Read Hadiyya Asteer Kitaaba 1 Bible Online

Asteer Kitaaba 1 - Hadiyya bible

Asteer Kitaaba 1

¹Adil Arxeeksis Hindiinsi ki'isaa Tophphe'i afeebe'e yoo mat xibbee lamiyyee lamar uullaa gassam hee'ukko.

²Ee ammane adil Arxeeksis Suusa'i beero'onne yoo ixxi adilla'n minenne hee'am hee'ukko.

³Ixxim adil ihu saxxi hiinchonne ixxi gassaan hee'llo'i daannuwwinaa gassaaninaa hundinam haraar maadda gudisukko; ee maaddannem Faariis uullik, Meedoo'n uulli gaadaano ijaajaan, uulla gassaanii woshaabbuwwii hee'llo'o.

⁴Ixxuwwinam ixxi adilla'n gassonne yoo lobakat godda, ixxi hibba, lombaa nuuraa mat xibbennee sadeentayyi ayyaamonnee moo'isukko.

⁵Ee lasage oo adil Suusa'i beero'onne hee'llam mannina buxinaa goddaaninaa hundinam odim mulli maadda gudisukko; oo maaddim adi'l mi'n hegeegonne kaasamu haqquwwi hafanne yoo wixxixxi beyyonne lamarayyi ayyaam afeebe'e hee'ukko.

⁶Oo wixxixxi beyyim qadaalli fuutto'inne baxamaakkoo shaano'i hagar yoo du'm eddechchinne wereeggisakko'oohan hee'ukko; du'm eddechchuwwim kuul hagar yoo fatirinne dadamaakkoohanee kin bi'l quba'uwwinne axisamaakkoohanee ihukkuuyyi ussuwwinne bito xee'aalli kininne baxamu utubbuwwanne calcalaa hee'ukko; qadaall, kashar, baarii shaano'i hagarii yoo bito xee'aalli kininne baxamaakkoo luwwi dahamu gaxanne worqinnee kin birinnee baxamaakkoo gundi ara'uwwi hee'ukko.

⁷Agakkam luwwam annanni hagar yoo kobi'llantambee'i humbulluwwanne danaanakkam hee'akko'o; ee aggam adil issu haraar biijoomiinsi ki'ukkok lobakata fafisakka'a uwwakkamisa issukko.

⁸Adilim ayyi manchinam ixxi gaqqi uulli losa'nnisa hasu qaxa agoo'isa danaantamisina adi'l mi'n danaanaanina ijaajo uwwaa hee'ukko.

⁹Ee'isam adi'l are Asxiina odim adil Arxeeksis adilla'n minenne meentina maadda gudissa'a hee'llo'o.

¹⁰Oo maaddi asheeramu lama'l ayyaamonne adil Arxeeksis woyi'n diqaasa agaa lobakata liiramu ammanenne ixxi awwaadaan hee'llo'i lamarem muleessa'uwwa Mahuumaana, Biizita, Harboona, Biigita, Abaagita, Zeetaaraa Karkaasaa ixxi beyyo weeshaa

¹¹«Adila Asxiina adilla'n eddechcha edde'lla'atii adi'lla'n mare'e is horoorenne issaqqita'atii keeyye waattamisa issehe» yukko. Mashka'oomim adila Asxiina lobakata danaamotte hee'llo'i bikkina isek dan ee minaadabinaa ixxi gassaaninaa moo'amoo'isina hasu bikkinatte hee'ukko.

¹²Ihukkaarem adila Asxiina ixxi awwaadaanonne adil asse'u woshsha aa'llobee'i bikkina ixxi illagge marimma sabbo'o; ee bikkina adil lobakata quuqaa nadadukko.

¹³Seeraa gatti ogoraa moo'oo woshshanne qoor sogaano xa'mmimmi adi'l beyyonne losamaakkoohan hee'u bikkina eehido'i woshshi ihoo ammane maha issimmi hasisooda'e kuttamisina ixxi sogaano weeshisukko.

¹⁴Hundi ammanem illag ikka'a sogitanina adi'l illage hincitam hee'llo'i keen Kaarishanatte, Sheetaaratte, Adimaatatte, Taarshiishatte, Meereesatte, Maarsiisaanattee Mamukkaanattee hee'llo'o. Ku lamarem mannim adi'l gassi woronne shiqqeen beyyi uwwamaakkoo keen ikka'a Meedooninaa Faariisinaa daannuwwi hee'llo'o.

¹⁵Adilim ee sogaanina «An adil Arxeeksis i minenne awwaaddam muleessa'uwwa adila Asxiina i beyyo waattona asse'ummaare waarimma sabbo'o. Ee bikkina neese isenne issimmi hasisoo luwwi bikkina seer mayyookko?» yaa xa'mmukko.

¹⁶Ee lasage ixxi gassaaniinsi mat hee'u Mimukaan adi'l illagennee gassaa'n illagennee ihaa «Adila Asxiina sholliisso'ok xale'i adil ihoo'n adi'l gassaan ihu daannuwwaa adil gassoo uullanne hundannem yoo goonaa» yukko.

¹⁷Mashka'oomim tu adila baxxo'i bax mulli meenti beyyonne hundannem macceesamukkaa'lleensi issuwwi goona gaddamo; adil Arxeeksis adila Asxiina ixxi beyyo waattona ijaajukkaare ise ixxi beyyo marimma sabbo'oyyonnihe?» yitamo.

¹⁸Tu adila baxxo'i baxo macceesso'i Faariisikii Meedoo'n gassaa'nnekii meenti ka adi'l uulli gassaan hundinam ka ballam eelliinchi aagoo'nnim isesam yiteenayyonnihe? Eehid ihukkaa'lleensi beeddoobee'i gadanchii joranchii min hundannem ihookko.

¹⁹Adila, ki doo'l ihukkaa'lleensi adila Asxiina ka lasage ki beyyo hincitambee'isa issoo alallaato fisse; oo alallaatim hore'em dabassamoobee'an ihaa doolli hundinam qoxxaakkoohan ihoo'isina Faariisaannonnee Meedoo'n seerannee exxaa kitaabamona ijaaje. Adil Asxiinakam adilla'n lomba iseensi e'llitam mulli meentichchona uwwe.

²⁰Ku at higissoo alallaat at gassitoo lob haraar ki adilla'n gassi uullanne hundannem erisa la'amaa lasage meenti hundim ixxuwwi goon buxichchi te'im goddaanchi ihuta'nnim lonsitu'uuyyi hee'llamo» yaa wocukko.

²¹Oo woshshim adilaa adi'l gassaanoo hundam liiransukko. Adilim Mamuukaan hincaa'u sawwit wo'mmoo'isa issukko.

²²Ee bikkina adil «Ayyi manchim ixxi gaqqi minina lobanee ijaajaanchoo ihaa gassimmik hanqi egeramaakkoohan ihona» yaa ixxi gassonne yoo uulli suum hundinnem gatti losa'nnisinne kitaabamaa hundi beyyom afoo'isa issukko.