Read Hadiyya Asteer Kitaaba 7 Bible Online

Asteer Kitaaba 7 - Hadiyya bible

Asteer Kitaaba 7

¹Ee bikkina adilii Haamaanii la'mmekam Asteeranne maqire maadda itteena matto'o.

²Woyi'n diqaasa aggu'uuyyim adil «Adil Asteera, at iinniinsi uunxitoo luwwi maha? Kiina uwwamookko; kiina hasisoo luwwidu maha? I adilla'n kollom ihuta'n kiina uwwamookko» yaa la'mmaaggem xa'mmukko.

³Asteeram dabatta'a «Adila, an ki illagenne nuura siidaammoolasii keesem liiransaammoolasii an hasoommok anii i moollii foorinne hee'nneena xannoomisinatte.

⁴Oono'o anii i moollii bi'nnoommisina, shakkamisinaa guullakka'a bi'isakkamisinaa biteesammaammo; agid inkoommisina biteesammaammoota'nna'i cawwaa uram hee'ummo; mashka'oomim kido'i u'n adila hawwisoohaneyyo» yito'o.

⁵Ee lasage adil Arxeekisis «Kaka iggaa issukkok ayyette? Manchoom yookkok hannonnette?» yaa adil Asteera xa'mmukko.

⁶Asteeram «Ni diinakkichchii neessenne leho oogatukkokii Haamaan yakkam ka jor mancho!» yito'o. Haamaanim adi'l illagennee Asteer illagennee lobakata muggukko.

⁷Adilim lobakata quuqaa afuuru beyyiinsi ki'ukko; woyi'n diqaasa agookkokam uraa adi'l mi'n duubbi kaashshi woro marukko; ihukkaarem Haamaan ixxo adil bi'iseena murte'aa ki'ukkisa la'u bikkina ixxi foore gatissamisina adil Asteera uunxeena laso gatukko.

⁸Ixxim haafit ihoo'isina uunxeena hasaa adil Asteera afuutto'i gundi ara'anne illillaachcha ubukko; adilim adi'l mi'n duubbi kaashshi beyyiinsi daba'llaa woyi'n diqaasa agam hee'u beyyo aagu ammanenne kaka moo'aa hore'em lobakata quuqaa «Ku manchi i gaqqi adilla'n minenne i illi moo'ukkuuyyim ta adila iggeena hasoollannihe!» yaa shuuraa wocukko. Adil ee'isa wocukkisam ee ammanchom muleessa'uwwi Haamaanika ille katto'o.

⁹Ixxuwwiinsim mat Harboona yakkam muleessakkichchi «Adila, Haamaan ka hundiinsim loboka keese lehiinsi gatisu Mardookiyoosa saqaleena hasu bikkina kaasaakkoo haqqi ixxi minenne yookko; haqqoo'mmekim qeeraa'lloom ontayyi anga» yaa kurukko. Adilim «Haama'a massitakka'a ee haqqanne saqallehe!» yaa ijaajukko.

¹⁰Ee bikkina Haamaan Mardookiyoosa saqaleena gudisu haqqanne saqalamukko; ee lasge adi'llek quunqi billukko.