹Ee lasage Imeer beet Saadooq ixxi hee'oo mi'n illagenne yoo beyyo ootukko. Eehanniinsi ki'isaa yookkokam eelliinchi firoo kolli gooca egeraanchi hee'u Shakaaniy beet Shamaa'iy ootukko.

³⁰Shelemiy beet Hanaaniy Xalaafenina loh beyyi beet Hanuunii ixxuwwina la'm kore uwwamu baxxancha baxxo'o. Baraakiy beet Mashulaamim ixxi mi'n illagenne yoo oota ootukko.

³¹Ixxeensim ki'isaa yoo oota odim worqa baxookeeniinsi mat hee'u Malkiy lob gooc illagenne yoo keescommi Mi'n awwaadaanii daddaraanii hee'llam ooxxi tochchiinsi hanaa'n qa'l eelliinchi firinne yoo beyyi afeebe'e ootukko.

³²Worqa bukkita'a baxxam keenii daddaraanii ooxxi lasaanchi tochchiinsi ki'isaa gereebbi ooxxi gooc afeebe'e lasaanchi baxxancha baxxo'o.