Read Hadiyya Nahim Kitaaba 4 Bible Online

Nahim Kitaaba 4 - Hadiyya bible

Nahim Kitaaba 4

¹Sanbaalaax neese ooxxi baxxo asheellummisa macceesaa lasage lobakata quuqukko. Qacqacaahim neesenne naacancha asheerukko.

²Ixxim ixxi beshshuwwi illagennee Samaare'i gaadaa'n illagennee «Ku hoogaan Ayihuxxi manni maha baxxeena sawwita'ate? Ka gindamu beero'o dabatta'a baxxeena hassa'atennihe? Waa'ina kitima kitimimminne mexxo'i mat ballanne baxamaa guullamoo labisamaahinnihe? Ooxxi gimbina ihoo kina eehid shokka gindamaa ki'aa tuubamu woriinsi fissameena xanamoo labisamaahinnihe?» yaa wocukko.

³Ee ammane ixxi gadanonne uullaa hee'ukkis Amoonekkichchi Xoobbiyim «Ixxuwwi hinkido'i oota ootteena hassa'atette? Ixxuwwi oottam oota wengereellichchi hanenne firuta'n gindooyyonnihe?» yaa gadaa wocukko.

⁴Nahimim «Ni Moollanni Waa'a! Neese hinkaa'nna gadammumda'e at moo'e. Ka ixxuwwi game'llato at ixxuwwi hanennem isse. Ixxuwwina yoo amaxxa ixxuwwi hundim boganta'a qeefadantamisa isse.

⁵Gindamu oota dabatta'a oottam kee'n illagenne keese quuqisam bikkina at ixxuwwi jolle hundam uraammo yititte. Ixxuwwi baaxiilom ki illagiinsi shiinshititte.

⁶Minaadabim baxina wodaninne murte'aa ki'u bikkina oota dabarakka'a ootimma qaqqisom kolli issito'o.

⁷Ihukkaarem Sanbaalaaxii Xoobbiyii ee'isam Araphphi uulli manna, Amoo'n mannaa Ashdooxxi mannaa exxita'a Yerusaalee'm ooxxi bax qaqqisaa baxamoolli ihukkisaa gindamaa hee'u beyyuwwi hundim baxamukkisaa macceessa'a lobakata quuqqo'o.

⁸Ee bikkina ixxuwwi hundim mat ikka'a Yerusaaleema waatta'a qasseenaa atanaachcha fissiteenaa a'llanto'o.

⁹Ihukkaarem neese ni Waa'i kolli uunxato hincaa'nnummo. Ixxuwwi jolli baxinnem uullixantam hiimoo ballaa egettamisa issinummo.

¹⁰Ee ammane Yihuxxi manni «Iyyi kee'mmaa lobakata hoogisoolla; gindamaa ubu ooxxi tuubbi lobakata; ee bikkina ka oota kaballa daballaa banxeena xannoommoyyo» yito'o.

¹¹Ni diina'i odim «Ixxuwwi lambe'enne aangaa ixxuwwa shineembe'ee ixxuwwi baxxam baxom uullinseembe'ee maham laqqammoyyo te'im siiddamoyyo» yito'o.

¹²Ihukkaarem ixxuwwi gadanonne hee'llam Ayihuxxi manni tommi kore ni beyyo daba'llantu'uuyyi neense hawwoddeena a'llanto'i a'llancha hundam niina kutto'o.

¹³Ee bikkina ootiinsi biiree'n kollinne annannoomam ootamaa beeddubee'i kollinne bisa'a, bagadoo xiyyaa amadda'a egattam egeraano moolli moollinnem dissummo.

¹⁴Minaadabim lobakata kichche'ukkisa moo'aa lasonne gassaanina lommanninaa mulli gatu minaadabinaa «Ki'nnuwwi diina'i bikkina badditakkotte. Malaayyaam lombinnem baddisoo Waa'a sawwi'llehe. Ki'nnuwwi abbaayyuwwa, ooso, ki'nnuwwi meentoo amaxxaa sawwitakka'a iggitakka'a orammehe» yummo.

¹⁵Neese ni diina'ika moqqo'o lanqummisaa Ni Waa'im ixxuwwika a'llancha gindukkisaa laqqo'o. Neesem annannichchim oontoommi oota daba'llinaa oontummo.

¹⁶Ee balliinsi ki'isaa iinninne yo'i manniinsi kolli baxo baxxam hee'llo'o. Kolli odim agiraa bagadoo xiyyaa amadda'ahii o'l eddechcham edde'lla'ahii hee'llo'o. Ni gassaanim minaadabiinsi lasinne uullita'a,

¹⁷ooxxi baxo baxxam keeno hara'mmitam hee'llo'o. Mulli keen odim mat anginne mu'uta hincaa'llu'uuyyi matinne odim o'l mu'uta ammaddam hee'llo'o.

¹⁸Ee'isam gimba baxxam keen hundim bisa'a lamadonne lade'lla'a baxxam hee'llo'o. Ihona bagaan xurumba fugoo manchi iinniinsi annanni iham hee'ukkoyyo.

¹⁹Ee lasage an minaadaphphi awwonsaaninaa lommanninaa minaadab hundinamii «Ooxxi bax lobakata haraar ihu bikkina neese qee'llo qee'llonne yoommine.

²⁰Xurumbi sagara macceessakkam ammane ni kollonne waallehe. Ni Waa'im ni bikkina oramookko» yummo.

²¹Ee bikkina soodaraar dariinsi ki'isaa boollaanki fireebe'i afeebe'e banxam hee'nnummo. Kolli mannim o'l mu'uta amadda'a egettam hee'llo'o.

²²Ee ammane minaadabina «Hiimoo beero'o diina'iinsi egerimmina ballaa, baxo banxeena xannona ki'nnuwwi hundim ki'nnuwwi awwaadaaninne maqirem Yerusaalee'm beero'i woronne gallehe» yummo.

²³An, Iyyabbaayyuwwi, iinninne maqire hee'llo'i egeraanii mulli baxaanii hundim edde'nnummi eddechcha sheelantam hee'nnummoyyo. Balli hundoomam wo'ina malloommi ammanem ihukkaare o'l mu'ut ni angiinsi annanni iham hee'ukkoyyo.