Read Hadiyya Nahim Kitaaba 5 Bible Online

Nahim Kitaaba 5 - Hadiyya bible

Nahim Kitaaba 5

¹Ee amanne minaadabiinsi lobakat goonii meentii Ayihuxxi awwonsaanonne mat ikka'a ki'llo'o.

²Ixxuwwim neesee ni abaroosii lobakat inkummi bikkina intaa hee'nnoommi hurbaata hansoommo» yito'o.

³Mulli keen odim «Uullanne ihu qoxxaalli sibaariinsi ki'aa ni foore gatinsoommi hurbaatina ihoo abuulli uullaa woyi'n mish haqqi beyyoo ni minee amadiinseembe'i afeebe'e amfaammo» yito'o.

⁴Mulli keenim «Faariis uulli adilina abuulli uullikaa woyi'n haqqi beyyikaa gibiro minqeena diinate liqaayye aa'nnaammo.

⁵Neesem niyyabbaayyuwwinnem maarinnee xiiginnee matome. Ni oosim ixxuwwi oosisame. Ihukkaarem neese ni ooso agiddanina higinsaa uwwinaammo. Ni landiinsim mat mat hore'oomam agidanina biteesanta'a kabadem yo'o. Abuulli uullii woyi'n mish haqqi beyyi niinniinsi massamu bikkina neese hoongaan inkaammo» yitam hee'llo.

⁶Anim ee ixxuwwi laachchi sagara macceesaa lobakata nadadummo.

⁷Anim ee bikkina lobakata sawwaa lasage minaadaphphi awwonsaanoo gassaanoo «Ki'nnuwwi hinkid ki'nnuwwi abbaayyuwwa hawwodakkamo? Mahina qaro'o aa'llakko'o» yaa quuqummo. Ee'lloo sawwitem atoorarimmina manni hundam wixxaa'ummo.

⁸Awwonsaanom «Hanqo'i Waa'a laqqambee'i mannina biteesanta'a hee'llo'i niyyabbaayyuwwa neese ni malaayyi qaxinne hundinnem bitaa'nnaa gatinsaammo. Kaba ki'nnuwwi odim ki'nnuwwi abbaayyuwwa biteessakkamonnihe? Ixxuwwi ki'nnuwwina agid ikka'a biteesantamisa issitakku'uuyyi Yoontakke'e» yaa shaaqummo. Ixxuwwim dabattam dabachcha hoogga'a cawwito'o.

⁹Odim edaamma «Ku baxxakkam bax danaamoyyo; hanqo'i Waa'a laqqambee'i ni diina'i game'llato; bi'issakkeena ni Waa'a baddimminne awwonim hasisam hee'ukkoyyonnihe?

¹⁰An, iyyabbaayyuwwii i awwaadaanii ixxuwwina diinatee hurbaataa liqaayyinsaammo. Ihona bagaan qaro'o miqisimma ullona.

¹¹Ixxuwwiinsi massitakko'i abuulli uullaa woyi'nnekaa wee'l zayyixxi haqqi beyyoo minee daballehe. Ee'isam hurbaaxxeka, diinaxxeka, haareechchi woyi'n diqaasikaa zayixxekaa xibbiinsi mat suume kaballa daballehe.

¹²Ixxuwwim «Daballoommo, qaro'o maham aa'nnoommoyyo. At yittoka hundam issinoommo» yito'o. Anim qeessuwwa weeshaa minaadaphphi awwonsaan aaggo'i sagara egettona hidiisummo.

¹³Anim edde'ummi eddechchika kasa giggissaa «Aagu neeyyaxxi sagara egeroobee'i ayyi manchom Waa'i ixxi minee ixxi amaxxaa hundam ka'isa giggissona. Eehido'i manchim ka'isa giggironaa mahim bee'an ihona» yummo. Ee ammane ee beyyonne yoo manni hundim «Aameen» yaa Waa'a galaxxukko. Minaadaphphi awwonsaanim aaggo'i sagara egetto'o.

¹⁴Adil Arxeekisis adilluwwi adil ihu lamiyyi hiinchiinsi ki'isaa sadii lam adilla'n maaragii afeebe'e an Yihuxxi uullanne gassaanchi ihaa doo'llamummi tommonnee lam hiinchi woronnee anii i beshii gassaanina hasisoo hurbaata intummoyyo.

¹⁵Ihukkaarem iinniinsi illageen hee'llo'i gassaan minaadabanne iyyo ubbuussa'a ittam hurbaatiinsii woyi'n diqaasiinsii mulleka sor kin biraa massitam hee'llo'o. Ixxuwwi awwaadaanim ee'isam minaadaba hawwissam hee'llo'o. Ihukkaarem an eekka issummoyyo mashka'oomim an Waa'a baddoommi bikkinatte.

¹⁶Iina yoo qax malaayyinne hundinnem gindamu oota dabaraa ootummo bagaan i gaqqi uulli te'im amaxxi iina mahim hee'ukkoyyo. Odim hundem i awwaadaanim baxina wixxitam hee'llo'o.

¹⁷Ni kolli waattam hanqo'i Waa'a laqqambee'i ni heegeegonne hee'llam manniinsi mulleka mat xibbii ontayyi Ayihuxxi mannii ixxuwwi awwonsaanii iinninne maqire hurbaata ittam hee'llo'o.

¹⁸Balla ballanne mat mirgo'i, doo'llammi gereebbik loh, lobakat antabaa'ii ee'isam tommi ballanne mat kore lobakat woyi'n diqaasii iina gudam hee'ukko. Ihona bagaan mat uulli gassaanchina qoodamaa ihimmi hasisoo hurbaata hasummoyyo. Mashka'oomim mannanne iyyiisamaa hee'u iyyi kee'mmaalli ihukkisa la'oommi bikkinatte hee'ukko.

¹⁹I Moollanni Waa'a! Ka minaadabina issummoka moo'llaa eroomminne sawwihe.