Read Hadiyya Asteer Kitaaba 3 Bible Online

Asteer Kitaaba 3 - Hadiyya bible

Asteer Kitaaba 3

¹Ee lasage adil Arxeeksis Agaag shumo'iinsette hee'u Haamaadaat beet Haamaanina mulli daannuwwiinsi hundiinsim hanaan lomba uwwaa daanni issukko.

²Adilim adi'l mi'n goocanne yo'i daannuwwi hundim Haama'ana guruphphita'a otossitamisina ijaajukko; ixxuwwi hundim ijaajanto'isam issito'o; ihukkaarem xale'i Mardookiyoos guruphphaa heeshimma sabukko.

³Adi'l mi'n baxaan ikko'i mulli gassaan Mardookiyoosina «Adi'l ijaajo mahina sabbaate?» yitu'uuyyi

⁴ballina ballina ixxi sawwite dabassiteena yakitam hee'llo'o; ihukkaarem ixxi ee woshsha aa'eena hasukkoyyo; hore'oomam «An Yihudichchi ihummi bikkina Haamaanina heeshimmi iina labooyyo» yaa murte'aalli sawwite ixxuwwina kurukko; ee lasage «Ka Mardookiyoos bolxooma hinkaa'nna iyyaqqeena xanookko?» yita'a maalalimminne ee woshsha Haamaanina kutto'o.

⁵Haamaanim Mardookiyoos ixxena guruphphaa heeshubee'isaa lonsubee'isaa moo'u ammanenne lobakata quuqukko.

⁶Mardookiyoos Yihuxxi shumo'iinsette ihukkisa la'u ammanenne eraa'llaanniinsi loboka Haama'a quuqaa Mardookiyoos bi'ishshina xale'i ixxi guzumo'amim ihooyyo yaa sawwukko; ee bikkina Faariis adi'l gassi uulli hundannem yoo Ayihuxxi minaadab hundam bi'isoo googo hasukko.

⁷Arxeekisis adil ihu tommonnee la'm hiinchonnee Niisaanaa yakkam luxxi agananne Ayihuxxi minaadaba bi'isimmina makkoo aganii ballii annanni ihaa la'amoo'isina Puuriim yakkam saamo Haamaan illagenne issakko'o; oo saamim Adaara yakkam tommikii la'm aganii aagu tomminaa saxxi ballinaa ihoo'isina firukko.

⁸Ee bikkina Haamaan adil Arxeekisisina «At gassitoo ki adilla'n uullanne hundannem binnita'a hee'llam minaadab yo'o; oo minaadabim mulli minaadabiinsi annanni ihaakkoo seeraa gatti ogoraa fissita'a hee'llam minaadaba; ku minaadab adi'l seerinaa gatti awwonsinaa ijaajanto'oyyo; ee bikkina ka minaadaba cawwitaa uttittaa'lleensi kiina lobakata joraakkoo luwwi iheena xanookko;

⁹Adila, ku minaadab bi'oo'isina alallaat firona; ku woshshimdu ihoo'isa issititta'n an ki adilla'n gassina hara'mmoo'isina sas xibbee sor kum kilo'oo kee'mmoo kin bira adi'l diinate dissakkam minenne aagisoommo» yaa wocukko.

¹⁰Ee bikkina adil ixxi alallaato minaadabina fissimmina awwaaxxoo koobo'i yoo guma'a angiinsi fissaa Ayihuxxi minaadabina masokkichchi ihu Agaag shumo'iinsette hee'u Haamaadaat beet Haamaanina uwwukko.

¹¹Adilim Haamaanina «Oono'o mannii ixxuwwi diinatii hundim kiihan ihu bikkina hassittisa issiteena xantootto» yukko.

¹²Ee bikkina luxxi aga'nnaannonne tommonnee saxxi ayyaamonnee Haamaan adi'l woshsha kitaabbam manna weeshaa oo alallaato annanni annanni suuminne tiramaa ee adi'l gassi woronne kitaabakkam see'llisinne hundinnem kitaabamaa gudaa uulla gassaaninaa daannuwwinaa hundinam afoo'isa issitamisina ijaajukko; oo alallaatim adil Arxeeksis summinne kitaabamaa adi'l angii koobo'aam guma'inne Koobamaa asse'amukko.

¹³Asse'amaanim ee alallaato adil qassoo uulli hundam afissamisina asse'anto'o; oo alallaatim Adaaraa yakkam tommaannonnee la'm aganannee tommaannonnee saxxi ballannee Ayihuxxi minaadaba hundam lommannaa meentoo goonaa ciilluwwam edaa matim gatoo'n shakka'a guullakkamisinaa bi'isakkamisinaa ixxuwwina yoo luwwi hundim bogamoo'isinaa issoohan hee'ukko.

¹⁴Ee ballina manni hundim gudaa egeroo'isina minaadabina qoxxaallisa alallaatamaa hee'ukko.

¹⁵Asse'ammaanim adi'l ijaaccisanne qaqqissa'a matto'i alallaatim Suusa'i beero'onne alallaatamukko; Suusa'i beero'i manni dambaqanne hee'onam adilii Haamaanii aggeena afuutto'o.