Read Hadiyya Nahim Kitaaba 9 Bible Online

Nahim Kitaaba 9 - Hadiyya bible

Nahim Kitaaba 9

¹Ee aganannem lamiyyennee soo'l ballannee Isra'ee'l minaadab mat beyyonne wixxita'a xiddi eddechcha edde'lla'ahii ixxuwwi horoorennem dira issita'ahii soommanto'o.

²Ixxuwwi gagam mulli minaadab manniinsi hundiinsim annanni issito'o; hundim uullita'a ixxuwwii gaassi ixxuwwi anno'ii baxxo'i baaxiilo hundam biiraa yito'o.

³Uullito'isam Moollanni Waa'i See'l kitaabiinsi qananaa'akku'uuyyi sas sa'aata uullita'a macceesso'o; mulli sas sa'aatina odim baaxiilo biira yitu'uuyyi Moollanni Waa'ina otossito'o.

⁴Leewe'inam baxamaakkoo mikkiranne uullita'a Iyyaas, Baani'i, Qadimi'eelii Shabaaniyii uullita'a Moollanni Waa'a uunxito'o.

⁵Leewi'i oos Iyyaas, Qaadmii'eel, Baani'i, Hashabaaniy, Sheereebiy, Hoodiy, Shabaanyii Phataahiyii «Ki'llakka'a heer heerina hee'oo ki'nnuwwi Moollanni Waa'a galaxxehe; galatiinsii lombiinsii hundiinsim hanaan iimiimihona yito'o.

⁶Ee lasage odim Isra'ee'l oos «Waa'a! Waa'i xale'i atette; at iimanee iimaniinsi iimanenne yoo luwwaa hundam uullaa uullanne yoo luwwaa hundam dambalaqaa woronne yoo luwwaa hundam qooccitaatto. Hundinam foore uwwitto. Iima'n gogot hundim kiina otossookko.

⁷Baabiloo'n uulli Uuriinsi Abraama doo'llitaa wottittok ixxi summam ‹Abrihaama› yitti Moollanni Waa'i atette.

⁸Ixxim kiina amma'nnamaakkoohan ihukkisa moo'llaa ixxenne hidi'l sagara aaggitto. Kaani'aa'nneka, Hiite'ika, Amoore'ika, Farze'ika, Iyyaabuusikaa Gergeese'i mannikaa uulla ixxi shumo'ina uwwiteena sagara aaggitto. At amma'nnantaattoohan ikki bikkina aaggitti hidi'l sagara egattitto.

⁹«At gaassi niyyanno'i Gibxanne hee'llo'i ammane afu hawwo moo'llitto. Ertiira'i Dambalaq gammalanne hara'mmitona uunxito'i uunxato macceessitto.

¹⁰Ni lobanno'i wor amadanto'isa moo'llaa Gibxi adilanne, gassaanonnee ee uulli minaadabannee maalalsiisoo mare'e moo'issitto. Atim eekka issimminne kaballi afeebe'e ki sad uulli hundannem la'amaakko.

¹¹Ixxuwwi illagenne dambalaqa lam issittaare ixxuwwi gogaalli uullinne higgo'o. Xillaalli wo'i woronne uboo ki'nnisam ixxuwwa hollitam hee'llo'i diina'i xuuxanta'a gattamisa issito'o.

¹²Ballaa duuphphi hafinne, hiimoo giirinne googo caakkissittuuyyi awwonsitto.

¹³Iimaniinsi dillitaa ki ooso Siina'i duunanne atoorassitto. Xabbeen awwonsaa hanqo'i seeraa, danaam gatti ogoraa ijaajoo uwwitto.

¹⁴Keesammi ki usheexxaxxi ballam la'issitto. Ki awwaadaanchi Muse'ennetti ikkaa ijaajo, ogoraa seeraa uwwitto.

¹⁵«Sibaatto'i ammane maanna'a iimaniinsi dilliissitto; xeebe'llo'i ammane sifo'i kiniinsi wo'o fissitto. Ixxuwwina uwwiteena sagar aggitti uulla matta'a lago aa'llamisa issitto.

¹⁶Ihukkaarem ni lob anno'i tobbe'llo'o; ixxuwwi wodanom duudisso'o. Ki ijaaccisannem marimma sabbo'o.

¹⁷Kiina ijaajancham sabbo'o. At ixxuwwina issitti maalalsiisoo mare'uwwa hundam xaddo'o. Ixxuwwi lambe'iinsim awwonsoo mancho doo'llita'a odim Gibxi uulli agiddanina awwonsoo'isa issito'o. Ihukkaarem at iittinne wo'mmitaattoohane, quunqina gaaggaabboobee'ane, haafitoohanee biijaalli Waa'aa ikki bikkina ixxuwwa uunjitaa uttittoyyo.

¹⁸Ixxuwwi addichcho laboo misila baxxa'a ‹neese Gibxi uulliinsi awwonsaa fissu Waa'i kane› yito'o. Waa'a! Ki summa hinkaa'na bi'isso'o!

¹⁹Ihukkaarem kiikki haafit lobakat ihukkaanniinsi ki'aa at ixxuwwi udma'i uullanne bi'llona cawwitaa uttittoyyo. Baallaa hiimoo ixxuwwa awwonsoo duubaa gii'l caakkaa ixxuwwiinsi qeessittoyyo.

²⁰Issitam luchcho hundam losisoo kiikka biijaalli ayyaana uwwitto. Ittona maanna'aa aggam wo'oo uwwitto.

²¹Udma'i uullanne sor hiincho hundam taakke'llu'uuyyi ixxuwwina hasisoo luwwiinsi maham hoffiissittoyyo. Ixxuwwik eddechchi beeddukkoyyo; lokkim shuushe'ukkoyyo.

²²«Keese laqqambee'i minaadaphpheka adilluwwa ixxuwwi minaadabinne maqirem kaa'lla'a ixxuwwi uulli tochchi gabala hundam amaddamisa issito'o. Adil Siihoon gassam hee'u uulla kaa'lla'a amaddo'o. Adil Oog gassam hee'u Baasaa'n uullam lago aa'llo'o.

²³Ixxuwwinam iima'n boollaanki qax ooso uwwitto. Ixxuwwi lob anno'ina uwwiteena sagara aaggitti uulla kaa'lla'a amaddamisa issitto.

²⁴Ixxuwwi oosim Kana'aa'n uulla kaa'lla'a amaddo'o. Ee uullanne hee'llo'i minaadabam at kaa'llitto. Ee uulli minaadabannee minaadaphphi adilluwwannee hasso'oka hundam issitona at ixxuwwina malaayye uwwitto.

²⁵Ki minaadabim girbamaakkoo beero'uwwaa harish uullaa danaam mu'utinne wo'mmaakkoo minneewwaa hundam bariinsi firu wo'uwwaa wee'l zaytaa woyi'n haqqaa mulli mish haqquwwaa hundam amaddo'o. Goddita'a itto'aarem ixxuwwi orachchi geejjukko. Atim ki biijoominne ixxuwwina uwwitti danaam luwwanne hundannem liiranto'o.

²⁶Ihukkaarem ixxuwwi kiina ijaajancha sabba'a keesenne boqqito'o. Ki ijaajom afareen uunjito'o. Ki kollonne daba'llitona qoxxissa'a kuttam hee'llo'i ki hiraagaanom shito'o. Ki summam amman hundam sholliisso'o.

²⁷Ee bikkina diina'i ixxuwwa kaa'lla'a gassitona higissaa uwwitto. Ixxuwwi hawwita'a at hara'mmitona ki kollonne laatto'i ammane at iimaniinsi macceessitto. Ki urat lobakat ihukkaanniinsi ki'aa diina'i angiinsi gatisoo awwonsaano at asse'llitto.

²⁸Ihukkaarem ixxuwwi xumma siidda'a lasage ki illagenne odim jora baxxo'o. Atim ixxuwwa odim diina'ina higissaa uwwitto. Ki kolli daba'llita'a at hara'mmitona latto'aare odim at iimanenne ikkaa macceessitto. Ki haafit lophphimmiinsi ki'aa at ixxuwwa amman hundam hara'mmitootto.

²⁹Ki sagarina ijaajantamisa qoxxissaa kuttitto. Ki ijaajo egerimmi heechchi goog ihuta'nnim ixxuwwi tobbe'lla'a egerimma sabbo'o. Ixxuwwi wodanom duudissa'ahii afare dabatta'ahii ijaajancha sabbo'o.

³⁰Atim lobakat doollina iyyaqqitto. Ki ayyaaninnem hiraagaano ki'issaa qoxxissa'a kuttamisa issitto. Ihukkaarem ixxuwwi macceesseena hassobee'i bikkina ixxuwwi kululleetanne hee'llam mulli minaadabina higissaa uwwitto.

³¹Ihukkaarem at biijaallaa haafitoo Waa'aa; ki haafitim lobakat ihu bikkina bi'isseena hassittoyyo.

³²«Ni moollanni Waa'a! At hinkido'i lob Waa'a At hinkido'i malaayyaamoo baddissoo Waa'a; ki hidi'l sagaraa heer heerina hee'oo ki iittoo amma'nnamaakkoo'isinne at egettootto. Aasoo'l uulli adilluwwi doolliinsi kaballi afeebe'e

³³neesenne issitti luwwi hundannem at hanqa; neese jora banxumta'nnim at amma'nnantaa hee'lloohane.

³⁴Ni lob anno'i, Qeessuwwi, Adilluwwii awwonsaanii ki seera egatto'oyyo. Ixxuwwina uwwitti ijaajoo asse'llitti qoxxish sagaraa macceesso'oyyo.

³⁵Ixxuwwi adilla'n doollennee ki biijoominne at uwwitti harish haraar uullannee hee'llo'i ammane kiina otossito'oyyo. Ixxuwwi jolli baxiinsim daba'llita'a keese awwaaddeena xanto'oyyo.

³⁶Eehanniinsi kaa'aa oono'o kaballa neese agid inkaammo. At niyyanno'ina uwwutti mishaamoo maassaamoo ihu danaam ni uullannee neese agid inkaammo.

³⁷Neese baaxiilo banxaa keese kichche'insummi bikkina ni hanenne gassaan issitaa ki'issitti adilluwwina ee uulli mish hundiinsem ludo gibillummuyyatte. Ixxuwwim neesennee ni foora am diinatennee hundannem ixxuwwina faare'isu luwwi hundam issitamuulla. Neesem eehanniinsi ki'aa kee'mmaalli hawwonne yommine'e» yita'a uunxito'o.

³⁸Ka ihu luwwi bikkina hundinam amma'nnisoo hidi'l sgara kitaanboommo; Iittammaa kitaambummaannonnem ni awwonsaan, Leewi'i oosii qeessuwwii koobo'o koobbamo.