Read Hadiyya Asteer Kitaaba 6 Bible Online

Asteer Kitaaba 6 - Hadiyya bible

Asteer Kitaaba 6

¹Ee hiimo diriir adiliinsi bi'ukko; ee bikkina doolli aganna kuroo kitaaba eebakkamisina ijaajukko; ee kitaabam ixxi illagenne qananaa'akkamisina ijaajukko.

²Ee kitaabanne qananaa'akko'i beyyuwwiinsi matoom adil hee'oo mine egettam hee'llo'i Bigtaanii Teereeshii lamem muleessa'uwwim adila shiteena a'llanto'isa Mardookiyoos hinkid issaa afuda'e kuroohan hee'ukko.

³Adilim «Eehannah kaka issu bikkina Mardookiyoosina uwwinummi daannoom mah yookko?» yaa xa'mmukko. Ixxi awwaadaanim «Ixxena issammu luwwi mat luwwim bee'e» yita'a dabatto'o.

⁴Adilim «Ka adilla'n minenne an uwwummi daannuwwiinsi ayyi yookko?» yaa xa'mmukko; ee ammane gudisu haqqanne Mardookiyoosa saqaleena Haamaan adila xa'mmeena adilla'n mi'n wixxixxi beyyo aagam hee'ukko.

⁵Ee bikkina ixxi awwaadaan «Oono'o Haamaan keese atoorasseena xa'mmoolla» yito'o. adilim «Aagona» yukko.

⁶Haamaan aagu ammanenne adil «Adil lonseena hasu manchina maha issimmi hasisookko?» yaa xa'mmukko. Haamaanim «Adil ka lomba iinniinsi mulli mannina ayyena uwwookko?» yaa ixxi tiironne sawwukko.

⁷Ee bikkina Haamaan adilina dabaraa «Adil lonseena iittu manchina

⁸adil edde'u lombi eddechchii adilim saa'lloo farashshii waarona; adilla'n lombi mare'im ixxi horoorenne issamona.

⁹Oo eddechchii farashshim lobakat lombi yoo adi'l mi'n daannuwwiinsi mat anganne uwwamona; adil lonseena iittoo manchom eddeesakkona; ee lasage farashshonne saa'llisakka'a beero'i lambe'inne higisakkona; ixxi illagennem ‹Adil lonseena iittoo manchina ka'isa issamookko› yamamaa alallaat kuramona» yukko.

¹⁰Adilim Haamaanina «Qaqqissaa ki'llaa ee iina woccittisam eddechchaa farashshoo masse; adi'l goocanne Ayihudichchi ihu Mardookiyoosina ee'isa isse at kuttittaanniinsi ma'llichchim gatoone» yukko.

¹¹Ee bikkina Haamaan eddechchaa farashshoo massukko; Mardookiyoosinam eddeesaa farashshonne saa'llisukko; beero'i dummichchi beyyi gadaninne higisukko; ixxi illagennem ‹Adil lonseena iittukkaannina ka'isa issamookko› yaa alallaata kurukko.

¹²Ee lasage Mardookiyoos adi'l mi'n gooca daba'llukko; ihukkaarem Haamaan kichche'aatii horoorenne gunguu'llaatii qaqqisaa ixxi mine marukko.

¹³Haamaanim ixxi meentichcho Zeereeshshenaa ixxi beshinaa ixxonne afu luwwi hundam kurukko; qoolluwwi keenii ixxi beshii ixxi meentichcho Zeereeshee ixxi illagenne ubimma asheettitti Mardookiyoos Ayihudiinsette ihaakkoolas ixxi illagenne hore'em ubbootto bagaan kaa'llooyyo» yito'o.

¹⁴Ixxuwwi woccu'uuyyi hee'llonam adi'l muleessa'uwwi waatto'o; ixxuwwim Asteera gudisso'i maaddina waaroo'isina Haama'a gaaggaabisso'o.