Read Hadiyya Nahim Kitaaba 8 Bible Online

Nahim Kitaaba 8 - Hadiyya bible

Nahim Kitaaba 8

¹Isra'ee'l minaadab lama'l agananne ixxuwwi gaqqi beero'uwwanne guullita'a aaggo'o; ixxuwwim ee aga'n luxxi ballanne Yerusaaleemanne wo'i gooca yakkam wixxixxi beyyiinsi worinne minaadab hundim wixxukko. Waa'im Muse'enne Isra'ee'l minaadabina uwwu See'l kitaaba eebona kitaabaanchoo qeessichchoo ihu Izira xa'mmito'o.

²Izirim lama'l agan aagu luxxi ballanne goon, meentii qoor oosii wixxaa yoo dummichchi beyyo ee See'l kitaaba eebukko.

³Izirim ee wixxixxi beyyi gooc gadanonne uullaa dariinsi ki'isaa sammi gud balli afeebe'e ee See'l kitaaba sagara iimaa'aa qananaa'ukko; minaadabim erisa macceesukko.

⁴Izirim Eehannina makkoo'isa ihaa haqqinne baxamaakkoo beyyonne uullaa hee'ukko; ixxi makki kollinne Maatiitiy, Sheemaa'i, Aanaaniy, Uuryi, Hilqiyii Maa'iseeyii uullita'a hee'llo'o; qeddi kollinnem Fadaay, Miishaa'eel, Maalkiy, Hashum, Hashbaadaanaay, Zakkaaryaasii Mashulaamii uullita'a hee'llo'o.

⁵Izirim qoffaa baxamaakkoo beyyonne uullukkaare manni hundim qoxxisaa moo'ukkuuyyi ee See'l kitaaba fooqaa'u ammanenne manni hundim afuuru beyyiinsi ki'aa uullukko.

⁶Izirim hundiinsi lob Moollanni Waa'a galaxxukko; minaadabim anga iimaa'aa «Aameen! Aameen!» yukko. Uullanne heeshita'ahim Waa'ina otossito'o.

⁷Ee lasage minaadab ki'aa uullukko; Leewi'i oos Iyyaas, Baani'i, Sheereebiy, Yaamiin, Aquub, Shaabataay, Hoodiy, Maa'iseey, Qaliix, Azaariy, Yoozaabaad, Hanaanii Phalaayii See'l kitaaba minaadabina caakkissa'a kuttam hee'llo'o.

⁸Ixxuwwim mannina hundinam aageena xanoo'isinne Waa'i See'l kitaaba qananaa'lla'a caakkissa'a kuttam hee'llo'o.

⁹Minaadab ee kitaabika macceessa'a wi'llito'i bikkina gassaanchi Nahim, Seera losisaanchoo qeessichchoo hee'u Izirii Leewi'i oosii «Kaballi Moollanni Waa'ina keesammi balli ihu bikkina kichche'llakka'a willitakkotte» yito'o.

¹⁰Nahimim «Mallehe, doo'l hurbaata ittakka'a xee'oo agga aggehe bee'aanninam ki'nnuwwina yoohaanniinsi baxxansehe; kaballi ni Waa'ina keesamaakkoo balla; Waa'ik liiranchi ki'nnuwwina malaayyi ihu bikkina kichche'llakkotte» yukko.

¹¹Leewi'i oosim ee keesammi ballanne kichche'immi hasisoobee'an ihukkisa kuttu'uuyyi minaadab sahoo'isa issito'o.

¹²Minaadabim ee See'lleka tirato erisa laqqo'i bikkina ixxuwwi min minem matta'a ittu'uuyyii aggu'uuyyii lobakata liiranto'o. Ixxuwwina yoohaanniinsim mulli keenina baxxansito'o.

¹³Ee la'm balli daram moolli awwonsaan qeessuwwinnee Leewe'uwwii See'l kitaabiinsi losseena Izir beyyo matto'o.

¹⁴Ee See'l kitaabannem Muse'enne ihaa Waa'i uwwu Seeranne lama'l agananne ihoo Daas uguxxi ammane Isra'ee'l oos Daasanne ikka'a lonsimmi hasisoohan ihukkisa laqqo'o.

¹⁵Ee bikkina minaadab Seer ijaajoo'isinne duuna matta'a wee'lleka, udma'i uulli wee'lleka, barsanaaxxeka, dimbaaphphekaa mulli haqquwwikaa caaffuwwa eebba'a godo'o baxxeena Yerusaaleemaa mulli ixxuwwi beero'uwwaa mattona ijaajjo'o.

¹⁶Ee bikkina minaadab hundim caafa eebbu'uuyyi annannichchim hee'oo ooxxi woronne, mi'n hanenne, Keesammi Mi'n wixxixxi beyyonne, «Wo'i gooca» yakkam wixxixxi beyyonnee Efireem wixxixxi beyyonne godo'o baxxo'o.

¹⁷Qeefadanta'a hee'llam uulliinsi daba'llita'a waatto'i manni hundim godo'o baxxa'a afuutto'o. Naawe'i beet Iyyaas doolliinsi kid Isra'ee'l oos ee ballisa ee uguda lonsita'a laqqambee'i bikkina lobakata liiranto'o.

¹⁸Oo ugud asheeramu balliinsi ki'isaa lasaanchi balli afeebe'e Izir Waa'i See'l kitaabiinsi hundem ballam qananaa'am hee'ukko. Minaadabim ee uguda lamar balli afeebe'e lonsito'o; sadeenti ballannem seer ijaajoo'isinne keesammi dummichchi issamukko.