Read Hadiyya Asteer Kitaaba 2 Bible Online

Asteer Kitaaba 2 - Hadiyya bible

Asteer Kitaaba 2

¹Ee lasage adil Arxeeksisik quunqi billaa lasonne adila Asxiina ixxonne issito'i luwwaa isennem alallaatisu alallaatoo dabaransaa sawwam hee'ukko.

²Ee bikkina adi'l hincixxi sogaan adilina «Danaam mishisoo baajaam landa kiina hasakkona.

³Ee danaam mishisoo landam Suusa'i beero'onne yoo adi'l mine egeraanchi muleessakkichchi Heegaayyi beyyonne suusa'i giribanne wixxaa'akkona; adilim ixxi gassoo uullanne hundannem ekeenina gassaano doo'llona; ixxuwwinam laphphitam luwwii ixxuwwi dano ege'llitam luwwii hundim uwwamona.

⁴Ee keeniinsim adila liiransiteena xantam danaam baajaamo Asxiin beyyonne adilatte ikkona» yukko. Adilim ee sogitano aa'aa er sogitan ihukkisa moo'aa yamamukkisa issukko.

⁵Ee suusa'i beero'onne Yihuxxi uullik Mardookiyoos yakka'a weeshakkam mat manchi hee'ukko; ixxim Yaa'iir beet ihaa Biiniyaam sulliinsi Qiisinaa Shiimi'inaa moollan hee'ukko.

⁶Mardookiyoosim Baabiloo'n adil Nabukadanaxoor qeefadu Yihuxxi adil Ikooniyaaninne maqire Yerusaaleemiinsi qeefadamu keeniinsi mat hee'ukko.

⁷Ixxenam eeshimmi landichcho hee'llo'o; isenam annii amaa hee'llobee'i bikkina ixxi li'isam hee'ukko; is summim Asteeratte; landichchoomam uullichchinnee daninnee lobakata mishissam haataamotte hee'llo'o; isekim annii amaa lehakka'a lasage Mardookiyoos ixxi mine massaa ixxi qachchisa issaa abooyyaa heellisaa li'isukko.

⁸Adil alallaato fissu ammanenne suusa'i beero'o waatto'i lobakat landi lambe'enne e'llitamote Asteeratte hee'llo'o; isem adi'l mine massakka'a doo'l landa dissakkam mi'n gassaanchi Heegaayyina egeroo'isina uwwakko'o.

⁹Asteeram Heegaayye liiransitam landichchotte ikko'o; ixxi illagennem nuura siiddo'o; ee bikkina er hurbaata uwwakkamisina is orachchom cukkakka'a mishisoo'isa issimminne is dan bi'oobee'isa abooyyimminne egerantamisa issukko; doo'l meento egerakkam minennem hundiinsi e'lloo beyyo doo'llaa uwwimminne adi'l minenne do'llanto'oo lamar meento egettam awwaadaa'n anganne uwwanto'o.

¹⁰Mardookiyoos gaassaatim Asteera Yihudichchotte ikko'isa ayyenam kuttambee'isa kuraa hee'u bikkina maaxxa'a hee'llo'o.

¹¹Mardookiyoosim Asteeranne ihoo luwwaa is fayya'oomaa la'eena hasu bikkina ballina, ballina ee meenti gatti mi'n nafaranne ekkidii kidii daba'llamam hee'ukko.

¹²Ee meento egerakkam minenne mat landichcho adil Arxeeksis beyyo aagimmina kor afeena illageen loh agana hundoomam karbe'ee yakkam enje'oo zaytinne odim lobakata enje'oo bito xee'aalli laphphakkam luwwa laphphimminnee illenne laphphakkam hagara dansoo luwwinnee dantu'uuyyi tommoo lam aganaa affamo.

¹³Ee doo'llanto'i meento egerakkam miniinsi fitta'a adi'l beyyo aaggam ammane hasso'i hagar eddechcha edde'lleenaa hasso'i luwwam amaddeenaa xantam hee'llo'o.

¹⁴Aaggam amman afu landichcho ee hiimo adilla'n mine massakkamo; ee beyyonnem adi'l meento egerachi woronne ikkamo; adi'l ellagenne nuura siiddolas ixxi is summa weeshaa la'mmeka ixxi beyyo waattamisa issubeelas la'mmaagge ixxi beyyo hincitamoyyo.

¹⁵Mardookiyoos ixxi qachchisa li'isuk Asteera egeranto'i miniinsi adi'l illage hincitam amman afukko; Asteeram Abihaayil beet ixxi qachchisa issaa li'isu Mardookiyoosina eeshimmi landichchotte hee'llo'o; isem moo'oo manni illagenne hundannem nuuraamotte hee'llo'o; isem adi'l beyyo aaggam kor isena afukkaare doo'l meento egeraanchi muleessakkichchi Heegaayye sogukkisanne edde'llo'o.

¹⁶Arxeekisis adillano aa'u lama'l hiinchonne Teebeet yakkam tommi agananne Asteera adi'l mine massakko'o.

¹⁷Adilim mulli landi hundiinsim lonsaa ise iittukko; mulli keeniinsi hundiinsim lophphoo iittoo nuuraa siiddo'o; ixxim adilla'n mare'e is horoorenne issaak Asxiin beyyonne adilatte issukko.

¹⁸Ee lasage adil Asteer lombi bikkina lobakat maadda issaa ixxi sogaanoo uulli gassaanoo hundam weeshukko; oo ballim adil gassoo uulli hundannem liiranchi ugud ihoo'isina alallaatukko; lobakat biijoom wo'mmaakkoo adilla'n irifo'om uwwukko.

¹⁹Baajaammuwwi la'm kore wixxito'oohaannonne Mardookiyoos gassimmi baxonne ihaa adi'l mi'n goocanne afuuraa hee'ukko.

²⁰Mardookiyoos gaassaatim Asteerana hinka'i uulliinsetda'e te'im aymanchotda'e ikko'isa ayyenam kuttambee'isa sogaa hee'u bikkina maaxxa'a hee'llo'o; mashka'oomim ciilatte hee'llu'uuyyi Mardookiyoos li'isam hee'u ammane ixxena luwwi hundannem ijaajantam hee'llo'isam ka woshshannem ijaajanto'o.

²¹Mardookiyoos adi'l mi'n goocanne baxukkuuyyi hee'oonam adi'l mine aagakkam gooccuwwa egettam hee'llo'i muleessa'uwwi Bigitaanii Teereeshii lamim adil Arxeeksisanne quuqqa'a shiteena a'llanta'a hee'llo'o.

²²Mardookiyoosim ee a'llancha macceesu ammanenne Asteerana kurukko; Asteeram Mardookiyoos ee woshsha kurukkisa maaxaqqanne adilina kutto'o.

²³Ee lasage oo woshshi saarayyamu ammanenne hanqi ihaa siidamukko; ee bikkina ee lamem mannam haqqanne saqalakka'a shakko'o; adilim oo woshshi adi'l aganni kitaabanne kitaabamaa afuuroo'isa issukko.