Read Hadiyya Nahim Kitaaba 6 Bible Online

Nahim Kitaaba 6 - Hadiyya bible

Nahim Kitaaba 6

¹Sanbaalaax, Xoobbiy, Araphphi uulli Geesheemii mulli diina'ii oota oontaa guullinummisaa ootamoo'n gatu beyyim bee'isaa macceesso'o. Ihukkaarem ooxxi gooccuwwanne xufa aaginsummoyyom hee'ukko.

²Ee bikkina Sanbaalaaxii Geesheemii «Oono'o qaala'i biiranne yoo hegeegguwwiinsi matonne edammona» yita'a asse'llo'o. Oohim eese hawwoddeena sawwito'i bikkinatti hee'ukko.

³Anim «An lobakat baxinne matayyaammoo bikkina eekka uraa ki'nnuwwi beyyo waareena xanoommoyyo; ki'nnuwwinne edanchi bikkina bax uullona hasoommoyyo» yaa asse'ummo.

⁴Ee assom dabaransamaa soor kore asse'amukko; anim luxxeka dabarummisam soorem korem dabaraa asse'ummo.

⁵Ee lasagem Sanbaalaax ixxi awwaadaaniinsi matonne oonti kore asse'ukko.

⁶Asse'u assim «Atii Ayihuxxi minaadabii bangujjitakkeena hassakka'a oota dabattakka'a oottakku'uuyyi yoontakke'isaa atim ixxuwwina adil ekkeena hassittisaa ni hegeegonne hee'llam mulli minaadab hundim woccamuulla; oohim hanqi ihukkisa Geesheem kuraakko.

⁷Odim at ixxuwwina adil ikkittisaa Yerusaaleemanne alallaattam hiraagaano doo'llittisaa edaa kuraakko; oo woshshim adilluwwi adilina macceesammoo'is la'amaakkoohane. Ee bikkina atii anii edammaa ee woshshanne a'llammona waare» yoohane.

⁸Anim «Oo at yitoo woshshi hundim ki gaqqi sawwite bagaan qophphano» yaa dabarummo.

⁹Ixxuwwim ee'isinne ni malaayyi hoogaa baxo uullinsoommoka labissa'a neese baddissam hee'llo'o. Anim «I Moollanni Waa'a! Kabadem at i anga qoxxise» yaa uunxummo.

¹⁰Ee ammane miniinsi firoobee'isa ixxi hanenne gooc xufamaa hee'u Mahexaabi'eel beet beet hee'u Daalaay beet Shamaa'iy mine marummo. Ixxim «Dangonne mat hiimo waatta'a shiteena xantam bikkina atii anii Keesammi Mi'n woronne aangaa gooca xunfaa maaxammona» yukko.

¹¹Ihukkaarem an «Iinni'nno'i manchi gibaa maaxamooyyo; Keesammi Mi'n woronne maaxamaa i foore gatiseena hasoommi mancho laboomonnihe? Eekka an hore'em issoommoyyo» yaa dabarummo.

¹²Anim ee woshsha qoossaa sawwoommaare Shaamaa'iy iina eehid yukkok Xoobbiyii Sanbaalaaxii diinatinne bitaa'llo'i bikkinatte bagaan Waa'iinsi asse'amubee'i hiraagaanchi ihukkisa la'ummo.

¹³Anim ee ixxuwwi sawwite aa'aa baa'oommisaa jora baxoommisaa issoohaare ixxuwwi i summa bi'isseenaa eesem sholliisseenaa birinne bitaa'llo'isa la'ummo.

¹⁴Anim «Waa'a! Xoobbiyii Sanbaalaaxii baxamu baxo hundam moo'ee; odim Noo'aadiya yakkam meentichcho hiraagaanchoo mulli qophpha'n hiraagaanii eese baddisameena issamukkoka hundam sawwihe» yummo.

¹⁵Ooxxi baxim asheeramu ontayyennee la'm ballannee Eeluulaa yakkam aga'n lamiyyennee onti ballannee beeddukko.

¹⁶Ni kululleetanne hee'llam niina diina'i ikko'i mulli minaadab bax maalalsiisoohan ihukkisaa Waa'i hara'mmatinne baxamukkisaa laqqa'a lobakata baddito'o.

¹⁷Ee ammane Yihuxxi awwonsaaniinsi lobakat xoobbiyinne assi xummaatto dabassaqantam hee'llo'o.

¹⁸Oohim Iirah beet Seekeen Xoobbiyina ballichchi ihu bikkinaa ixxi beet Yoohaanaanim Baaraakiy beet hee'u Maashulaam landichcho eebaa hee'u bikkinaa Ayihuxxi manniinsi lobakat ixxenne hidi'l sagara aagaa hee'ukko.

¹⁹Ee'isam Xoobbiy er manchi ihukkisa kuttu'uuyyi bittam hee'llo'o; an wocoommi luwwi hundam ixxena massita'a kuttam hee'llo'o. Ee bikkina ixxi odim eese baddiseena araq ammane assi kura kitaabam hee'ukko.