Read Hadiyya Asteer Kitaaba 4 Bible Online

Asteer Kitaaba 4 - Hadiyya bible

Asteer Kitaaba 4

¹Mardookiyoos ee issamu luwwi hundam la'u ammanenne lobakata kichche'u bikkina edde'u eddechcha dereerukko; ee lasage xiddi eddechcha edde'aa ixxi gaqqi horoorennem gii'l buchcha laphphaa sagara fissaa laarukkuuyyi qaraaraallisa wi'llimminne ee beero'i woronne daba'llamam hee'ukko.

²Ayyi manchim xiddi eddechcha edde'aa adi'l mine aagimmi xansiisoobee'i bikkina adi'l mi'n gooc afeebe'e hincukko bagaan woro aageena xanukkoyyo.

³Adi'l alallaat alallaatamu uulli hundannem Ayihuxxi manni lambe'enne kee'mmaalli kichchechchi ihukko; soommanto'o; wi'llito'o; laatto'om; lobakat keenim xiddi eddechchannee gii'l buchchannee iinse'llo'o.

⁴Asteerana awwaaddam landii ise egettam muleessa'uwwii Mardookiyoos issoo luwwa hundam isena kutto'i ammanenne ise lobakata kichche'llo'o; Mardookiyoosinam xiddi eddechchi bikkenne mulli eddechcha edde'oo'isina asse'llo'o; ihukkaarem ixxi eekka aa'ukkoyyo.

⁵Ee lasage Asteera adi'l mi'n muleessa'uwwiinsi annannannem isena awwaadona adil uwwu Hataaka yakkam mancho weeshsha'a Mardookiyoosenne mah hawwi afuda'e xa'mmoo'isina asse'llo'o.

⁶Hataakim adi'l mine aagakkam gooc gadanonne yoo beero'i wixxixxi beyyonne yoo Mardookiyoos beyyo marukko.

⁷Mardookiyoosim ixxonne afu luwwi hundam caakkisaa kurukko; Haamaanim Ayihuxxi minaadab hundam shakka'a guullakkaman ihulas adi'l diinate dissakkam minenne hinkaa'n diinate disseena sagara aaguda'e edaa kurukko.

⁸Ayihuxxi minaadaba guullisimmina Suusa'i beero'onne alallaatamu alallaaxxekam kitaaba Hataakina uwwukko; oo alallaat kitaabamu alallaaxxi kitaabam massaa Asteerana uwwoo'isinaa ihu woshshi hundam caakkisaa kuroo'isinaa ee'isam adi'l beyyo aagga'a is minaadaphphi bikkina qishixxato issona adila uunxitamisina kuroo'isnaa Hataaka uunxukko.

⁹Hataakim Mardookiyoos wocu woshsha hundam maraa Asteerana kurukko.

¹⁰Isem Hataak Mardookiyoos beyyo daba'llaa maraa

¹¹«Adi'l mi'n sogaanii ixxi gassi uullanne hee'llam minaadabii hundim goon te'im meenti ayyi manchim weeshamoo'n adil yoo woro'l afuuchchi beyyo aagookkok hundim adilina xale'i matem seer yoo'isa la'ookko; oohim eehid issu manchi lehookko; mat manchi eehido'i lehiinsi gateena xanookkok adil ixxi doo'llinne worqi bicco ee manchi kollonne xabbaa'oohaarette; ihukkaarem an adi'l beyyo aagona weeshamummaaniinsi sad balli higaakko» yita'a asse'llo'o.

¹²Mardookiyoosim Asteera asse'llo'i asso aa'aa lasonne

¹³«Ayihuxxi minaadab hundim beedditu'uuyyi at adi'l minenne yoonti bikkina gatoommo yitaa ki wodanonne sawwititte.

¹⁴At kido'i ammanenne cawwitaa uttilas hara'mmatii gatimmii Ayihuxxi minaadabina mulli kollinnem ihookko; ihukkaarem atii kiyyanni minii bi'llakkamo; odim at adilatte ikkittok kido'i hawwi ammanenne agaagonnetda'e ayyi la'aate?» yaa asse'ukko.

¹⁵Asteeram Mardookiyoosina dabatta'a

¹⁶«Mattaa ki'llaa Suusa'anne yo'i Ayihuxxi minaadaba hundam wixxaa'e; i bikkinam soommannehe; sas ayyaamina hiimoo ballaa ittakkottee aggakkottemee; anii iina awwaaddam landii ee'isam soommannoommo; ee lasage see'llisanne hooramaakkoohan ihukkaarem adi'l beyyo aagoommo; eekka issaa bi'ummaarem bi'oommo» yitta'a asse'llo'o.

¹⁷Mardookiyoosim maraa ki'aa Asteera ijaajjo'i luwwi hundam issukko.